"آہ! عرفان خان۔۔۔تیریاں اَکھاں ،لفظاں توں ودھ بولدیاں سن"

فلماں وچ حقیقی رنگ بھرن والا ، سچے نظر آون والے جیون د ی اداکاری کرداکردا اپنے چاہن والیاں نوں رواندا چھڈ گیا۔آپ دی اداکاری دے لوک دیوانے نیں اوہناں نے جہڑا وی کردار نبھایا انج لگا ایہ کردار اوہناں واسطے ای لکھیا گیا سی تے اوہ سچی مُچی اوہو ای نیں۔اک چنگا اداکار ویکھن والیاں نوں اپنے نال ای ٹور لیندا اے تے اوہناں دیاں اکھاں وچوں ہنجو وی بن کے ڈُلھ سکدا اے تے ہونٹھاں تے ہاسا وی پیدا کر سکدا اے۔آپ دیاں اکھاں تے اَواز وچ جہڑا من کھچواں انداز سی اوہدے پچھے ڈھیر محنت نال اپنا آپ منوان دا جذبا وی سی جس نوں تھوڑے لفظاں وچ بیان کرنا اوکھا اے۔

عرفان خان 7 جنوری 1967 نوں پیدا ہوئے ۔آپ دے والد یاسین علی خان سن جو" کھجوریا "ناں دے پنڈ واسی جہڑا ضلع ٹانک دے نیڑے اے۔آ پ دے والد پیشے وجوں اک ٹائراں دا کاروبار چلاندے سن۔ سعیدہ بیگم آپ دی ماں جی دا ناں سی جہناں دی وفات چار دن پہلاں ای جے پور وچ ہوئی بھارت وچ کرڑے لاک ڈاؤن دی وجھا توں عرفان خان اپنی ماں دے جنازے وچ وی رَلت نہ کر سکے۔ماں دا دُکھ اوہ نہ جر سکے تے دوجے دن ای ممبئی دے اک ہسپتال وچ داخل کروا دِتے گئے۔آپ نے جے پور وچوں ای ایم اے دی ڈگری لئی تے بعدوں دِلی وچ آ گئے تے نیشنل سکول آف ڈراما وچ داخلا لیا ۔آپ نے جواننی وچ کرکٹ وی خوب کھیڈیا۔آپ اک چنگے کرکٹر وی سن تے سی کے نائیڈو ٹورنامنٹ واسطے چُنے وی گئے سن پر پیسے نہ ہوون پاروں جا نہ سکے۔آپ دی شادی اک لکھارن سُتپا سِکدر نال ہوئی تے آپ دے دو پُتر نیں۔

دِلی توں آپ ممبئی چلے گئے تے اداکاری دا مُڈھ بنھیا۔1999 تک آپ دی اداکاری نوں کسے نہ سلاہیا فیر لندن وسدے اک ڈایریکٹر آ صف کپاڈیا نے عرفان خان نوں اپنی اک تاریخ دے حوالے نال بنائی جاون والی فلم " دا وَیرئر" وچ کاسٹ کیتا ایس نوں جدوں قومانتری فلم فیسٹیول وچ چلایا گیا تاں عرفان خان دی اداکاری نوں لوکاں نے سیہانیا۔2004 وچ "مقبول" فلم وچ آپ دے کردار نے فلمی گُرواں نوں حیرت وچ پا دتا۔

آپ دے جیون دی پہلی اُچیچی فلم " روگ " ثابت ہوئی کیوں جے ایہ بالی ووڈ دی اوہ فلم سی جہدے وچ عرفان خان نے پہلی وار مرکزی کردار ادا کیتا تے کردار و چ حقیقت دا رنگ بھریا۔ فلم دے نقاداں نے ایس دی تعریف کیتی تے کہیا کہ عرفان دیاں اکھاں اوہدے لفظاں توں ودھ بولدیاں نیں تے اوہدا مُکھ ہر ویلے فریم وچ ہوندا اے۔ پان سنگھ تومار،سات خون معاف،پی کُو، لائف اِن میٹرو،لنچ باکس،ہندی میڈیم،انگریزی میڈیم تے ہور بہت ساریاں فلماں نے جیون دے سچے رنگ وکھاندے جاندار اداکاری نال اپنے آپ نوں منوایا۔

ایس توں مگروں آپ نے بطور ولن وی کئی فلماں وچ کم کیتا تے اک اینکر دے طور تے وی " مانو یا نہ مانو" ناں دا پروگرام کیتا جس نوں ساری دُنیا وچ پسند کیتا گیا۔بالی ووڈ وچ جھنڈے گڈن توں بعد آپ نے ہالی ووڈ وچ وی اپنی اداکاری نال نامنا کھٹی۔" لائف آف پائی " ورگیاں یاد گار فلماں دتیاں۔آپ دی آخری فلم " انگریزی میڈیم " جو تیرھاں مارچ نوں ریلیز ہوئی ایس فلم نے وی " ہندی میڈیم " وانگ پورے ہندوستان وچ پسندیدا فلم ہوون دا مان کھٹیا۔بطور اداکار،ہیرو،ولن،سپورٹنگ کریکٹر کئی ایوارڈ حاصل کیتے نالے پدما شری ایوارڈ نال وی آپ نوں سنمانیا گیا۔

مارچ 2018 وچ عرفان خان نوں نیوران ڈوکرائن ٹیومر ہویا جس دا علاج کروان لئی اک ورھا برطانیا دے ہسپتال وچوں علاج وی کرواندے رہے اگلے ورھے بھارت پرتے سن۔آپ نے کینسر ورگے روگ نال بڑی بہادری نال لڑیا تے اخیر 29 اپریل 2020 نوں ایس دُنیا توں اگلے جہان ول سفر کر گئے۔آپ نے اپنی حیاتی وچ اِک سو دے لگ بھگ فلماں وچ کم کیتا تے ہر فلم وچ اوہناں دی اداکاری توں ایہ نہیں اندازا لایا جا سکدا سی کہ اگلے ای پل اوہ ویکھن والیاں نوں کس حیرت وچ پا دین گے ۔آپ دے چاہن والے انگریزی میڈیم توں بعد کئی فلماں وچ آپ دی اداکاری نال حیرت دے سمندر وچ ڈُبن دی اُڈیک وچ سن کہ آپ دے ایس جہان نوں چھڈ جاون دی خبر نے سبھ نوں حیرت وچ پا دتا۔ اوہ اداکار جس دیاں اکھاں اوس دے لفظاں توں ودھ بولدیاں سن تے جس دا چہرا ہر ویلے فریم وچ رہندا سی اوس نوں ویکھن لئی اکھاں ترسدیاں وی رہن گیاں۔۔۔۔

٭٭٭٭٭