ہر اوکڑ وچ لوکائی دے نال آں،لوکائی دے حقاں دی راکھی کراں گے:سردار عثمان بزدار   .....٭رویل نیوز٭

لاہور (اُچیچا نمائندا) وزیر اعلا پنجاب سردار عثمان بزدار نے کہیا اے کہ سماجی دوری تحفظ دی ضامن اے۔ کرونا دی وجھا توں آن والیاں تبدیلیاں اُتے پوری نظر اے‘ کھلار روکن لئی گھراں وچ رہنا بہت ضروری اے‘ آن والے ویلے وچ شہریاں نُوں ہور احتیاط دی ضرورت اے‘ سماجی فاصلے برقرار رکھن نال کرونا توں تحفظ یقینی بنایا جا سکدا اے۔ وزیر اعلا آفس وچ پنجاب یونیورسٹی دے وائس چانسلر ڈاکٹر نیز احمد ولوں یونیورسٹی استاداں تے عملے ولوں چیف منسٹر فنڈ برائے کرونا کنٹرول وچ 30 لکھ رُپئے دا چیک وصول کرن دے موقع اُتے گلبات کردیاں ہویاں وزیر اعلا پنجاب سردار عثمان بزدار نے کہیا کہ پنجاب یونیورسٹی دے استاداں تے عملے دا جذبا ایثار تحسین جوگ اے۔ محروم طبقیاں دی مدد تعریف جوگ اے۔ چیف منسٹر کرونا کنٹرول فنڈ وچ پورے صوبے توں مخیر حضرات‘ کاروباری شخصیات تے ہور شعبا ہائے زندگی دے لوکاں ولوں عطیات تحسین جوگ نیں۔ ایس توں بعد اسلام آباد پہنچن اُتے پنجاب ہاؤس وچ وزیر اعلا پنجاب نال سینیٹر سرفراز بگٹی نے ملاقات کیتی۔ ملاقات وچ عمومی صورتحال تے ملک وچ کرونا دی وجھا توں پیدا ہون والے حالات اُتے وچار وٹاندرا کیتا گیا۔ وزیر اعلا عثمان بزدار نے سینیٹر سرفراز بگٹی نُوں کرونا دے سدباب لئی پنجاب سرکار دے اقدامات توں اگاہ کیتا۔ وزیر اعلا نے کہیا کہ لوکائی نُوں بے یارو مدد گار نہیں چھڈاں گے‘ کرونا دے نال نال خراب معاشی حالات نال وی لڑنا اے۔ انصاف امداد پروگرام دا تیجا مرحلا چھیتی شروع ہو رہیا اے۔ کرونا دے دھرکوواں دا مسلسل جایزا لے کے عوامی مفاد وچ فیصلے کر رہے آں۔ وزیراعظم عمران خان نے حالات دے پیش نظر بہترین پالیسی اپنائی۔ وزیر اعلا عثمان بزدار نے کہیا کہ پنجاب د لوکائی نُوں کرونا توں بچانا ساڈی حکمت عملی دا محور اے۔ پنجاب سراکر نے سبھ توں پہلے کرونا دے دھرُکو دے پیش نظر پیشگی اقدامات دا اغاز کیتا‘ نیک نیتی نال دن رات محنت کر رہے آں‘ انشاء اللہ کرونا اُتے چھیتی قابو پا لواں گے‘ پنجاب سرکار کرونا خلاف جنگ وچ ہور صوبیاں نال تعاون دی پالیسی اُتے عمل پیرا اے۔ایس توں وکھ وزیر اعلا پنجاب سردار عثمان بزدار نے وزیراعظم عمران خان نال وی ملاقات کیتی تے صوبے وچ کرونا وایرس دی صورتحال اُتے بریفنگ دِتی۔ وزیر اعلا پنجاب نے صنعتی عمل دی روانی خصوصن حکومت ولوں کھولیاں جان والیاں صنعتاں وچ حفاظتی تدبیراں نُوں یقینی بنان دے حوایل توں اقدامات بارے وی بریف کیتا‘ دوہاں آگوواں وچکار ذخیرا اندوزی دے تدارک تے رمضان دے مہینے دے حوالے توں کیتے جان والے مختلف اقدامات اُتے وی گلبات کیتی گئی۔