مئی دے اَدھ توں ہور اوکھا ویلا شروع ہو جائے گا٭جے لوکائی نے خُد نوں گھر تک محدود نہ کیتا تاں روگیاں نوں سنبھالیا نہیں جا سکنا:وزیر اعظم  عمران خان.....٭رویل نیوز٭

اسلام آباد (نیوز ڈیسک) وزیراعظم عمران خان نے لوکائی توں اپیل کیتی اے کہ کرونا وایرس تیزی نال کھلر رہیا اے‘ ایس صورتحال وچ سانوں ساریاں نُوں اِک مُٹھ ہون دی ضرورت اے‘ مئی دے ادھ توں ساڈا مشکل ویلا شروع ہووے گا‘ 3`4 فیصد روگی جہناں نُوں صحت دے ہور مسئلے نیں اوہناں لئی دشواری ہو سکدی اے۔ اگلے ہفتے ملک وچ کرونا وایرس دے 15 ہزار کیسز ہو سکدے نیں۔ کرونا وایرس نال متاثرا بندیاں لئی جاری ملکی تواریخ دی سبھ توں وڈی ”احساس ٹیلی تھون“ دی خصوصی نشریات وچ خطاب تے مختلف سوالاں دا جواب دیندیاں ہویاں وزیراعظم دا کہنا سی کہ وبائی روگ دے ماہرین سارے ڈیٹا دا جایزا لیندے نیں اوہناں نے اندازا لایا سی کہ اپریل دے آخر تک 50 ہزار کیسز ہو سکدے نیں پر اللہ دا شکر اے کہ حالے تک کیس اوس تیزی نال نہیں کھلرے۔ اوہناں دا کہنا سی کہ 15 مئی تک سانوں روگی سنبھالن وچ مشکل نہیں ہووے گی تے ایہدے بعد جے روگیاں دی گنتی وچ تیزی نال وادھا ہویا تے مسئلیاں دا ساہمنا ہو سکدا اے۔ ایس لئی سانوں ہر ممکن احتیاط کرنی پوے گی‘ ایہدے نال نال ساڈی استعداد وچ وادھا ہووے گا۔ صدر ٹرمپ نے وی فون اُتے گل کردیاں وہیاں پاکستان نُوں وینٹی لیٹر دین دی پیشکش کیتی اے۔ وزیراعظم نے کہیا کہ پاور سیکٹر ساڈا سبھ توں وڈا مسئلا اے۔ سانوں موقع مل گیا اے کہ بجلی تے گیس دے معاہدیاں اُتے نظرثانی کیتی جاوے۔ بجلی تے گیس دیاں قیمتاں گھٹ کر دواں گے تے لوکائی تے صنعتاں نُوں ا یہدا فایدا پہنچے گا۔ وزیراعظم پاکستان عمران خان نے کہیا کہ پوری قوم نُوں رَل کے کرونا وایرس دا مقابلا کرنا پوے گا تے ٹیلی تھون دا مقصد لاک ڈاؤن نال متاثرہون والیاں دی مدد کرنا اے۔ کرونا وایر س دے کارن ہون والے لاک ڈاؤن دے اثرات حالے آن گے۔ دنیا وچ ایس تیزی نال کھلرن والا وایرس کدی پہلے نہیں آیا۔ کرونا وایرس نال متاثرا بندیاں لئی فنڈ اکٹھا کرن دے حوالے توں پاکستان دی سبھ توں وڈی احساس ٹیلی تھون نشریات نال گلات کردیاں وہیاں اوہناں دا کہنا سی کہ اللہ دی سبھ توں وڈی نعمت جے تہانوں سمجھ آ جاوے کہ جدوں اللہ دی راہ وچ دیندے اوتے کدی وی انسان کسارے وچ نہیں رہندا ہمیشا اللہ تہانوں دلی سکون دیندا اے۔ وزیراعظم دا کہنا سی کہ کجھ نہیں کَہ سکدے جے مکمل لاک ڈاؤن وی کر دیے تے کرونا ختم ہو جاوے گا‘ ہُن سانوں سمارٹ لاک داؤن ول جانا پاوے گا‘ ایہدی وجھا توں ہر تھاں اُتے لوک متاثر نیں۔ ہُن ہولی ہولی کاروبار شروع ہووے گا۔ ہُن تے سمارٹ لاک ڈاؤن مغرب دے اندر وی شروع ہو گیا اے۔ اِک سوال دے جواب وچ اوہناں دا کہنا سی کہ احساس پروگرام ورگا شفاف کوئی وی پروگرام نہیں ہویا‘ ہُن تک 13 کروڑ لوکاں نے ایس پروگرام وچ اپلائی کیتا اے۔ اوہناں نے دَسیا کہ احساس پروگرام وچ سبھ توں ودھ پیسا سندھ وچ دِتا گیا‘ 12 ہزار رُپئے مکمل تصدیق دے بعد دِتے جاندے نیں‘ ایس پروگرام وچ کوئی سیاسی مداخلت نہیں اے‘ پاکستان وچ 75 فیصد مزدور رجسٹر ای نہیں‘ اوہناں تک پہنچنا اے۔ اِک اہم سوال دے جواب دیندیاں ہویاں وزیراعظم نے کہیا کہ اسنوں پتا اے جو مرضی کر لئیے لوکاں نے رمضان المبارک وچ نماز لئی مسیتاں وچ جانا اے۔ پورا لاک ڈاؤن وی کر دیے تے ایہ کرونا رُک نہیں سکدا‘ سانوں ایہدے نال رہنا پوے گا‘ ایہنے کھلرنا اے۔ جدوں فیصلے ایلیٹ کلاس لئی کراں گے تے غلطیاں کراں گے‘ ایہ ایہو جہیا وایرس اے جہڑا کسے وچ فرق نہیں کرے گا۔ 70 سال توں ایلیٹ کلاس لئی فیصلے ہوندے نیں‘ ہیٹھلے طبقے دی فکر نہیں کیتی جاندی۔ لاک ڈاؤن بارے ڈاکٹراں دے تحفظات بارے گل کردیاں ہویاں وزیراعظم نے کہیا کہ اوہناں دیاں گلاں میں سمجھدا آں‘ کرونا واریس دے خلاف جنگ وچ قوم نُوں ذمے داری ادا کرنی پوے گی۔ جدوں لوک مسیتاں وچ جان گے تے ایہ رسک اے پر حکومت ڈنڈے مار کے سبھ کجھ نہیں کر سکدی‘ قوم نُوں اپنا کردار ادا کرنا پوے گا۔ اپوزیشن نُوں نال رلان بارے سوال دے جواب وچ وزیراعظم دا کہنا سی کہ مینوں خطرا اے کہ اوہناں نُوں نال رلا لیا تے کدھرے فنڈز ای ڈراپ نہ ہو جان۔