مسیتاں نوں کرونا کھلارن دا وسیلا نہ بنایا جاوے،امام حضرات ایس وچ تعاون کرن:فردوس عاشق اعوان ۔۔۔٭ رویل نیوز٭

سیالکوٹ (نیوز ڈیسک) وزیراعظم عمران خان دے اطلاعواں دے اُچیچے معاون فردوس عاشق اعوان نے کہیا اے کہ رمضان بارے اعلامیے اُتے 100 فیصد عملدرآمد علماء دا امتحان اے۔ فردوس عاشق اعوان نے پریس کانفرنس کردیاں ہویاں کہیا کہ صدر مملکت دا علماء نال مشاورت دے بعد متفقا اعلامیا بہت چنگا اے تے قوم دی اواز اے‘ ہن مسیت دے منبر اُتے بیٹھے ساڈے امام تے خطیب دا امتحان وی اے‘ قوم دیاں نظراں علماء اُتے نیں‘ کرونا دے خلاف مہم وچ توقع اے کہ امام حضرات شرط تے اعلامیے اُتے 100 فیصد عملدرآمد نُوں یقینی بنان گے‘ خاص طور اُتے پنڈاں وچ موجود لوکاں لئی اعلامیا دا مرکزی نکتا ایہ اے کہ اللہ دے گھر نُوں شفاء دا وسیلا بنانا اے تے کسے صورت کرونا دے کھلار دا وسیلا نہیں بنن دینا۔ معاون خصوصی نے کہیا کہ مسیتاں وچ صفاں وچ 6 فٹ دا فاصلا رکھنا اے‘ 60 سال توں ودھ عمر دے بندے تراویح گھر وچ پڑھن‘ احتیاط نال ای ایس وباء توں نجات مل سکدی اے‘ کرونا دے خلاف علمائے کرام دا کردار نہایت اہم اے‘ لوکاں نُوں وباء توں بچان لئی اوہناں نے اعلا تدبر دا مظاہرا کیتا۔ فردوس عاشق اعوان دا کہنا سی کہ رمضان رحمتاں تے برکتاں دا مہینا اے‘ ہر مسلمان دا محور تے مرکز مسجد دا منبر و محراب اے‘ ایس لئی مسجد دے اندر بیٹھے امام تے خطیب کرونا دی وباء دے خلاف جنگ وچ ساڈا ہر اول دستا نیں‘ اوہ رائے ساز ہوندے نیں‘ رمضان المبارک وچ کرونا وایرس دے کھلار نُوں روکن لئی صدر مملکت دا قائدانا کردار تحسین جوگ اے‘ ایس وباء دا احتیاط ای سبھ توں مؤثر علاج اے۔