صرف غریب بندا جیل وچ اے‘ اومنی گرُپ توں لے کے آصف زرداری تک سارے ضمانت اُتے نیں پر غریب دی ضمانت نہیں:  وزیر ریلوے شیخ رشید ۔۔۔٭ رویل نیوز٭

لاہور (اُچیچا نمائندا) وزیر ریلوے شیخ رشیدنے کہیا اے کہ آصف زرداری سنے وڈے ملزمان ضمانت اُتے تے غریب بندا جیل وچ اے۔ وزیر اعلا سندھ ڈبل سواری تے دفعا 144 دے ملزماں نُوں رہا کرن‘ فرانزک رپورٹ 5‘10 دن لیٹ ہو سکدی اے پر ساہمنے ضرور آئے گی‘ آئی پی پیز‘ شوگر سکینڈل تے قرض معاف کروان والے انجام نُوں پہنچن گے۔ ایتوار نُوں لاہور ریلوے سٹیشن اُتے راشن ونڈن دی تقریب نال خیالاں دا اظہار کردیاں ہویاں اوہناں نے کہیا کہ لاک ڈاؤن ایہو جہیا ہووے جہدے وچ لوک بھُکھ نال نہ مرن‘ غریب بندے نُوں راشن مل رہیا اے‘ اصل مسئلا سفید پوش دا اے جہدے کول روزگار نہیں اے تے جہڑا ہتھ کھلارنا توہین سمجھدا اے۔ شیخ رشید نے کہیا کہ حکومت نے نماز دی اجازت دے دِتی اے‘ اللہ وڈا اے تے اوہنے کرم کرنا اے‘ اوہنے ای وباء ختم کرنی اے تے ساڈے گناہاں نُوں معاف کرنا اے‘ کرونا پاکستان وچ کنٹرول ہووے گا تے اوہ تباہی نہیں مچائے گا جہڑی یورپ وچ کھلری اے۔ وزیر ریلوے دا کہنا سی کہ آٹا‘ کھنڈ بحران دی فرانزک رپورٹ کجھ دن لیٹ ہو سکدی اے پر آئے گی ضرور‘ بجلی اُتے آئی پی پی رپورٹ‘ شوگر تے قرض معاف کروان والے چور جیلاں دیاں سلاخاں وچ جان گے۔ شیخ رشید نے کہیا کہ کرپشن کیسز وچ تے وڈے منی لانڈر وِچوں اِک وی جیل وچ نہیں‘ صرف غریب بندا جیل وچ اے‘ اومنی گرُپ توں لے کے آصف زرداری تک سارے ضمانت اُتے نیں پر غریب دی ضمانت نہیں‘ حد ہوندی اے ہر شے دی۔ وزیر ریلوے ہہور کہیا کہ عمران خان دا مشکور آں کہ اوہناں نے پنجاب وچ ڈبل سواری تے دفعا 144 دے سارے ملزمان چھڈوائے‘ مراد علی شاہ توں درخاست کردا آں کہ دفعا 144 دے سارے بندیاں نُوں رہا کیتا جاوے‘ تُسیں دفعا 144 دی خلاف ورزی اُتے 4200 بندے گرفتار کیتے نیں‘ ماں‘ بھین‘ دھی دے بیمار ہون اُتے کیہ کوئی باہر نہ نکلے۔ اوہناں دا کہنا سی کہ وزیراعظم نے بین الاقوامی اداریاں توں قرض معاف کرن دی گل کیتی تے قرض اِک سال لئی ملتوی کروای۔ اوہناں نے ہور کہیا کہ قرض لین والیاں دی رپورٹ لیک ہو چکی‘ ایہ حکومت د امتحان اے‘ وزیراعظم دے مؤقف دا حامی آں کہ لاک ڈاؤن وچ غریب بندا بُھکھ نال نہ مرے‘ شہباز شریف میرا یار اے‘ حالے پیسی توں بچ گیا اے‘ روزے گھر وچ رکھے تے سکون نال رہوے۔