مصر تے پاکستان دا لاک ڈاؤن اِکو جہیا٭مشکل دی ہر گھڑی وچ لوکائی دے نال آں، وزیراعظم عمران خان دی کرونا وایرس تے ایہدے پاکستان اُتے اثرات بارے میڈیا نُوں بریفنگ۔۔۔۔۔٭رویل نیوز٭

اسلام آباد(اُچیچا نمائندا)کرونا وایرس دی وبائی صورتحال اُتے گل کردیاں ہویاں وزیراعظم عمران خان نے کہیا اے کہ باقی دنیا نال موازنا کیتا جاوے تے پاکستان دے حالات چنگے نیں۔ وزیراعظم عمران خان دا کرونا وایرس تے ایہدے پاکستان اُتے اثرات بارے میڈیا نُوں بریفنگ دیندیاں ہویاں کہنا سی کہ میں ہُن تک دی صورتحال توں لوکائی نُوں اگاہ کرنا چاہندا آں۔ اللہ تعالیٰ دا شکر اے کہ پاکستان وچ مَوتاں گھٹ نیں‘ ہور دنیا نال مقابل کیتا جاوے تے ساڈے ملک دے حالات اوہناں توں چنگے نیں‘ حکومت کرونا فنڈ وچ عطیا کیتے اِ ک رُپئے وچ 4 رُپئے رلا کے بیروزگاراں نُوں دیوے گی‘ کرونا وایرس دے کارن بیروزگار ہون والیاں دی مدد لئی وزیراعظم ریلیف فنڈ دا اجرا کر رہے آں‘ لوکائی کرونا وایرس دے خلاف تعاون کر رہی اے‘ اسیں 30 اپریل تک جنے کیسز دا اندازا لا رہے ساں اونے نہیں نیں۔اوہناں نے دَسیا کہ پچھلے دن اوہناں دی ایرانی صدر حسن روحانی جد کہ اج مصر دے صدر عبدالفتح السیسی نال ٹیلی فونک رابطا ہویا اے۔ خطے وچ سبھ توں ودھ ایران وچ جانی نقصان ہویا۔ ایران نے شادی تقریبات‘ سکول‘ کالجز تے یونیورسٹیاں دے علاوا سارا کاروبار کھول دِتا اے جد کہ مصر تے پاکستان دا لاک ڈاؤن اِکو جہیا ای اے۔ اوہنے وی پاکستان وانگوں بیرون ملک توں قرضے لئے ہوئے نیں۔ مصر وچ پہلے دن توں سکول‘ کالجز‘ یونیورسٹی تے وڈے اجتماعواں نُوں بند کر دِتا گیا سی‘ مصر نے کوشش کیتی دیہاڑی دار طبقا متاثر نہ ہووے۔ عمران خان نے کہیا کہ اوور سیز پاکستانی واپس آنا چاہندے نیں‘ اسیں اوہناں نُوں واپس لیان دی ہر ممکن کوشش کر رہے آں۔ بیرون ملک تعینات سفیراں نُوں ہدایتاں جاری کیتیاں نیں کہ مشکل ویلے وچ پاکستانیاں دا خیال رکھن۔ کوئی وی نہیں کَہ سکدا کہ ایہ وایرس کدوں تک چلے گا‘ ویکسین آن تک سوچ سمجھ کے اگے چلنا پوے گا۔ اوہناں نے دَسیا کہ اللہ دا شکر اے پاکستان وچ کافی شیواں بنانا شروع کر دِتیاں نیں۔ دنیا دے مقابلے وچ سستے وینٹی لیٹرز بننا شروع ہو گئے نیں جد کہ کئی شیواں نُوں ایکسپورٹ کرن دا سوچ رہے آں۔ ایس توں وکھ وزیراعظم عمران خان نے کہیا اے کہ مقبوضا کشمیر وچ مودی سرکار کشمیریاں دی نسل کشی کر رہی اے۔ وزیراعظم عمران خان نے ٹویٹر اُتے کہیا اے کہ مقبوضا کشمیر وچ کرونا دی آڑ وچ مو دی سرکار فاشٹ ہندوتوا نظریے اُتے عمل پیرا اے۔ اوہناں نے کہیا کہ مقبوضا کشمیر وچ آر ایس ایس دی اُچیرتا دا نظریا تے جنگی جرایم جاری نیں تے بھارتی حکومت مقبوضا کشمیر وچ جنیوا کنونشن دی خلاف ورزی کر رہی اے۔ وزیراعظم نے کہیا کہ مقبوضا کشمیر وچ مودی سرکار نہ صرف کشمیریاں دی نسل کشی کر رہی اے سگوں مودی حکومت مقبوضا کشمیر وچ ابادی دا تناسب وی بدل رہی اے۔ایس توں پہلاں وزیراعظم نے کامسٹیک وچ طبی مصنوعات دی نمایش دا دورا کیتا۔ تقریب نال خطاب کردیاں ہویاں وزیراعظم نے کہیا کہ ملک وچ طبی آلات بنان دے اقدامات اُتے فواد چودھری تے زبیدہ جلال نُوں خراجج تحسین پیش کردا آں‘ کامسیٹک وچ ماضی وچ ٹیکس دی رقم نال صاحب اقتدار لوکاں دا علاج ہوندا سی‘ وزارت سائنس ملک نُوں اگے لے جان دی صلاحیت رکھدی اے‘ کرونا دے بعد وینٹی لیٹر بنان دا سوچیا۔وزیراعظم نے اِک وار فیر مکمل لاک ڈاؤن دی مخالفت کردیاں ہویاں کہیا کہ حکمران اشرافیا نے فیصلا کیتا کہ ملک وچ لاک ڈاؤن کرنا اے‘ لاک ڈاؤن دا فیصلا امیراں نے کیتا‘ غریب بند ے دا سوچیا ای نہیں پر کرونا امیر تے غریب وچ فرق نہیں کردا‘ وایرس غریب وستی وچ کھلرے گا تے امیراں دے گھراں وچ وی جاوے گا۔ ماضی وچ ٹیکس دی رقم نال امیراں دا علاج ہوندا سی۔مودی اینا ڈرپوک نکلیا کہ کرونا دی وجھا توں ملک بند کر دِتا‘ غریب دا نہیں سوچیا۔ اوہناں نے کہیا کہ اپنے آپ اُتے یقین رکھن والیاں قوماں اگے ودھدیاں نیں‘ خُد اعتمادی لوکاں نُوں اوکڑاں نال لڑنا سکھاندی اے‘ نبی کریمؐ دی سنت اُتے عمل پیرا ہون وچ ای کامیابی اے‘ ریاست مدینہ وچ لوکاں نُوں اپنے آپ نُوں یقین کرنا آ گیا سی‘ مدینہ دی ریاست دا نمونا ساریاں لئی بہترین مثال اے۔ عمران خان دا ہور کہنا سی کہ پاکستان 60 دے دہاکے وچ ترقی ول گامزن رہیا‘ اسیں ماضی وچ تعلیم تے ریسرچ اُتے پیسا خرچ نہیں کیتا‘ ماضی وچ ملکی پیداواری صلاحیت نُوں نظر انداز کیتا جاندا رہیا۔ شوکت خانم ہسپتال بنان ویلے ساڈی حوصلا شکنی کیتی گئی‘ سانوں کہیا گیا ہسپتال نہیں بن سکدا پر اسیں خُد اعتمادی نال بنا کے وکھایا