پاکستان وچ جولائی دے ادھ تک کرونا متاثرین دی گنتی 2 لکھ توں ودھ سکدی اے: عالمی ادارا صحت  .....٭رویل نیوز٭

جینیوا (اُچیچا نمائندا)) عالمی ادارا صحت دے آگو دا کہنا اے کہ پاکستان وچ جولائی دے ادھ تک کرونا متاثرین دی گنتی 2 لکھ توں ودھ سکدی اے۔ عالمی ادارا صحت دے آگو ڈاکٹر ٹیڈروس ایڈہانوم نے خبردار کیتا اے کہ کرونا وایرس پاکستان دے 115 ضلعیاں وچ کھلر چکیا اے تے جے کرونا وایرس نال نبڑن لئی مؤثر اقدامات نہ کیتے گئے تے جولائی دے ادھ تک پاکستان وچ کرونا متاثرین دی گنتی 2 لکھ توں ودھ سکدی اے‘ سندھ تے پنجاب بُہتے متاثرا صوبیاں وچ شامل نیں۔ ڈاکٹر ٹیڈروس ایڈہانوم نے کہیا کہ پاکستان وچ صحت دا نظام پہلے ای دباء دا شکار اے تے کرونا نے لوکائی دیاں اوکڑاں وچ وادھا کر دِتا اے‘ کرونا وایرس دے مقابلے لئی قومی سطح اُتے مربوط حکمت عملی اپنان پوے گی جد کہ ”کووڈ نائنٹین رسپانس پلان“ پاکستانی حکومت‘ اقوام متحدا تے ایہدے شراکت داراں دی سانجھی حکمت عملی اُتے منحصر اے۔ عالمی ادارا صحت نے خبردار کیتا کہ کرونا وایرس دے دوران افریقا وچ ملیریا نال ڈبل مَوتاں دا دھرُکو اے۔ ڈبلیو ایچ او دے مطابق چالو ورھے کیڑے مار دوائیاں دی فراہمی وچ رکاوٹاں دی وجھا توں مچھراں دے وڈھن نال ملیریا کھلر سکدا اے‘ فوری اقدامات نہ کیتے تے براعظم افریقا وچ ملیریا نال پچھلے سال دی نسبت ڈبل مَوتاں واقع ہو سکدیاں نیں۔ عالمی ادارا صحت دے آگو نے ہور خبردار کیتا کہ کھسرا تے پولیو ویکسین نہ لائیاں گئیاں تے ایہ بیماریاں فیر توں سر چُک سکدیاں نیں۔