ملکہ برطانیہ دا 94واں جنم دیہاڑ

ملکہ برطانیہ دا 94واں جنم دیہاڑ

راشد محمود بٹ

مقابلے دا اِک امتحان دین توں بعد منڈے سر جوڑی کھڑے سن کہ گورنر جنرل تے صدر وچ کیہ فرق ہوندا اے، کولوں لنگھدے ماسٹر صاحب نے دسیا کہ جہڑے ملک برطانیہ دے قبضے چوں آزادی لے کے اوہدی ریاست بن جان اوتھے برطانیہ دا بادشاہ یا ملکہ ای حاکم ہوندے نین۔ اُنج تے ایہ ناں دے ای حاکم ہوندے پر فیر وی اوس ملک دے وزیراعظم دے مشورے اتے ای کم کر دے نیں۔۔۔ایہناں ملکاں وچ سبھ توں وڈا عہداگورنر جنرل دا ہوندا اے۔ ایہنوں بادشاہ دا ای نمائندا سمجھیا جاندا۔ ساڈا ملک پاکستانوی 1956ء تک ایسی نظام دے تھلے رہیا، تے اسیں آکھ سکدے آں کہ اَزادی دے بعدوں وی بادشاہ جارج ہشتم تے فیر اوہدی دِھی ملکہ ایلزبتھ ساڈے حاکم رہے۔ 56ء وچ اسیں اوہناں کولوں پکی خلاصی لئی پورے جمہوریہ ہو گئے تے گورنر جنرل دے تھاں صدر آ گئے۔ انڈیا نے ایہ کم ساڈے توں پہلے 1950ء وچ کر لیا۔ اج وی آسٹریلیا، کینیڈا، نیوزی لینڈ تاج برطانیہ نوں مندے نیں تے اوتھے اج وی گورنر جنرل ای ہوندے نیں۔ آزادی توں پہلوں اے برطانیہ دے وزیراعظم دے مشورے اُتے آندے، تے آزادی توں بعد آزاد ملک دے وزیراعظم دے مشورے اتے۔ ایہی فرق سی گورنر جنرل تے صدر وچ۔

ہن گل ہو جائے ساڈی اَخیرلی برطانوی ملکہ دی جہناں دا اج 94نواں جنم دیہاڑ اے۔ اوہناں نوں برطانیہ دا تخت سنبھالے فروری وچ 68 ورے ہو گئے نیں۔ اوہ برطانوی توریخ وچ سبھ توں چوکھا ویلا تخت تے رہے۔ 21 اپریل 1926ء نوں جدوں ایلزبتھ دا جمن ہویا، برطانوی تخت تے اوہدے دادا جارج پنجم بیٹھے سن۔ جارج توں بعد اوہدے وڈے منڈے ایڈورڈ دی واری آئی جہڑا 1936ء وچ بادشاہ بنیا، پر اوہدے اک امریکن سوانی نال عشق پاروں اوہنوں تخت چھڈنا پیا تے انج واری ایلزبتھ دے پیو جارج ششم دی آئی۔ پندرھاں ورھیاں مگروں فروری 1952ء اچ اوہدی مرگ توں بعد تخت برطانیہ ایلزبتھ دے ناویں آیا۔ اوس ویلے برطانیہ دے وزیراعظم اعظم ونسٹن چرچل، پاکستان دے خواجا ناظم الدین تے انڈیا دے وزیراعظم جواہر لعل نہرو سن۔ امریکہ دے صدر ہیری ایس ٹرومین سن۔

اج اوہ تیرھاں برطانوی وزیراعظم بھگتا چکیاں نے تے چودھواں چل رہیا اے۔ ملکہ دا جنم دیہاڑ برطانیہ وچ سرکاری طور تے جون وچ "ٹروپنگ آف کلرز" دے ناں نال منایا جاندا، جہڑا ایس ورھے کرونا پاروں روک دتا گیا اے۔ملکہ برطانیہ اگر 4 سال اور تخت برطانیہ تے رہندے نیں تے اوہ دنیا دی تواریخ وچ سبھ توں لمی حکومت دا اعزاز اپنے ناں کر لیں گے۔ برطانوی تاریخ وچ سبھ توں لمی حکمرانی دا اعزاز ملکہ وکٹوریہ نوں سی، جہڑا اوہناں نے 2015ء وچ توڑ دتا۔

برطانیہ اچ جہڑا بندہ وی 100 سال دی عمر نوں اپڑ دا اے، اوہنوں ملکہ ولوں خاص پَترملدا اے۔ ملکہ ایلزبتھ نوں ایہ اعزاز وی حاصل اے اوہناں اگست سن 2000ء وچ ایہ پتر اپنی امی نوں وی گھلیا جہڑے اودوں سو ورھیاں دے ہوئے سن، ہن اگلے سال جون وچ ایلزبتھ دے خاوند پرنس فلپ سو ورھیاں دے ہو رہے نیں، ہن ویکھنا ایہ وے کہ کیہ اوہ اے پَتر اپنے خاوند نوں وی گھلن گے تے 2026ء تیکر اپنے آپ نوں پَتر بھیجن لئی موجود ہون گے؟؟؟