قومی بچت سکیماں اُتے منافع دی شرح گھٹ گئی ٭.....٭رویل نیوز٭

اسلام آباد(نمائندا رویل) وفاقی حکومت نے قومی بچت سکیماں اُتے منافع دی شرح وچ 1.60 فیصد توں 5.42 فیصد تک کمی کر دِتی اے۔ محکما قومی بچت نے قومی بچت سکیماں اُتے منافع دی نویں شرح دا اعلان کر دِتا اے جہدا باقاعدا نوٹیفکیشن جاری کر دِتا گیا اے‘ نویں شرح منافع دا اطلاق 24 اپریل 2020 توں کیتا گیا اے۔ نوٹیفکیشن دے مطابق ڈیفنس سیونگ سرٹیفکیٹ اُتے منافع دی شرح 10.40 فیصد توں گھ کر کے 8.54 فیصد‘ 10 سالا پینشنز بینیفٹس اکاؤنٹس‘ بہبود سیونگ سرٹیفکیٹس تے شہداء فیملی ویلفیئر اکاؤنٹس اُتے منافع دی شرح 12.24 فیصد توں گھٹ کر کے 10.32 فیصد‘ 5 سالا ریگولر انکم سرٹیفکیٹ اُتے منافع دی شرح 10.56 فیصد توں گھٹ کر کے 8.28 فیصد جد کہ سرٹیفکیٹس تے اکاؤنٹس اُتے منافع دی اوسط شرح 11.13 فیصد توں گھٹ کر کے 8.10 فیصد کر دِتی اے۔ دوجے پاسے سیونگ اکاؤنٹس اُتے منافع دی شرح 8.60 فیصد توں گھٹ کر کے 7 فیصد شارٹ ٹرم سیونگ سرٹیفکیٹس وچ 3 مہینیاں دے سرٹیفکیٹس اُتے منافع دی شرح 12.76 فیصد توں گھٹ کر کے 7.80 فیصد‘ 6 مہینیاں دے سرٹیفکیٹس اُتے منافع دی شرح 12.60 فیصد توں گھٹ کر کے 7.50 فیصد تے 12 مہینیاں دے سرٹیفکیٹس اُتے منافع دی شرح 12.37 فیصد توں گھٹ کر کے 6.95 فیصد کر دِتی گئی اے۔