زکوٰۃ تے صدقے دی رقم  اللہ دی راہ تے خرچن لئی ہوندی اے،مُلکوں باہر دَورے کرن تے دوجے ادارے چلاون لئی کوئی گنجایش نہیں:چیف جسٹس۔۔۔٭رویل نیوز٭

اسلام آباد (نمائندا رویل) چیف جسٹس پاکستان جسٹس گلزار احمد نے ریمارکس دِتے نیں کہ زکوٰۃ دا پیسا بیرون ملک دوریاں لئی نہیں ہوندا‘ زکوٰۃ دے پیسے نال دفتری امور نہیں چلائے جا سکدے‘ عدالت عظمیٰ نے زکوۃ تے بیت المال دے پیسے بارے اسلامی نظریاتی کونسل تے مفتی تقی عثمانی توں شرعی رائے منگدیاں ہویاں اوہناں توں گزارش کیتی کہ دَسیا جاوے کہ زکوٰۃ تے بیت المال دے پیسے نال ادارے دیاں تنخاہواں دِتیاں جا سکدیاں نیں یاں نہیں‘ کیہ زکوٰۃ تے صدقے دی رقم نال ادارے دے ہور اخراجات وی چلائے جا سکدے نیں یاں نہیں‘عدالت نے زکوۃ دے فنڈز دیاں رقماں دی ادائیگی وچ شفافیت بارے سارے صوبیاں تے آئی سی ٹی توں رپورٹ منگدیاں ہویاں بیت المال دی شفافیت سنے چاراں صوبیاں تے وفاق توں اگلی سنوائی توں پہلاں کرونا وایرس اُتے ٹوراکاری رپورٹ منگدیاں ہویاں معاملے دی سنوائی 2 ہفتیاں لئی ملتوی کر دِتی۔ چیف جسٹس پاکستان جسٹس گلزار احمد دی اگوائی وچ سپریم کورٹ دے 5 رکنی لارجر بینچ نے کرونا وایرس نال نبڑن لئی از خُد نوٹس کیس دی سنوائی کیتی۔ سنوائی دوران چیف جسٹس پاکستان نے پُچھیا کہ محکما زکوٰۃ نے کوئی معلومات نہیں دِتی‘ جواب وچ صرف قانون دَسیا گیااے۔ جہدے اُتے اٹارنی جنرل خالد خان نے کہیا کہ وفاقی حکومت زکوٰۃ فنڈ صوبیاں نُوں دیندی اے۔ صوبائی حکومتاں زکوٰۃ مستحقین تک نہیں پہنچاندیاں‘ ایس فنڈ دا ونڈا حصا تے انتظامی اخراجات اُتے لگ جاندا اے۔ اٹارنی جنرل دے جواب اُتے چیف جسٹس نے ریمارکس دِتے کہ مسئلا ایہ اے کہ کسے کم وچ شفافیت نہیں‘ صرف ایہ دَسیا گیا کہ امداد دِتی گئی پر تفصیل نہیں دِتی گئی‘ کسے صوبے تے محکمے نے شفافیت اُتے مبنی رپورٹ نہیں دِتی‘ لوکائی تے بیرون ملک توں لیا گیا پیساپتا نہیں کویں خرچ ہو رہیا اے۔ کھرباں رُپئے خرچ ہو چکے تے روگی صرف 5 ہزار نیں‘ زکوۃ دے پیسے نال دفتری امور نہیں چلائے جا سکدے‘ زکوۃ دا پیسا بیرون ملک دوریاں لئی نہیں ہوندا‘ افسراں دیاں تنخاہواں وی زکوٰۃ فنڈ توں دِتیاں جاندیاں نیں‘ زکوٰۃ فنڈ دا سارا پیسا انج ای خرچ کرنا اے تے کیہ فایدا؟۔ کیہ زکوٰۃ فنڈ توں تنخاہ دینا شرعی طور اُتے جایز اے؟ کیہ زکوٰۃ دے پیسے نال انتظامی اخراجات کرنا جایز اے؟ کیہ محکما زکوۃ دا بنایا گیا قانون شریعت توں متصادم نہیں۔ چیف جسٹس نے ریمارکس دِتے کہ مزاراں دا پیسا اللہ تعالیٰ دی راہ اُتے خرچ کرن لئی ہوندا اے‘ مزاراں دی حالت ویکھ لوو سارے ڈِگن والے نیں‘ سمجھ نہیں آندا اوقاف تے بیت المال دا یسا کتھے خرچ ہوندا اے‘ بیت المال والے کسے نُوں فند نہیں دیندے‘ مزاراں دے پیسے توں افسران کویں تنخاہ لے رہے نیں‘ ڈی جی بیت المال وی زکوۃ فنڈ توں تنخاہ لے رہے نیں۔ جسٹس عمر عطاء بندیال نے ریمارکس دِتے کہ رپورٹ مطابق وفاق نے 9 ارب توں ودھ زکوۃ جمع کیتی‘ مستحقین تک رقم کویں جاندی اے ایہدا کجھ نہیں دَسیا گیا‘ وفاقی حکومت نُوں زکوٰۃ فنڈ دا آڈٹ کروانا چاہیدا اے‘ زکوٰۃ فنڈ دے آڈٹ نال صوبائی خُد مختاری متاثر نہیں ہووے گی۔ چیف جسٹس نے ریمارکس دِتے کہ قرنطینا مراکز وچ مقیم بندیاں توں پیسے لئے جا رہے نیں‘ قرنطینا لئی ہوٹلز دا انتخاب کہناں بنیاداں اُتے کیتا گیا‘ سارے ہوٹلز نُوں قرنطینا بنان دا موقع کیوں نہیں دِتا گیا‘ جہڑے پیسے نہیں دے سکدے اوہناں نُوں مفت قرنطینا وچ منتقل کیتا جانا چاہیدا اے۔ سیکرٹری صحت تنویر قریشی نے عدالت نُوں دَسیا کہ حاجی کیمپ تے پاک چائنہ سینٹرز وچ مفت قرنطینا سہولت اے‘ حاجی کیمپ قرنطینا مرکز نہیں ویکھیا‘ اج ای دورا کر کے سہولتاں دی فرہمی یقینی بناواں گا۔ چیف جسٹس نے ریمارکس دِتے کہ مردان وچ سعودی عرب توں آئے بندے نے کرونا کھلاریا‘ اوہ پینا ڈول کھا کے ائر پورٹ توں نکلیا تے پوری یونین کونسل بند کرنی پئی‘ تفتان دے قرنطینا وچ رہنا وی ڈراؤنا خاب سی۔ حکومت پیسے خرچ کر رہی اے پر نظر کجھ نہیں آ رہیا۔ جسٹس عمر عطاء بندیال نے اِک موقع اُتے ریمارکس دِتے کہ رپورٹ مطابق وفاق نے 9 ارب توں ودھ زکوٰۃ جمع کیتی‘ مستحقین تک رقم کویں جاندی اے ایہدا کجھ نہیں دَسیا گیا‘ وفاقی حکومت نُوں زکوٰۃ فنڈ دا آڈٹ کروانا چاہیدا اے‘ زکوٰۃ فنڈ دے آڈٹ نال صوبائی خُد مختاری متاثر نہیں ہووے گی۔