مکمل لاک ڈاؤن نال دیہاڑی دار متاثر ہویا،   نیوکلئیر ہتھیار بناون والے وینٹی لیٹر کیوں نہیں بنا سکدے؟ وزیر اعظم دا کامسٹیک  وچ خطاب۔۔۔۔۔٭رویل نیوز٭

اسلام آباد (نمائندا رویل)وزیر اعظم عمران خان نے کامسٹیک دی اک تقریب وچ خطاب کردیاں کہیا اے کہ پہلاں سوچنا چاہیدا سی کہ مکمل لاک ڈاؤن نال کیہ حالات پیدا ہوون گے۔تگڑے نوں کوئی فرق نہیں پینا اے پر ماڑے لوکاں دی معاشی حالت ہور وگڑ جانی اے تے اوہناں دے گھر روٹی ٹُکر دے وی لالے پے جانے نیں۔کامسٹیک وچ اک تقریب نال خطاب کردیاں اوہناں دا کہنا سی کہ بھارت دے وزیر اعظم نے وی ڈرپوک ہوون دا ثبوت دتا اے تے پورے مُلک وچ لاک ڈاؤن کردتا گیا جس نال لوکاں نے مرنا شروع کر دتا اے پر پاکستان وچ اجہیا کجھ نہیں ہوون دیاں گے۔وزیر اعظم نے سرکاری ہسپتالاں دی کارکردگی بارے گلبات کردیاں کہیا کہ ایہ اونا چر تک ٹھیک نہیں ہوون گے جہناں چر سیاستدان تے سرکاری افیسر ایس ول دھیان نہیں دیون گے۔ہسپتالاں وچ وینٹی لیٹر دی انہوند بارے گل کردیاں اوہناں دا کہنا سی کہ سٹھ دے دہاکے وچ ایہ ملک سائنس تے ٹیکنالوجی وچ بہت اگے سی ہُن کیہ ہویا اے۔اج دے سائنسدان اپنے مُلک واسطے کجھ کیوں نہیں کر رہے نیں کیہ نیوکلئر ہتھیار بناون والا ملک وینٹی لیٹر نہیں بنا سکدا اج ویلے دی لوڑ نیوکلئر نہیں وینٹی لیٹر اے۔ہر شے نوں باہروں منگوان والی سوچ نوں پچھانہ چھڈاں گے تے اگے ٹُریا جاوے گا ایس واسطے وِژن دی لوڑ اے ۔ایسے وژن نال اوہ لوکائی واسطے ریلیف والے منصوبے دی خُد جانچ پڑتال کر رہے نیں۔