تحریک انصاف نے ملکی تواریخ دا سبھ توں وڈا ریلیف پیکج دِتا: فیاض الحسن چوہان.....٭رویل نیوز٭

لاہور (نمائندا رویل) وزیرِ اطلاعات پنجاب فیاض الحسن چوہان نے کہیا اے کہ وزیراعظم عمران خان دی قیادت وچ ایس ویلے ملکی تواریخ دا سبھ توں وڈا ریلیف پیکج حرکت وچ اے‘ جہدے تحت پورے ملک وچ غریب‘ مزدور تے دیہاڑی دار طبقیاں نُوں راشن تے امداد ی رقماں دی فراہمی جاری اے جد کہ پنجاب وچ وی زیر اعلا پنجاب سردار عثمان بزدار دیاں ہدایتاں اُتے ساری کابینا تے ایم پی ایز انتظامیا دے تعاون نال کرونا دے خلاف جنگ وچ عملی اقدامات کر رہے نیں پر سارے لیگی قائدین حقایق توں لاعلمی دے کارن حکومت مخالف بیانات دے رہے نیں جے شہباز شریف لیپ ٹاپ چلانا سکھ لین تے اوہ کرونا دے حوالے توں حکومتی ریلیف پیکج دی ساری معلومات احساس ایمرجنسی کیش انفارمیشن پورٹل اُتے تفصیل نال پڑھ سکدے نیں۔ نیوز لائن انٹرنیشنل (این ایل آئی) نُوں اپنے اِک خصوصی انٹرویو وچ اوہناں نے کہیا کہ وزیراعظم عمران خان دیاں ہدایتاں دے مطابق پاکستان تحریکِ انصاف نے کرونا ایشو اُتے سیاست چھڈ کے صرف لوکائی دی فلاح نُوں ساہمنے رکھیا پر افسوس! ن لیگی قیادت نے عوامی خدمت دا ایہ نادق موقع وی سیاست دی نذر کر دِتا۔ مسلم لیگ (ن) نُوں ایہ حقیقت ہضم نہیں ہو رہی کہ اوہ ملکی سیاست توں آؤٹ ہو چکی اے‘ مریم اورنگزیب دے موجودا آقا صرف بھڑکاں مار کے خُد گھر بندیوچ چلے گئے‘ بے ڈھنگے بیان دے کے ن لیگ خبراں وچ تے آ سکدی اے‘ دُبارا سیاست وچ نہیں۔ وزیر اطلاعات پنجاب فیاض الحسن چوہان نے پنجاب وچ لاک ڈاؤن دے وادھے اُتے اپنے خیالاں دا اظہار کردیاں ہویاں کہیا اے کہ وزیر اعلا پنجاب سردار عثمان بزدار نے لاک ڈاؤن دے اوقات کار دے تعین وچ سارے طبقیاں خاص طور اُتے غریب‘ دیہاڑی دار تے مزدور طبقے دیاں سہولتاں دا خاص خیال رکھیا اے۔ گلی محلیاں وچ پھیری لان والے پھَل تے سبزی فروش تے ریڑھی والے لاک ڈاؤن دے اوقاتِ کار توں مستثنا نیں۔اوہناں نے کہیا کہ لاک ڈاؤن وچ ہر طبقا تے کاروبار نُوں عوامی لوڑ تے سہولت دے مطابق کھولن دی اجازت دِتی گئی اے‘ پورے صوبے وچ بیکریز‘ کریانا سٹورز‘ ڈیپارٹمنٹل سٹورز‘ سپر مارکیٹاں‘ بیج‘ کھاد‘ فرٹیلائزر دیاں دُکاناں تے آٹو ورکشاپس صبح 9 توں شام 5 وجے تک کھلیاں رہن گیاں۔ فیاض الحسن چوہان نے لوکائی دے ناں اپنے پیغام وچ کہیا کہ لوکائی نُوں موجودا کاروباری اوقاتِ کار دے دوران سماجی دوری دے ضابطیاں دا خیال رکھنا چاہیدا اے کیوں جے حکومت تے لوکائی دیاں سانجھیاں کاوشاں نال ای کرونا نُوں کھلرن توں روکیا جا سکدا اے۔