ہائر ایجوکیشن دے سرکاری اداریاں وچ داخلے لئی اقلیتاں دا 2 فیصد کوٹا مقرر،عثمان بزدار دی صدارت وچ اجلاس۔۔۔۔۔٭رویل نیوز٭

لاہور (نمائندا رویل) وزیر اعلا پنجاب سردار عثمان بزدار دی صدارت ہیٹھ 90 شاہراہ قائداعظم اُتے صوبائی کابینا دا 29 واں اجلاس منعقد ہویا۔ اجلاس وچ پنجاب مینارٹی امپاورمنٹ پیکج دے تحت ہائر ایجوکیشن دے سرکاری اداریاں وچ داخلے لئی اقلیتاں دیاں 2 فیصد سیٹاں مختص کرن دی منظوری دے دِتی گئی۔ کابینا نے ایل ڈی اے پرائیویٹ ہاؤسنگ سکیمز رولز 2014 وچ ترمیم تے ایل ڈی اے لینڈ یوز رولز 2019 دی اصولی منظوری دِتی‘ کابینا نے کرونا وباء نال یدا ہون والی صورتحال دے پیش نظر صوبے وچ سخت مالیاتی ڈسپلن نافذ کرن دا فیصلا کیتا تے غیر ضروری اخراجات اُتے پابندی لا دِتی۔ کابینا نے آلٹرنیٹ ڈسپیوٹ ریزولوشن ایکٹ 2019 تے ایکریڈیشن اتھارٹی اینڈ فریمنگ آف آلٹرنیٹ ڈسپیوٹ ریزولوشن رولز 2020 دی وی منظوری دِتی۔