پاک فوج قومی قومی اداریاں دے نال رَل کے تعاون جاری رکھے گی: آئی ایس پی آر۔۔۔۔ ٭رویل نیوز٭

راولپنڈی (نمائندا رویل) آرمی چیف جنرل قمر جاوید باجوا نے کہیا اے کہ کرونا وباء دے اقتصادی‘ صحت تے سماجی اثرات دا جایزا لینا ضروری اے۔ پاک فوج قومی قومی اداریاں دے نال رَل کے تعاون جاری رکھے گی۔ آئی ایس پی آر دے مطابق آرمی چیف جنرل قمر جاوید باجوا نے نیشنل کمانڈ اینڈ اپریشن سینٹر دا دورا کیتا جتھے لیفٹیننٹ جنرل حمود الزمان نے اوہناں دا استقبال کیتا۔ آرمی چیف نُوں نیشنل کمانڈ اینڈ اپریشن سینٹر وچ ڈی جی اپریشنز اینڈ پلاننگ میجر جنرل آصف محمود نے قومی رابطا کمیٹی دے فیصلیاں تے عملدرآمد بارے بریفنگ دِتی تے وباء دے اثرات اُتے قابو لئی سول انتظامیا نال تعاون توں اگاہ کیتا جد کہ ٹیسٹ‘ ٹریس تے قرنطینا لئی قومی حکمت عملی بارے دَسیا گیا۔ ایس موقع اُتے گلبات کردیاں ہویاں آرمی چیف جنرل قمر جاوید باجوا دا کہنا سی کہ پاک فوج سرے قومی اداریاں نال رَل کے لوکائی دی سہولت لئی تعاون جاری رکھے گی۔ آرمی چیف نے کرونا وباء بارے نیشنل کمانڈ اینڈ اپریشن سینٹر دیاں کاوشاں دی تعریف کردیاں ہویاں کہیا کہ محدود وسایل تے گھٹ ویلے دے باوجود ایس قومی ادارے دی کمکاری بہترین رہی۔ پاک فوج دے شعبا تعلقات عاما دے مطابق آرمی چیف دا کہنا سی کہ سول‘ ملٹری‘ مربوط رابطیاں لئی این سی او سی دا کردار تحسین جوگ اے۔ پر وباء دے اقتصادی‘ صحت تے سماجی اثرات دا جایزا ضروری اے۔ اوہناں دا کہنا سی کہ پاک فوج قومی اداریاں دے نال بھرواں تعاون جاری رکھے گی۔ رمضان المبارک دے اہم موقع اُتے وی کرونا وایرس دی وباء نال نبڑن لئی تعاون جاری رکھیا جاوے گا۔ اوہناں نے کہیا کہ وسایل دے بہترین استعمال نال معاشی تے سماجی اوکڑاں اُتے قابو پایا جا سکدا اے۔ آرمی چیف نے کہیا کہ صحت دیاں اوکڑاں تے کرونا کھلار دے رسل دا مسلسل جایزا لین دی ضرورت اے۔ پاک فوج مشکل دی گھڑی وچ خاص طور اُتے رمضان وچ لوکائی دی سہولت لئی کم کردی رہوے گی۔