صحت دے شعبے دی بربادی دی ذمے دار سرکار اے:امیر جماعت اسلامی .....٭رویل نیوز٭

لاہور/کوئٹا(نیوز ڈیسک) امیر جماعت اسلامی پاکستان سینیٹر سراج الحق نے کہیا اے کہ موجودا تے پچھلے حکمران ہیلتھ سیکٹر دی تباہی دے ذمے دار نیں‘ حکومتاں اپنے حصے دا کم کردیاں تے اسیں طبی آلات لئی امریکا ول نہ ویکھدے‘ حکومتاں جدوں وی فنڈز قایم کردیاں نیں‘ اوہناں دای ونڈ دا کوئی پتا نہیں لگدا‘ کرونا وایرس دی وجھا توں پوری انسانیت مشکل وچ اے‘ حکومت ولوں جاری رکدا امداد وی حالے تک 25 فیصد متاثرین تک نہیں پہنچ سکی‘ وزیراعظم کرونا وایرس اُتے قابو پان لئی نیشنل ایکشن پلان بناندے تے اج حکومت تے اپوزیشن اِک پیج اُتے ہوندے۔ کشمیر وچ بھارتی فوج کرونا وایرس نُوں اِک ہتھیار دے طور اُتے استعمال کر رہی اے۔ کشمیر وچ مسلسل لاک ڈاؤن تے بھارت وچ ہون والے مظالم اُتے او آئی سی دا اجلاس بلایا جاوے۔ ایہناں خیالاں دا اظہار اوہناں نے ملتان وچ الخدمت فاؤنڈیشن ولوں لائے گئے کرونا ریلیف کیمپ دے دورے دے موقع اُتے میڈیا دے نمایندیاں نال گلبات کردیاں ہویاں کیتا۔ ایس توں وکھ امیر جماعت اسلامی پاکستان سینیٹر سرا ج الحق نے کہیا اے کہ کرونا صورتحال‘ امدادی سرگرمیاں وچ بلوچستان نے 1 کروڑ توں ودھ مالیت دا سامان تے نقدی دی صورت وچ الخدمت بلوچستان دے نال تعاون کر کے اعتماد دا اظہار کیتا جہدے اُتے اسیں اوہناں دے مشکور آں‘ ساڈی خدمت بلا تفریق سارے علاقیاں دے ہر لوڑ وَند تک پہنچے گی‘ مخیر حضرات دے تعاون نال ای اسیں کم وچ ہور وسعت تے بہتری لیا سکدے آں۔ بلوچستان وچ راشن‘ تیار کھانے دی ونڈ‘ جراثیم کش سپرے دا کم پورے صوبے وچ جاری اے‘ مستحقین نُوں راشن تے امداد دیندیاں ہویاں عزت نفس دا خیال ضرور رکھیا جاوے‘ کوشش کرو رات دی تاریکی وچ یاں لوکاں دے گھراں تک راشن پہنچا دوو۔