سارک دیساں دا  کرونا وایرس ورودھ اِک مِک ہو کے کم کرن دا وڈافیصلا.....٭رویل نیوز٭

اسلام آباد (نیوز ڈیسک) سارک ملکاں نے کرونا وایرس دے حوالے توں صحت دے شعبے وچ تعاون ودھان تے وباء نال مقابلا کرن لئی رَل کے کم کرن اُتے اتفاق کیتا اے۔ پاکستان نے سارک وزرا ء صحت دی ویڈیو کانفرنس دا اہتمام کیتا جہدی صدارت وزیراعظم دے معاون خصوصی برائے صحت ڈاکٹر ظفر مرزا نے کیتی۔ سارک ملکاں دے وزراء صحت تے صحت دے شعبے دے متعلقا سینیٹر آفیشلز نے وی اجلاس وچ رلت کیتی۔ سارک ملکاں نے پاکستان دے ایس اقدام نُوں سلاہیا تے شعبا صحت تے خاص طور اُتے کرونا وایرس دی وباء دے تعاون اُتے اتفاق کیتا۔ اجلاس وچ سارک ملکاں نے کرونا وایرس دے حوالے توں اپنے اپنے تجربیاں توں اگاہ کیتا۔ سارے ملکاں نے صحت دے شعبے وچ تعاون ودھان تے کرونا وایرس دی وباء نال مقابلا کرن لئی رل کے کم کر ن اُتے اتفاق کیتا۔ ڈاکٹر ظفر مرزا نے کرونا وایرس نال نبڑن لئی پاکستان سرکار دے اقدامات تے پاکستان دیاں سارک کوششاں تے نیشنل ایکشن پلان توں وی اگاہ کیتا۔ اوہناں دا کہنا سی کہ عمران خان دی اگوائی وچ قومی رابطا کمیٹی کرونا وایرس دے خلاف سرگرم عمل اے۔ پاکستان سمارٹ لاک ڈاؤن دی حکمت عملی اُتے کم کر رہیا اے تاں جے بیماری دے بچاء د ے نال نال معیشت دے منفی اثرات توں وی بچیا جا سکے۔ اوہناں دا کہنا سی کہ کرونا وایرس اِک عالمی وباء اے جہدے اثرات دو ر رس نیں۔ ڈاکٹر ظفر مرزا نے سارک چارٹر دے تحت صحت دے شعبے وچ ٹیکنیکل کمیٹی نُوں فعال کرن دی ضرورت اُتے زور دِتا تے کہیا کہ کرونا وایرس نال مقابلا کرن لئی علاقائی تعاون نہایت اہم اے۔