kraamaat@gmail.com
+ +92 333-430-6384


سانوں اپنے پیاریاں لُٹیا اے


توقیر چغتائی April 24, 2020


سانوں اپنے پیاریاں لُٹیا اے

توقیر چغتائی

پنجابی گیت گاون آلے غیر پنجابیاں دی گنتری ول جھات ماریے تاں ون سونے پلے بیک سنگراں دےناں ویکھ کے حیرت ہوندی اے ۔ رونا لیلیٰ دے گائے ہوئے پنجابی گیت ایس دی سبھ توں وڈی مثال کہی جا سکدی اے جہناں دی ماں بولی "بنگالی" سی پر اوہناں دوجیاں بولیاں وچ وی چوکھے سارے گیت گائے نیں۔ ایس کھیتر وچ ونڈ توں پہلاں تے اُس توں بعد ہور وی چوکھے سارے اجہے ناں مل جاندے نیں جہناں دی ماں بولی پنجابی نہیں سی پر اوہناں نے پنجابی وچ بہت ودھیا گیت گائے ۔ احمد رُشدی وی پاکستان دی فلم انڈسٹری دےاک بہت وڈے پلے بیک سنگر سن جہناں بہت زیادا تاں نہیں پر پنجابی وچ کچھ گیت ضرور گائے سن جہناںوچوں اک دو تاں چوکھے مشہور وی ہوئے ۔ احمد رشدی دا جنم 24 اپریل 1934نوں حیدر آباد دکن دے اک مذہبی گھرانے وچ ہویا سی۔ اوہناں پہلا گیت 1951 وچ اک ہندستانی فلم "عبرت " لئی گایا سی تے مگروں کراچی آ گئے سن ۔ 1954 وچ اوہناں نے ریڈیو پاکستان کراچی توں مہدی ظہیر دا لکھیا ہویا گانا " بندر روڈ سے کیماڑی چلی رے میری گھوڑا گاڑی" گایا تاں اوہناں دی آواز تے گائیکی نوں بہت پسند کیتا گیا۔ مگروں وحید مراد دیاں سپر ہٹ اردوفلماں وچ اوہناں دے گائے ہوئےگانے وی سپر ہٹ ہوئے تے 30 ورھے تیکر اوہ اپنی اواز دے سہارے پاکستانی فلم انڈسٹری تے راج کر دے رہے ۔

1974 وچ پنجابی فلم"منجی کتھے ڈاہواں "ریلیز ہوئی تے منور ظریف دے ودھیا رول دے نال ایس فلم وچ اوہناں تے فلمائے احمد رشدی دے گانے نے ہر پاسے دھماں پا دتیاں۔ بہت گھٹ بندے جاندے نیں پئی ایہ فلم اطہر شاہ خان (جیدی )نے لکھی سی تے ایہدے پروڈیوسر مشہور اداکار قوی خان سن۔ فلم دا مر کزی گانا" میں کیہڑے پاسے جاواں ۔ "میں منجھی کتھے ڈاہواں" احمد رشدی نے ای گایا سی تے ایہہ منور ظریف تے فلمایا گیا سی ۔ پر ایس توں پہلاں 1973 وچ فلم " شادو " ریلیز ہو چکی سی جیہدے گیت خواجہ پرویز نے لکھے سن تے ایہناں گیتاں نوں نذیر علی نے اپنی دھناں نال سجایا سی۔ ایس فلم وچ وی احمد رُشدی نے اک گانا گایا سی جو منور ظریف تے چن چن تے فلمایا گیاسی ۔ گیت دے بول سن" او کتیو میری راہ چوں ہٹ جائو"۔ اِس توں وی دو سال پہلاں وحید مراد دی پنجابی فلم "سیو نی میرا ماہی" آ چکی سی تے بہت مشہور ہوئی سی ۔ اُس فلم وچ وی احمد رُشدی نے نور جہاں نال رل کے حزیں قاری دا لکھیا تے نذیر علی دا کمپوز کیتا اک گیت گایا سی جہدے بول سن"چل چل، جا جا" ایہ گیت عالیہ تے وحید مراد تے فلمایا گیا سی۔ 1976 وچ "سجن کملا "ناں دی فلم بنی تاں ایہدے گیت حزیں قادری نے لکھے تے موسیقی نذیر علی نے بنائی۔ اس فلم دا اک گانا وی وحید مراد تے فلمایا گیا جو احمد رشدی نے گایا سی تے اُس دے بول سن" سانوں اپنے پیاریاں لُٹیا اے" احمد رشدی نوں بہت سارے ایورڈ وی ملے تے اوہناں نوں اپنی فلم انڈسٹری وچ پہلا پوپ سنگر وی آکھیا جاندا اے ۔ پاکستانی فلم انڈسٹری دی ایہ اَوازصرف 49 سال دی عمر وچ 11 اپریل 1983 ہمیشا لئی خاموش ہو گئی تے احمد رشدی نوں کراچی دے اِک گُستان وچ دفن کر دتا گیا ۔

٭٭٭٭٭