صغیر تبسم دی سجری نظم خاص طور تے رویل دے پڑھنہاراں لئی

کہڑی رات دے کنارے آن کھلوتا واں

دُور دُور تک سویر دا کوئ نشان نہیں اے

کچے ویڑھے چ ہرے کِکر دا رُکھ ہے

روندیاں تے کرلاندیاں کندھاں دے وین نیں

کہڑی رات دے کنارے آن کھلوتا واں

چمگادڑاں گھر دیاں چھتاں تے پٹھیاں لمکیاں

ڈیلے کڈھ کڈھ ڈران ڈیاں نیں

اُلوواں دی ہُوک چپ دے سمے اندر

کلیجا چیر کے لنگھ جاندی ہے

چارے پاسے چپ ہے لمی چپ ہے

چپ دے جندرے توڑ کے تیرا ناں لیندا ہاں

تے ستیاں کندھاں

اک دم چیک مار کے شور پا دیندیاں نیں

یاد دا کوٹھا ڈھا دیندیاں نیں

کیہڑی رات دے کنارے آن کھلوتا واں

انھیر ہے گھپ انھیر ہے

گھر دی انگیٹھی تے جھاتی ماردا ہاں

تےاوہ وی سنجی پئی اے

کنچ دا گلاس ہے جیہدے کناریاں تے

تیریاں بلھیاں دا رس جمیا اے

اک مٹی دا پیالا ہے جہدے وچوں

تیرے ساہواں دی سجری خشبو آندی ہے

ہور کجھ وی نہیں اے

ہاں۔۔۔۔۔ویڑھے دا اُداس کِکر ہے

جہدی ٹہنیاں تے لمکے آلھنیاں چ

روندے خاب تے چیکدیاں یاداں نیں

کہڑی رات دے کنارے آن کھلوتا واں

میں کدی کنچ دے گلاس دے کناریاں تے لگے

ہوٹھاں دے نشان ویکھدا ہاں

کچی مٹی دے پیالے چے گواچے

سفنیاں دے پیر گولدا ہاں

کدی کِکر دے ہیٹھ پئے منجے دی

روندی اکھ ویکھدا ہاں

لمی چُپویکھدا ہاں

انھیر گُھپ ویکھدا ہاں

کہڑی رات دے کنارے آن کھلوتا واں