کرونا دی وجھا نال مزدور  سبھ توں ودھ متاثر ہویا،مزدوراں دی وڈیائی نوں دِلوں مننے آں:صدر مملکت ڈاکٹر عارف علوی ۔۔۔۔٭رویل نیوز٭

اسلام آباد (نمایندا رویل) پوری دنیا وانگوں پاکستان وچ وی محنت کشاں دی عظمت دے اعتراف تے اوہناں نال اکسُرتا دے اظہار دا عالمی دیہاڑ منایا گیا ایہ دن 1886 نُوں شکاگو وچ محنت کشاں ولوں اوقات کار 8 گھنٹے مقرر کرن لئی چلائی جان والی تحریک دے دوران ہون والیاں ہلاکتاں نُوں خراج تحسین پیش کرن لئی منایا جاندا اے۔ محنت کشاں دے عالم دیہاڑ اُتے وزیراعظم عمران خان تے صدر مملکت ڈاکٹر عارف علوی نے وی اپنے خصوصی پیغامات وچ مزدوراں نال اکسُرتا دا اظہار کیتا۔ دوہاں آگوواں نے کرونا وایرس نال متاثر ہون والے محنت کشاں دے حقاں نُوں تحفظ دین بارے حکومتی عزم دا اعادا وی کیتا۔ صدر علوی نے اپنے پیغام وچ محنت کشاں نُوں بنایدی حقاں لئی جرات مندانا تے تعریف جوگ جدوجہد اُتے خراج تحسین پیش کیتا۔ اوہناں نے کہیا کہ ایہ دن نہ صرف محنت کشاں دی جدوجہد دی یاد دواندا اے سگوں قومی ترقی تے خشحالی وچ اوہناں دے کردار دے اعتراف دی عکاسی وی کردا اے۔ صدر نے کہیا کہ کرونا وایرس دے کھلار کارن عالمی معیشت متاثر ہو رہی اے جہدے نال مزدور طبقے اُتے تباہ کن اثرات پے رہے نیں۔ ڈاکٹر عارف علوی نے کہیا کہ پاکستان سنے پوری دنیا وچ لکھاں بندے بیروزگار ہو چکے نیں‘ اوہناں نے ہور کہیا کہ حکومت پاکستان نُوں لاک ڈاؤن کارن مزدوراں دیاں اوکڑاں دا اداراک اے۔ وزیراعظم نے اپنے جاری پیغام وچ محنت کشاں دے معیارِ زندگی وچ بہتری تے رہایش‘ تعلیم تے صحت دیاں بہتر سہولتاں دی فراہمی راہیں اوہناں دی تے اوہناں دے خانداناں دی فلاح و بہبود دے حکومتی عزم دا اظہار کیتا۔وزیراعظم نے کہیا کہ مک وچ کرونا وایرس دے کھلار نے نہ صرف ابادی دی صحت اُتے سنگین اثرات مرتب کیتے نیں سگوں صنعتاں تے فیکٹریاں دی بندش دے براہ راست اثرات نال مزدور پہلے توں ودھ غیر محفوظ ہو گئے نیں۔ ٭٭www.rvel.org