بھارت وچ مسلمان محفوظ نہیں نیں:محمود قریشی.....٭رویل نیوز٭

اسلام آباد (نمائندا رویل) وزیر خارجا شاہ محمود قریشی نے کہیا اے کہ بھارت دا رویا نہ صرف مسلماناں د ے نال خطرناک اے سگوں اوتھے موجود ساریاں اقلیتاں وی غیر محفوظ نیں جہدا اظہار دنیا دے صف اول دے میڈیا وچ وی کیتا گیا اے۔ امریکی کمیشن برائے مذہبی ازادی دی رپورٹ اُتے اپنے ردِ عمل وچ وزیر خارجا نے کہیا کہ اج نیویارک ٹائمز‘ واشنگٹن پوسٹ تے گارجین سنے سارے صف اول دے میڈیا نے امریکی کمیشن دی تازا رپورٹ اُتے اپنی رائے دا اظہر کیتا اے۔ اوہناں دا کہنا سی کہ بھارت دا رویا صرف مسلماناں لئی خطرناک نہیں سگوک اج بھارت وچ ساریاں اقلیتاں وی غیر محفوط نیں۔ محمود قریشی نے کہیا کہ امریکی ادارے دی رپورٹ وچ ایہو جہے 328 مختلف واقعات دا حوالا دِتا گیا اے جہدے وچ بھارت وچ جبرن مذہب دی تبدیلی دیاں کوششاں کیتیاں گئیاں نیں۔ بھارتی حکومت نُوں تنقید دا نشانا بناندیاں ہویاں اوہناں نے کہیا کہ بھارت وچ کروڑاں دی گنتی وچ ایہو جہے لوک وی نیں جہڑے مثبت سوچ دے حامل تے سیکولر بھار ت دے حامی نیں تے ہُن اوہ بندے اپنیاں اوازاں بھارت سرکار دے رویے خلاف چُک رہے نیں۔ اوہناں دا کہنا سی کہ کجھ عرصے پہلاں دِلی وچ مسلماناں دا قتلام ساری دنیا نے ویکھیا پر اوہناں نے مصلحتن خاموشی اختیار کیتی جد کہ خلیجی ملکاں نے بھارت دے رویے دے خلاف اواز بلند کیتی اے۔ خلیجی ملکاں دا حوالا دیندیاں ہویاں اوہناں دا کہنا سی کہ ایہناں ملکاں وچ کئی بھارتی شہری رہندے نیں پر اوہناں اُتے تے زندگیاں تنگ نہیں کیتیاں گئیاں۔ اپنے بیان وچ وزیر خارجا نے کہیا کہ اسلامی تعاون تنظیم (او آئی سی) نُوں میں دُبارا خط لکھیا اے تے رکن ملکاں دے وزرائے خارجا نُوں وی خط گھلے نیں تاں جے اوہ عالمی سطح اُتے ایس رویے دے خلاف اواز چُکن۔ شاہ محمود قریشی دے مطابق بھارت بارے بین الاقوامی انسانی حقاں دیاں تنظیماں تے بین الاقوامی میڈیا دی رائے تیزی نال دل رہی اے۔ وزیر خارجا نے اپنے بیان وچ کہیا کہ دنیا وچ اِک پاسے اقلیتاں د ے خلاف بھارتی اقدامات نُوں تنقید دا نشانا بنایا جا رہیا اے جد کہ دوجے پاسے پاکستان دیاں اقلیتاں دے حقاں دے تحفظ لئی کیتیاں جان والیاں کاوشاں نُوں سلاہیا جا رہیا اے۔ دوجے پاسے امریکا دے کمیشن برائے عالمی مذہبی ازادی (یو ایس سی آئی آر ایف) نے بھارت نُوں اقلیتاں لئی خطرناک ملک متھدیاں ہویاں ایہنوں بلیک لسٹ کرن دی سفارش کیتی اے۔ مذہبی ازادی بارے امریکا دے کمیشن برائے عالمی مذہبی ازادی دی حالیا رپورٹ وچ کہیا گیا اے کہ بھارت 2019 وچ مذہبی ازادی لئی بدترین ملک رہیا۔