کرونا دی تازا صورت حال بارے وکھ وکھ مسلکاں دے علماء کرام دا اجلاس،وزیر اعظم نے صدارت کیتی،تفصیل جانن لئی ۔۔۔٭رویل نیوز٭

اسلام آباد (نمائندا رویل) وزیراعظم عمران خان دی دی صدارت ہیٹھ سارے مسلکاں دے علماء و مشائخ دے اجلاس سنے کروناوایرس دی موجودا صورتحال تے روک تھام دے حوالے توں اقدامات دا جایزا اجلاس ہویا جہدے وچ علمائے کرام نے کرونا وایرس دے پیش نظر وزیراعظم عمران خان دی لاک ڈاؤن دی حکمت عملی دی بھرویں حمایت کیتی اے۔ علماء و مشائخ دے اِک وفد نے اج اسلام آباد وچ وزیراعظم عمران خان نال ملاقات کیتی تے اوہناں نُوں احتیاطی تدبیراں دے حکومتی فیصلے اُتے عملدرآمد لئی مکمل تعاون دی یقین دہانی کروائی۔ علمائے کرام نے اجلاس وچ کہیا کہ لاک ڈاؤن بارے وزیراعظم دا مؤقف حقیقت پسندی اُتے مبندی تے زمینی حقایق دے عین مطابق اے۔اجلاس وچ وزیراعظم دا کہنا سی کہ حکومت دی بھرویں کوشش اے کہ کرونا دی روک تھام تے معیشت دا پہیا چالو رکھن وچ توازن رکھیا جاوے‘ تاجر برادری دیاں اوکڑاں دا مکمل ادراک اے‘ وفاقی حکومت کوشاں اے کہ حکومت دے حالیا فیصلیاں دی روشنی وچ جتھے تاجر برادری اوکڑاں دا شکار اے اوتھے متعلقا صوبائی حکومتاں دے تعاون نال ایہناں دے مسئلے حل کیتے جان۔ وزیراعظم دا کہنا سی کہ کرونا خلاف سبھ توں مؤثر حکمت عملی سماجی فاصلیاں نُوں یقینی بنانا اے‘ ایس حوالے توں لوکائی نوں ودھ توں ودھ آگاہی فراہم کیتی جاوے تاں جے اوہناں دے تعاون نُوں یقینی بنایا جا سکے‘ زاد ملکاں وچ طاقت دے استعمال دی بجائے قومی اہمیت دے معاملات وچ لوکائی نُوں ترغیب دے کے اوہناں دے تعاون نُوں یقینی بنایا جاندا اے‘ کرونا وایرس دی روک تھام لئی اقدامات سانجھی ذمے داری اے‘ ایہ امر نہایت اطمینان جوگ اے کہ مسیتاں تے عبادتاں دے حوالے توں لائحے عمل ملک دے جید علمائے کرام تے مشائخ دے مکمل اتفاق رائے نال طے پایا اے‘ ایس لائحے عمل اُتے عملدرآمد دی ذمے داری علمائے کرام نے آپ لئی اے۔ وزیر مذہبی امور نور الحق قادری نے اجلاس دی تفصیلات دَسدیاں ہویاں کہیا کہ وزیراعظم عمران خان دے نال علمائے کرام دی بیٹھک بڑی تفصیلی تے کامیاب رہی۔ اجلاس وچ وزیر مذہبی امور‘ چیئرمین اسلامی نظریاتی کونسل قبلا ایاز‘ وفاقی وزیر تعلیم شفقت محمود‘ فردوس عاشق اعوان نے رلت کیتی جد کہ علمائے کرام دے وفد وچ پیر امین الحسنات شاہ‘ پیر شمس الامین‘ پیر نقب الرحمان‘ مولانا محمد حنیف جالندھری‘ مولانا طاہر محمود اشرفی‘ علاما راجا ناصر عباس تے ہور شامل سن۔ ایہدے علاوا سندھ دے گورنر عمران اسماعیل‘ مفتی منیب الرحمان‘ مفتی تقی عثمانی تے علاما شہنشاہ حسین نقوی وی ویڈیو لنک راہیں اجلاس وچ شامل سن۔ دوجے پاسے وزیراعظم دے اطلاعواں دے اُچیچے معاون فردوس عاشق اعوان دا کہنا اے کہ وزیراعظم نے ملک دے چاراں صوبیاں وچ لاک ڈاؤن دے معاملے اُتے گرفتار آئما مساجد تے نمازیاں نُوں ہُن تک رہا نہ کرن دا نوٹس لیا اے‘ وزیراعظم نے اعلان کیتا اے کہ جہڑے وی صوبے یاں شہر وچ علماء حضرات گرفتار نیں اوہناں نُوں فوری رہا کیتا جاوے۔ اوہناں نے کہیا کہ موجودا حالات دے پیش نظر سارے اتحادی تے سیاسی جماعتاں نُوں نال لے کے چل رہے آں‘ ایس ویلے اختلافی امور نُوں اِک پاسے رکھ کے ملکی مفاد دا سوچنا اے۔ ایس توں وکھ اوہناں نے ہور کہیا کہ وزیراعظ لوکائی نُوں کرونا توں بچان لئی اقدامات کر رہے نیں‘ دوجے پاسے ن لیگی قیادت نُوں شریف خاندان دا درد ستا رہیا اے۔ فردوس عاشق اعوان نے شاہد خاقان عباسی نُوں مخاطب کردیاں ہویاں کہیا کہ اوہ اپنی قیادت نُوں کہن قوم دی امانت واپس کر دیوے‘ ایہ قوم دی خدمت دا ویلا اے۔