نظم

اوہدے متھے چن دا ٹکا

کنیں چمکن تارے

اوہدے تکھےنک دا کوکا

دُوروں لشکاں مارے

اوہدیاں گلھاں دُدھوں چٹیاں

جوں مکھن دا پیڑا

پتھر وانگ کھلو رہندا اے

اوہنوں ویکھے جیہڑا

اوہدے لہو دی گرمی کولوں

سورج وی گھبراوے

اوہدی زلف دے کنڈل کولوں

سپنی وی ڈر جاوے

اوہدیاں بلھیاں رس ملائی

لوکی ویکھ کے ترسن

اوہدا جُوڑا کھل جاوے تے

بدل مینہ دے برسن

اوہدا پنڈا شیشے ورگا

انگ انگ مارے جھاتی

بوتل ورگے لک دے اُتے

پیلاں پاندی جھاتی

اوہدیاں بانہوواں صندل جہیاں

جوں ریشم دے دھاگے

اوہدے مکھ دا چانن ویکھن

پریاں دے گھر جاگے

کالے رنگ دی کرتی اندر

گوریاں گوریاں بانہواں

رات تے دن نوں کٹھیاں ویکھ کے

کدھرے مر نہ جاواں

اوہدیاں بلھیاں کھڑیاں کھڑیاں

جوں باگاں دیاں کلیاں

اوہدیاں باتاں مٹھیاں مٹھیاں

جوں مصری دیاں ڈلیاں

اوہ بولے تے انج لگدا اے

جھانجھر کوئی چھنکاوے

ساہ وی لوے تے اوہدی خشبو

رُتاں نوں مہکاوے

اوہدا پِنڈا پارے وانگوں

ایدھر اودھر نَسے

اوہدے تن دا اک اک حصا

ساڈے من وچ وسے

اوہدا روپ قیامت یارو

کتھوں کتھوں کجاں

اوہ دارو دا جام نشیلا

پی پی کے نہ رجاں ۔۔۔۔۔۔۔۔۔۔۔۔!