ماپیاں دا دین کوئی نہیں دے سکدا۔۔۔۔۔

ماپیاں دا دین کوئی نہیں دے سکدا۔۔۔۔

شیخ محمد انور

باپ مرے سر ننگا ہوندا، وِیر مرے کنڈ خالی

ماواں بعد محمد بخشاؒ کون کرے رکھوالی

ماں پیو بہت انمول نیں۔ رب دا حکم اے کہ اوہناں نوں اُف تیکر نہ آکھو، رے میرے رب ایہناں دوہاں اُتے رحم فرما جویں اوہناں مینوں بچپن وچ محبت تے شفقت نال پالیا سی۔ قرآن پاک وچ اللہ تعالی نے 5 واری اللہ دے حق بعد ماں پیو دے حقوق دا ذکر کیتا اے۔ اللہ رب العزت نے فرمایا کہ اوہدے سوا کسے دی بندگی نہ کرو تے ماں پیو نال نیک سلوک کرو۔ شکر ادا کرو میرا وی تے ماں پیو دا وی جے تہاڈے کول ماں پیوں وچوں کوئی وی بڈھاپے دی عمر تیکر اپڑ گیا تے کدے اوہناں دا دل نہ دکھاو تے کدے اوہناں نوں اُف تیکر نہ آکھنا۔ کدے چھاتی چوڑی کرکے اوہناں نال گل بات نہ کرنا۔ موڈھے نِویں کرکے گل کرنا، ادب نال گل کرنا۔ انسان جدوں دنیا اتے آوندا اے تے بہت سارے رشتے اوہدے دوالے ہوندے نیں تے اوہ سبھ رشتے ویلے دے نال نال مک جاندے نیں پر اک رشتا جہڑا مردے دم تیک انسان دے نال رہندا اے اوہ رشتا ماں پیو دا رشتا ہوندا اے۔ ماں تے اوہ ہستی اے جہدے جذبیاں تے محبت وچ کوئی ملاوٹ نہیں ہوندی۔ ماں بغیر ایہ دنیا ادھوری اے۔بچا جدوں جمدا اے تے جس رشتے نال اوہ سبھ توں پہلاں ملدا اے اوہ ماں دا رشتا ہوندا اے۔ ماں اپنی اولاد دی خشی وچ سبھ توں ودھ خش تے دکھ وچ سبھ توں ودھ دکھی ہوندی اے۔ ماں دی عظمت اتے کجھ لکھنا سمندر نوں کوزے وچ بند کرن برابر اے۔ ماں شفقت، خلوص، بے لوث محبت تے قربانی دا دوجا ناں اے۔ ماں دنیا دی اوہ عظیم ہستی اے جہنوں سوچدے ای اک محبت، ٹھنڈ، پیار تے سکون دا احساس ہوندا اے۔ اوہدا پرچھاواں ساڈے لئی ٹھنڈی چھاں وانگ ہوندا اے۔ شدید دھپ وچ اوہدے ولوں شفقت دا ہتھ رُکھ دی چھاں وانگ سائبان بن کے اولاد نوں سکون دا احساس دواندا اے۔ ماں توں ودھ پیار کرن والی ہستی دنیا وچ پیدا ای نہیں ہوئی۔ انھیری چلے یاں طوفان آوے ماں دی محبت وچ کدے کمی نہیں آوندی۔ اوہ نہ ای کدے احسان جتاندی اے تے نہ اپنیاں محبتاں دا صلا منگدی اے سگوں بے غرض ہو کے اپنی محبت اولاد اتے نچھاور کردی رہندی اے۔ ایہ حقیقت اے کہ ماں دی محبت نوں لفظاں وچ نہیں پرویا جاسکدا۔ دنیا دا ہر مذہب تے ہر تہذیب ماں نوں مقدس تے عظیم قرار دیندا اے۔ دنیا وچ سبھ توں ودھ بدقسمت اوہ اے جہڑا ماں دی قدر نہ کرسکیا۔ ماں دی قدر تے اوہناں کولوں پچھوں جہناں دی قسمت وچ ماں دی محبت تے شفقت بھری چھاں نہیں اے۔ میں جے میں اتے ساری حیاتی لکھاں تے حیاتی گھٹ پے جاوے۔ میری ماں! جہنے مینوں ایس قابل بنایا، رب کدے کسے نوں اپنی ایس عظیم نعمت توں محروم نہ کرے تے دنیا وچ سبھ ماواں نوں سلامت رکھے تاں جے ایہ دنیا ہمیشا سوہنی رہوے۔ آمین، میرے رب میرے ماں پیو اتے رحم فرما کہ جدوں میں نکا ساں اوہناں میری پرورش کیتی۔ اج جدوں میں ایہ گلاں سُندا ہاں تے خوف زدا ہوجانا ہاں۔ کجھ سمجھ نہیں آوندی کہ میں تے اپنے ماں پیو دا حق ادا ای نہیں کیتا۔ میرے نال میدان حشر وچ کیہ سلوک ہووے گا۔ ایہ خوف دن بدن ودھدا جارہیا اے زندگی وچ کئی واری سوچیا کہ ماں پیو دے حوالے نال لکھاں پر کدے لکھ نہ سکیا کیوں کہ اوہناں دی شان وچ لکھن دا نہ مینوں انداز آوندا اے تے نہ میرے لوک الفاظ نیں تے نہ کوئی انج دا کارناما جہنوں اپنی تحریر بنا سکاں۔ اج جدوں میری ماں دی برسی نیڑے آرہی اے تے میں بڑی ہمت نال قلم نوں سہارا بنایا اے۔ میں تے اج آکھدا ہاں کہ جہدے ماں پیو جیوندے نیں اوہناں دی قدر کرن۔ کیوں کہ جدوں اوہ ٹر جاندے نیں تے دنیا انھیری ہوجاندی اے تے فیر اوہناں نوں ملن لئی قبرستان جانا پیندا اے۔ میں ایہ سوچدا ہان کہ میری ماں دنیا دی عظیم ترین ماں سی۔ ماں اوس ہستی دا ناں اے جہدا نعم البدل ایس دنیا وچ ممکن ای نہیں اے کیوں جے جدوں وی کوئی بچا ایس دنیا وچ آوندا اے تے اک انمول شخصیت اوہنوں اپنی جھولی وچ سمیٹ کے اوہدے اتھرو اپنیاں پلکاں نال چن لیندی اے۔ ایہ عظیم شخصیت رب ولوں اولاد لئی اک انمول تحفا اے۔ ماں دا وجود انسان نوں ہر ازمایش نال نبڑن لئی حوصلا تے ہمت دیندا اے۔ ماں ہر چنگے بھیڑے حالات وچ اپنی اولاد دا ساتھ دیندی اے۔ بھیڑے کماں توں روکدی اے تے چنگے کم کرن دی تلقین کردی اے۔ جس قدر ماں اپنی اولاد اتے شفقت دا ہتھ رکھدی اے ایس دنیا وچ کوئی رکھ ای نہیں سکدا۔ ماں دی دعا ہزاراں اوکڑاں تے پریشانیاں توں بچن دا وسیلا ہوندی اے۔ ماں ایسی ہستی اے جہدے بغیر کاینات دی کوئی جاندار شے مکمل نہیں ہوسکدے۔ ماں پیو اللہ رب العزت دی انج دے بے پایاں نعمت نیں جہدا نعم البدل گھٹو گھٹ ایس دنیا دی زندگی وچ ممکن ای نہیں اے۔ ماں پیو دی موجودگی انسان لئی بہت سارے غماں توں نجات دا پروانا ہوندی اے۔ خاص کر ماں دیاں دعاواں انسان لئی خیر تے برکت تے پریشانیاں توں نجات دا اہم ترین ذریعا ہوندیاں نیں۔ اج الحمد اللہ سانوں سبھ بھین بھراواں نوں اللہ تعالی نے دنیا دی ہر نعمت توں نوازیا اے جے ساڈے کول کسے شے دی کمی اے تے اوہ صرف ماں پیو دی کمی اے جہڑی کدے پوری نہیں ہوسکدی۔ میں جدوں پہلی واری رمضان المبارک وچ بیت اللہ دا سفر کیتا تے جان توں پہلاں ابا جی کولوں پچھیا ابا جی بیت اللہ نوں پہلی واری ویکھدے ہوئے پہلی دعا کیہ منگنی چاہیدی اے تے اوہناں مینوں کیہ خوب دعا دسی کہ میں تے تیری ماں نے جدوں 1973 وچ حج کیتا سی تے پہلی واری بیت اللہ نوں ویکھدے ہوئے دعا منگی سی کہ میری اولاد دی اولاد میری زندگی وچ تیرے گھر نوں ویکھ سکے تے رب دا کرنا انجے ہویا کہ اوہناں دے سارے دھی پُتراں اوہناں دی حیاتی وچ بیت اللہ دا سفر کیتا۔

ماں دیاں دعاواں وچ بڑی تاثیر اے۔ ایس کائنات وچ ذات باری تعالی بعد یعنی خالق کاینات بعد جے کسے وی انسان دی ہمدرد ترین تے نیڑے شخصیت ہوئی ہوسکدی اے تے اوہ صرف ماں اے۔ حدیث شریف وچ وی اے کہ صحابی رسولؐ نے نبی پاکؐ توں دریافت کیتا کہ میرے اُتے سبھ توں ودھ حق کس دا اے؟ تے آپؐ نے فرمایا، تیری ماں دا، دوجی واری فیر صحابی نے ایہو سوال کیتا آپؐ نے فرمایا تیری ماں دا، تیجی واری فیر صحابی نے ایہو سوال دہرایا آپؐ نے فیر فرمایا تیری ماں دا۔ جدوں چوتھی واری صحابی نے فیر پچھیا کہ میرے اُتے سبھ توں ودھ حق کس دا اتے تے آپؐ نے فرمایا ”تیرے پیو دا“۔ ماں دی خدمت تے اطاعت جنت وچ جان دا وسیلا اے ایس لئی آکھیا گیا کہ جنت ماں دے پیراں ہیٹھ اے۔ جہاد اک ایسا عمل اے جہدے پاروں جنت وچ داخل ہونا لازم ہوجاندا اے پر حضورؐ نے فرمایا جہاد اُتے جان دی بجائے ماں کول رہ کے ایہدے خدمت کیتی جاوے تے وی انسان جنت وچ داخل ہووے گا۔ ماں دا رشتا ایسا بے لوث رشتا اے جہیڑا یس محبت دے بدلے اولاد توں کجھ نہیں منگدا۔ میری سبھ توں وڈی ڈھال میری ماں سی اج اسیں جو وی ہاں اوہناں دیاں دعاواں پاروں ہاں۔ اوہناں دیاں دعاواں ساڈیاں سبھ مشکلاں تے پریشانیاں دور کردیندیاں سن۔ جے میں آکھاں کہ اوہناں دی حیاتی وچ پریشانیاں دا ساہمنا ای نہیں کرنا پیا سی تے ایہدے وچ کوئی شُبھا نہیں۔ میں ایہ آکھدا ہاں کہ جہناں دی ماں جیوندی اے اوہناں نوں اج قدر کرلینی چاہیدی اے نہیں تے فیر صرف پچھتاوا رہوے گا۔ جدوں وی اوہناں دے ایس دُنیا توں چلانا کرجان دا مہینا تے دیہاڑ آوندا اتے میرے اتے عجیب کیفیت طاری ہوجاندی اے جویں سبھ کجھ ہوندے ہوئے وی میرے کول کجھ نہیں اے۔ میرے کول کوئی قیمتی اثاثا سی جہڑا کُھس گیا اے۔ ہن صرف اِکو دعا اے اللہ توں میرے ماں پیو اُتے رحم فرما جویں اوہناں میرے بچپن وچ میرے اُتے رحم فرمایا۔

٭٭٭٭٭