kraamaat@gmail.com
+ +92 333-430-6384


صغیر تبسم ہوراں دی اِک نظم


صغیر تبسم December 12, 2019


گل سن وے دل دیا جانیا

میرے نال کِتے جے توں ہوویں

اساں وانگ کبوتر اڑ جائیے

کدی لُک جائیے ایہناں بدلاں وچ

کدی مینہ دے وانگر وس پئیے

کدی گل نال لگ کے رو پئیے

کدی روندے روندے ہس پئیے

گل سن وے دل دیا جانیا

میرے نال کتے جے توں ہوویں

تیرے پیراں ہیٹھ وچھاون نوں

میں ریشم دریاں لے آواں

تینوں ٹھنڈیاں پکھیاں جھلن نوں

میں قاف چوں پریاں لے آواں

گل سن وے دل دیا جانیا

میرے نال کِتے جے توں ہوویں

اساں وچ سمندراں ڈب جائیے

اک محل اسار کے پانی وچ

کوئ وانگ گلاباں کھڑ جائیے

اک گیت ملن دا رل گائیے

اک راگ دے وانگر چھڑ جائیے

گل سن وے دل دیا جانیا

جد رات ہنیری ہو جانی

تیرے مکھ توں گھنڈ اتار کے

اساں باگاں دے وچ بہ جانا

اساں کوئل وانگر کُوکنا

اساں گیتاں وچ ہی رہ جانا

گل سن وے دل دیا جانیا

میرے نال کِتے جے توں ہوویں

میں تارے توڑ کے انبراں توں

تیرے کناں دے وچ ٹنگ دیواں

تیرے سرخ شرابی ہوٹھاں نوں

میں چیتر رنگ وچ رنگ دیواں

گل سن وے دل دیا جانیا گل

سن وے دل دیا جانیا ۔۔۔۔۔۔۔۔۔!