پنجاب سرکار دا اِک ہور چنگا کم،مال جمع کر کے لُٹ مار کرن والیاں نوں کرڑیاں سزاواں دین دا قانون بن گیا۔۔۔۔ ٭رویل نیوز٭

لاہور ((نمائندا رویل))پنجاب سرکار نے اِک ہور وڈا اقدام چُکدیاں ہویاں پنجاب پری وینشن آف ہورڈنگ آرڈیننس 2020 دا گزٹ نوٹیفکیشن جاری کر دِتا اے۔ آرڈیننس دے تحت ذخیرا اندوزاں نُوں 3 سال قید تک دی سزا دِتی جا سکے گی‘ ضبط کیتیاں جان والیاں شیواں دی 50 فیصد رقم قومی خزانے وچ جمع ہووے گی‘ آرڈیننس دے تحت متعلقا افسر معلومات دی بناء اُتے کسے ڈیلر دے گودام بغیر وارنٹ چیک کر سکد ااے۔ ڈیلر اپنی پیداوار‘ ایکسپورٹ‘ امپورٹ‘ سٹاک‘ سیلز تے ڈسٹری بیوشن دے حوالے توں ریکارڈ متعلقا افسر دے کول جمع کروان دا پابند ہووے گا۔ وزیر اعلا عثمان بزدار دا کہنا اے کہ پنجاب سرکار نے ذخیرا اندوزی کر کے مصنوعی بحران پیدا کرن والیاں دے خلاف سخت ایکشن لین لئی آرڈیننس جاری کیتا اے۔ دوائیاں‘ آٹا‘ کھنڈ‘ دالاں‘ چاء‘ خوردنی تیل‘ مچھی‘ آنڈے‘ دُدھ‘ گوشت‘ فیس ماسک‘ سینی ٹائزر‘ سرجیکل ماسک‘ کھاد بنان دا کیمیکل‘ زرعی دوائیاں‘ آلو‘ گنڈھیاں سنے 41 لوڑی دیاں شیواں ذخیرا کرن والیاں دے خلاف کارروائی ہووے گی۔ ذخیرا اندوزاں دے بارے وچ معلومات فراہم کرن والے نُوں قومی خزانے وچ جمع ہون والی رقم دا 10 فیصد دِتا جاوے گا۔ آرڈیننس دے تحت ذخیرا اندوزی دا جرم ناقابل ضمانت ہووے گا۔ وزیر اعلا عثمان بزدار نے کہیا کہ ذخیرا اندوزی کرن والے لوکائی دے دشمن نیں‘ صوبے وچ ذخیرا اندوزاں دے خلاف بلا امتیاز کریک ڈاؤن ہووے گا‘ لوکائی دا مفاد سبھ توں ودھ عزیز اے۔ وزیر اعلا عثمان بزدار نے کہیا کہ لوڑی دیاں شیواں ذخیرا کر کے مصنوعی مہنگائی پید اکرن دی کسے صورت اجازت نہیں دِتی جا سکدی۔ وزیر اعلا عثمان بزدار نے سرکاری فرضاں وچ غفلت تے ناقص کمکاری اُتے اِک ہور سخت ایکشن لیندیاں ہویاں محکما آبپاشی ہیڈ بلوکی دے ایکسین نُوں معط کرن دا حکم دِتا اے۔ وزیر اعلا دا کہنا اے کہ عوامی فلاح دے منصوبیاں وچ بلکل دیر برداشت نہیں کراں گا‘ سرکاری امور وچ غفلت یاں کوتاہی دی کوئی گنجایش نہیں‘ افسران ڈلیور کرن تے عوامی فلاح عاما دے منصوبیاں نُوں ویلے اُتے مکمل کیتا جاوے‘ جہڑا نتیجے نہیں دیوے گا اوہ پنجاب وچ نہیں رہوے گا‘ دیانتدار تے فرض شناس افسراں دی حوصلا افزائی جاری رکھاں گے‘