کرونا کیس، دُنیا نوں کیوں انجان رکھیا،چین خلاف  مقدمے۔۔۔۔ ٭رویل نیوز٭

جیفرسن سٹی (اُچیچا نمائندا رویل) امریکی ریاست میسوری نے چین خلاف کرونا وایرس بارے ناکافی معلومات دین اُتے ملک دی وفاقی عدالت وچ مقدما دایر کر دِتا۔ عالمی خبر رساں ادارے دے مطابق امریکی ریاست میسوری دے اٹارنی جنرل نے ملک دی فیڈرل کورٹ وچ چین خلاف اِک مقدما دایر کیتا اے جہدے وچ چین اُتے کرونا وایرس بارے اہم تے ضروری معلومات نُوں لُکاون دا الزام لایا گیا اے۔ ریاست میسوری ولوں دایر مقدمے وچ کہیا گیا اے کہ چین نے کرونا وایرس بارے اہم معلومات نُوں دنیا توں لُکایا اے خصوصی طور اُتے وزیراس دے انسان توں انسان وچ منتقل ہون دا نہ دَس کے دنیا نُوں خوفناک وباء دی اگ وچ سُٹ دِتا تے عالمی ادارے نُوں وی ایس عفریت توں دیر نال اگاہ کیتا۔ درخاست وچ ایہ وی دعوا کیتا گیا اے کہ چین نے ووہان وچ اِک وڈی تقریب رکھی جہدے وچ 4 ہزار توں ودھ بندیاں نے رلت کیتی تے فیر ایہناں بندیاں نُوں ہور ملکاں وچ گھل دِتا گیا جہدے نال ایہ وایرس تیزی نال دنیا وچ کھلریا جد کہ چین نے وایرس دے بارے وچ دَسن والیاں نُوں چُپ کروا دِتا‘ اوہناں نُوں ایہدے اُتے ضرور کارروائی دا ساہمنا کرنا پوے گا۔ امریکی ریاست ولوں دایر مقدمے وچ چین دی حکومت‘ کمیونسٹ پارٹی‘ چینی حکام تے اداریاں نُوں فریق بنایا گیا اے۔ ایس توں پہلے کئی امریکی تاجر وی چین خلاف انج دے ای مقدمے دایر کر چکے نیں۔