کرونا ویکسین دی تیاری واسطے وزیر اعظم لوں ٹِیم تیار،ایہ ٹیم حفاظتی کِٹ وی تیار کرے گی ۔۔۔۔٭رویل نیوز٭

اسلام آباد (نمائندا رویل) وفاقی وزیر سائنس اینڈ ٹیکنالوجی نے کہیا اے کہ دنیا وچ کرونا وایرس لئی جہڑی تحقیق ہو رہی اے پاکستان دیاں ٹیماں اوہناں دے نال مدد کر رہیاں نیں‘ اسیں کرونا وایرس دی ویکسین ریسرچ لئی ٹیم بنائی‘ وزیراعظم ڈاکٹراں تے طبی عملے نال کھلوتے تے کہیا کہ اسیں کرونا دی وباء توں بچاء لئی حفاظتی کِٹاں آپ بنائیے جد کہ پاکستان ہُن سینیٹائزرز تے ڈس انفیکٹنٹس برآمد کرن دی پوزیشن وچ اے۔ اسلام آباد کامسٹیک وچ تقریب نال خطاب کردیاں ہویاں فواد چودھری نے کہیا کہ ڈیڈھ مہینے پہلاں پاکستان نُوں سینیٹائزر تے ڈس انفیکٹنٹس دی تھوڑ دا ساہمنا سی تے اج اسیں نہ صرف آپ سینیٹائزر بنا رہے آں سگوں ایہدی برآمد دی صلاحیت رکھدے آں اسیں وزارت کامرس ولوں سینیٹائزر دی برآمد اُتے عاید پابندی ہٹان دے منتظر آں۔ اوہناں نے کہیا کہ دنیا وچ کرونا ٹیسٹنگ کِٹاں ہفتیاں وچ بنا دِتیاں گئیاں تے ایہدے اُتے اسیں وی کم شروع کر دِتا‘ پورا فیصل آباد ڈاکٹرز تے فرنٹ لائن ورکرز لئی حفاظتی کپڑے تیار کر رہیا اے‘ ہُن ایہ غور کرن دی ضرورت اے کہ سانوں ایہناں وِچوں کہڑی شے دی ضرورت اے تے ہوراں نُوں برآمد کرنا چاہیدا اے۔ وفاقی وزیر نے ہور کہیا کہ ہُن فیکٹریاں ایہ حفاظتی لباس تیار کر رہیاں نیں‘ ایہناں دی وادھو ماترا موجود اے پاکستان ہُن اپنا این 95- ماسک وی تیار کر رہیا اے‘ ایہناں ماسک نُوں درآمد کیتا جاوے تے 1 ہزار رُپئے دی لاگت آندی اے جد کہ جہڑے تیار کیتے جا رہے نیں اوہناں دی لاگت 90 رُپئے اے ایہ بہت وڈا فرق اے۔ایہدے علاوا اسیں اپنے وینٹی لیٹر تیار کر رہے آں۔ ساڈے وینٹی لیٹر دی قیمت درآمد کیتے جان والے وینٹی لیٹرز توں قدرے گھٹ اے۔