یوٹیلٹی سٹوراں تے تالے لگ گئے،سبزیاں،پھلاں دے بھاء وچ وادھا:.....٭رویل نیوز٭

اسلام آباد‘ لاہور (نمائندا رویل)ملک وچ رمضان دے مہینے دے اغاز نال ای سبزیاں تے پھَلاں دے بھاء وچ انھا وادھا ہو گیا جد کہ یوٹیلیٹی سٹوراں اُتے تالے لگ گئے‘ اسلام آباد دیاں مقامی مارکیٹاں وچ ضلعی انتظامیا تے مارکیٹ کمپنی ولوں پھَلاں تے سبزیاں دے متھے بھاء وچ وادھے دے باوجود کھلم کھلا خلاف ورزی کیتی جا رہی اے مارکیٹ وچ ننبوں 550 رُپئے کلو‘ ہری مرچ 150 رُپئے‘ بھنڈی 150 رُپئے‘ سیب 220 رُپئے توں 250 رُپئے‘ کیلا 120رُپئے توں 200 رُپئے فی درجن‘ کِنو 250 رُپئے‘ خربوزا 120 رُپئے تے موسمی پھَل لوکاٹ 120 رُپئے فی کلو تک وِک رہے نیں‘ ضلعی انتظامیا نے کرونا دی آڑ وچ سستے بازاراں نُوں ختم کر کے شہریاں نُوں گراں فروشاں دے رحم و کرم اُتے چھڈ دِتا اے۔ دوجے پاسے آل پاکستان یوٹیلیٹی سٹورز کارپوریشن ایمپلائزیونین دے فیصلے دی روشنی وچ رمضان المبارک توں اِک دن پہلاں پورے ملک دے یوٹیلیٹی سٹوراں اُتے تالے لا دِتے گئے نیں جہدے نتیجے وچ خریداری دے سلسلے وچ آن والے شہریاں نُوں نہ صرف شدید اوکڑاں دا ساہمنا کرنا پے رہیا اے سگوں سکیم موڑ اُتے واقع یوٹیلیٹی سٹور کارپوریشن دے ویئر ہاؤس تے زونل آفس دے باہر سامان لوڈ نہ کرن کارن ٹرکاں دیاں لایناں لگ گئیاں نیں۔ یوٹیلیٹی سٹورز کارپوریشن ایمپلائز یونین دے عہدیداراں نے اعلان کیتا اے کہ جے حکومت نے اوہناں دے مطالبات تسلیم نہ کیتے تے مطالبیاں دی منظوری تک یوٹیلیٹی سٹورز دے ملازمین دی ہڑتال جاری رہوے گی۔