حکومت دیاں توپاں دا مونہ کرونا دی بجائے ساڈے ول کیوں اے؟ شاہد خاقان عباسی ۔۔۔٭رویل نیوز٭

اسلام آباد (بیورو رپورٹ) مسلم لیگ (ن) دے آگو شاہد خاقان عباسی نے کہیا اے کہ حکومت نے اپنیاں توپاں دا مونہ کرونا وباء نال لڑن دی بجائے اِک واری فیر اپوزیشن ول موڑ دِتا اے‘ نیب دا شہباز شریف دے نال رویا بدنیتی اُتے مبنی اے‘ لاہور ہائیکورٹ تے سپریم کورٹ دے معزز ججز صاحبان وی اپنے فیصلے وچ لکھ چکے نیں شہباز شریف خلاف کوئی کرپشن دا کیس نہیں اے‘ نیب دی کارروائی صرف تے صرف بدنیتی اُتے مبنی اے‘ لیڈر آف دی اپوزیشن نُوں صرف بے عزت کروان لئی ہتک عزت آمیز رویا اختیار کیتا جا رہیا اے‘ چیئرمین نیب‘ وزیراعظم تے اوہناں دے معاون خصوصی جہڑے چمچے بنے ہوئے نیں کیہ اوہ دَس سکدے نیں کہ اوہناں دے اثاثے کیہ نیں؟ شہباز شریف نُوں 5 اکتوبر 2018 نُوں گرفتار کیتا گیا تے 132 دن نیب دی کسٹڈی وچ رہے ایس دوران کیہ تفتیش کیتی گئی‘ پہلے 56 کمپنیاں دا کیس بنایا گیا‘ کجھ نہ مِلیا تے آشیانا کیس بنایا گیا اوہدے وچ وی کجھ نہ ملیا تے اِک گندے نالے دا کیس بنایا گیا اوہدے وچ وی کجھ نہ مِلیا تے فیر آمدن توں ودھ دا کیس بنا دِتا گیا۔ ایہ شہزاد اکبر کون نیں؟ کہڑے ملک توں آئے نیں؟ ایہدا بیک گراؤنڈ کیہ اے کجھ پتا نہیں۔ پیر والے دن مسلم لیگ (ن) دے آگو شاہد خاقان عباسی نے مریم اورنگزیب تے مصدق ملک نال پریس کانفرنس کردیاں ہویاں کہیا کہ ملک ایس ویلے انتہائی نازک دور توں لنگھ رہیا اے‘ حکومت دیاں پالیسیاں انتہائی خطرناک نیں‘ ملک دی معیشت تباہ ہو کے رہ گئی اے‘ حکومت نُوں لوکائی دا بلکل وی خیال نہیں اے جے لوکائی دا خیال نہ کیتا گیا تے انتہائی بھیانک نتیجے ساہمنے آن گے۔