بھارت علاقائی امن دا دُشمن اے۔۔۔۔۔٭رویل نیوز٭

اسلام آباد (نمائندا رویل) بھارت علاقائی امن دا دشمن بن گیا‘ بھارتی فوجاں نے لائن آف کنٹرول اُتے اِک واری فیر فایرنگ کیتی جہدے نال 2 سوانیاں شہید تے بچے سنے 2 زخمی ہو گئے‘ دشمن نال لڑدیاں ہویاں پاک فوج دا اِک جوان وی شہید ہوگیا۔ آئی ایس پی آر دے مطابق بھارتی فوج نے ایل او سی اُتے کیلر تے رکھ چکری سیکٹر ز اُتے بلا اشتعال فایرنگ کیتی تے سول ابادی نُوں بھاری ہتھیاراں نال نشانا بنایا‘ بھارتی فایرنگ تے گولا باری نال کیرنی پنڈ دی 16 سالا کڑی تے 52 سالا سوانی شہید ہو گئے جد کہ 10 سالا بچا تے اِک سوانی زخمی ہوئے جہناں نُوں ہسپتال منتقل کر دِتا گیا اے۔ آئی ایس پی آر دے مطابق پاک فوج ولوں دشمن دی شر انگیزی اُتے مؤثر جوا ب دیندیاں ہویاں بھارتی چوکیاں نُوں نشانا بنایا گیا‘ فایرنگ دے تبادلے وچ پاک فوج دے لانس نائیک علی باز شہید ہو گئے‘ 34 سالا شہید علی باز دا تعلق ضلع کرک نال سی۔ دوجے پاسے ڈائریکٹر جنرل جنوبی ایشیا تے سارک زاہد حفیظ چودھری نے لاین آف کنٹرول (ایل او سی) اُتے بھارتی فوج دی بلا اشتعال فایرنگ نال جانی نقصان اُتے بھارتی ناظم الامور نُوں سَد کے احتجاج ریکارڈ کروا دِتا۔دفتر خارجا دے بیان وچ دَسیا گیا کہ بھارت نے صرف 2020 وچ ہُن تک 919 وار سیز فائر دی خلاف ورزی کیتی اے تے جان بُجھ کے ازاد جموں و کشمیر وچ ایل او سی دے نیڑے رہن والے معصوم شہریاں نُوں بھاری اسلحے نال نشانا بنایا سی۔