کرونا پاروں  پابندیاں 9 مئی تک مُک جاون گئیاں، دس لکھ نِکے ادارے ہمیش لئی بند ہو سکدے نیں: وفاقی وزیر اسد عُمر۔۔۔۔٭رویل نیوز٭

اسلام آباد (نمایندا رویل) وفاقی وزیر منصوبا بندی اسد عمر نے کہیا اے کہ کرونا وباء دے کارن عاید کردا موجودا پابندیاں 9 مئی تک نافذ رہن گیاں۔ پاکستان وچ 1 کروڑ 80 لکھ بندے بیروزگار ہو سکدے نیں‘ پچھلے کجھ دناں وچ کرونا وایرس نال ہلاکتاں وچ وادھا ہویا اے جو چنگی خبر نہیں اے‘ پاکستان وچ کرونا نالوں ودھ لوک ٹریفک دُکھانت وچ مارے جاندے نیں‘ 10 لکھ چھوٹے ادارے ہمیشا لئی بند ہو سکدے نیں‘ ہر 4 وِچوں اِک پاکستانی دے گھر وچ خوراک دی کمی اے۔ ایہناں خیالاں دا اظہار اوہناں نے ایتھے میڈیا نُوں بریفنگ دیندیاں ہویاں کیتا۔ اسد عمر نے کہیا کہ کرونا وباء دے کارن عاید کردا موجودا پابندیاں دا 9 مئی تک اطلاق رہوے گا‘ 9 مئی توں پہلے وزیراعظم عمران خان دی صدارت ہیٹھ اجلاس ہووے گا جہدے وچ اہم فیصلے کیتے جان گے‘ قومی رابطا کمیٹی 9 مئی دے بعد حکمت عملی بارے فیصلا کرے گی۔ اسد عمر نے کہیا پچھلے کجھ دناں وچ کرونا وایرس نال مَوتاں وچ وادھا ہویا اے جو چنگی خبر نہیں اے‘ ہلاکتاں دی لال لکیر ٹَپ چُکے آں تے روزانا 24 مَوتاں ہو رہیاں نیں پر ابادی دے تناسب نال پاکستان وچ ایہ شرح گھٹ اے‘ ابتدائی دناں وچ سبھ توں ودھ سپین وچ ہلاکتاں ہوئیاں تے پاکستان وچ 10 لکھ شہریاں وِچوں 2 بندے واصل ہوئے‘ اللہ دا کرم اے‘ پاکستان وچ بیماری اینی خطرناک ثابت نہیں ہوئی جنی یورپ وچ ہوئی‘ پاکستان دے مقابلے وچ امریکا وچ 58 گنا تے برطانیا وچ 124 گنا ودھ ہلاکتاں ہوئیاں۔ وفاقی وزیر دا کہنا سی کہ جے ایہ ذہن وچ بٹھا لئیے کہ کرونا نال مَوتاں نُوں صفر کرنا اے تے ایہد ے لئی ایہو جہے اقدامات کرنے پین گے جہڑے انساناں لئی اینے زیادا مہلک ہون گے جو کوئی برداشت نہیں کر سکدا‘ پاکستان وچ 1 مہینے وچ اوسط 4 ہزار 800 توں ودھ لوک ٹریفک دُکھانت وچ ہلاک ہو جاندے نیں‘ پر اسیں ٹریفک نُوں فیر وی اجازت دیندے آں تے گڈی سڑک اُتے چلدی اے‘ کیوں جے ٹریفک اُتے پابند بُہتی نقصان دہ اے۔ اسد عمر نے کہیا کہ ایہ بیماری دنیا وچ جنی خطرناک اے اونی ساڈے ایتھے نہیں‘ پر معاشی نقصان بُہتا اے‘ لاک ڈاؤن نال معاشی طور اُتے حکومت نُوں آمدنی وچ 119 ارب رُپئے دا نقصان ہویا‘ روزگار وچ وڈے پیمانے اُتے کمی آئی اے‘ پاکستان وچ 1 کروڑ 80 لکھ بندے بیروزگار ہو سکدے نیں‘ 10 لکھ چھوٹے ادارے ہمیشا لئی بند ہو سکدے نیں‘ ہر 4 وِچوں اِک پاکستانی دے گھر وچ خوراک دی کمی ہوئی۔ اسد عمر نے ہور کہیا کہ کرونا نُوں مکمل ختم کرنا ممکن نہیں ایہدا کھلار گھٹ کیتا جا سکدا اے‘ یورپ سنے دنیا دے کئی ملک ہولی ہولی روزگار دے پہیے نُوں چلان لئی بندشاں گھٹ کر رہے نیں‘ ہمیشا لئی ملک بند کر کے بَہ نہیں سکدے‘ ساڈا ہدف صحت دے نظام نُوں مضبوط کرنا اے‘ ساڈا صحت دا نظام پچھلے 2 مہینے دے مقابلے وچ ہُن بہتر اے‘ ہولی ہولی بندشاں گھٹ کراں گے‘ روزگار دے موقع ودھاواں گے‘ اگلے دناں وچ وفاقی حکومت سارے صوبیاں نُوں شامل کر کے ہور فیصلے کرے گی۔