ووہان وائرا لوجی لیبارٹری  جاون دی منگ،امریکا معاملے دی تہ تک اپڑنا چاہندا،چین تعاون نہیں کر رہیا۔۔۔۔٭رویل نیوز٭

واشنگٹن (نیوز رویل) امریکا نے اِک واری فیر چین توں ووہان وائرا لوجی لیبارٹری تک رسائی دا مطالبا کردیاں ہویاں کہیا کہ ایس معاملے دی تَہ تک جاواں گے‘ چین نُوں ساڈے نال مکمل تعاون کرنا چاہیدا اے‘ وایرس امریکا سنے پوری دنیا دے کئی انساناں دی جان لے چُکیا اے تے ایہدے وچ سبھ توں ودھ امریکا متاثر ہویا اے‘ امریکی شہریاں دی زبان اُتے اِک ای سوال اے‘ اوہ ووہان وائرالوجی لیبارٹری تک رسائی چاہندے نیں۔ غیر ملکی خبر رساں ایجنسی دے مطابق امریکی وزیر خارجا مائیک پومپیو نے اپنے اِک بیان وچ کہیا اے کہ دنیا سمجھنا چاہندی اے کرونا وایرس دی وباء کویں شروع ہوئی‘ بیجنگ اُتے لازم اے کہ اوہ شفاف طریقا اپنائے کیوں جے ووہان وچ ہُن وی پیتھوجینز دیاں کئی لیبارٹریاں وچ کم جاری اے تے سانوں نہیں پتا کہ اوتھے کہو جہی سیکیورٹی وچ کم کیتا جاندا اے۔ اوہناں دا کہنا سی کہ پہلے وی اسیں چین توں کرونا وایرس دی ازادانا تحقیقات دا مطالبا کر چکے آں۔ چین وچ حساس تجربا گاہاں حالے وی کھلیاں نیں تے اوہناں اُتے کم ہو رہیا اے۔ ایہو جہے مواد نُوں محفوظ طریقے نال ہینڈل کیتا جاوے تاں جے حادثاتی طور اُتے کھلرن توں بچیا جا سکے۔ ایہ معاملا اینا سوکھا نہیں جنا سمجھیا جا رہیا اے‘ اسیں ایس وباء دے کھلرن دی تَہ تک جاواں گے‘ چین نُوں ساڈے نال مکمل تعاون کرنا چاہیدا اے‘ ایس وایرس نال جتھے پوری دنیا دے ملک متاثر ہوئے نیں اوتھے امریکا سبھ توں ودھ م تاثر ہویا اے‘ امریکی لوکائی دی زبان اُتے اِک ای سوال اے تے اوہ حقایق نُوں جاننا چاہندی اے۔ ایس توں وکھ امریکی صدر ڈونلڈ ٹرمپ نے الزام لاندیاں ہویاں کہیا اے کہ چین نے نومبر وچ ہون والے صدارتی الیکشن وچ ہروان لئی کرونا وایرس کھلاریا کیوں جے چین نہیں چاہندا کہ میں کامیاب ہو جاواں۔ امریکی صدر نے ہور کہیا کہ چین اوہناں نوں الیکشن ہروان لئی کسے وی حد تک جا سکدا اے تے کرونا وایرس دی وباء نُوں بے قابو ہون دینا‘ درست معلومات نہ دینا تے حقایق لُکان ایس گل دا مونہ بولدا ثبوت اے تاں جے امریکی لوکائی متنفر ہو جاوے۔ دوجے پاسے چین دی وزارت خارجا ولوں جاری بیان وچ صدر ٹرمپ دے دعوے نُوں جھوٹھا تے مضحکا خیز متھدیاں ہویاں کہیاگیا اے کہ چین امریکی الیکشن وچ مداخلت کرن وچ دلچسپی نہیں رکھدا تے نہ ای ایہ ساڈا استحقاق اے۔ امریکا وچ کرونا وایرس دی وباء دی تباہی بد انتظامی دی وجھا توں اے‘ امریکی صدر نُوں ایہدے اُتے توجا دینی چاہیدی اے۔