کھیڈ

کھیڈ

ظہیر وٹو

اُودرے دینہاں دی لمی قطار ہتھوں گھابر کے میں آپدے گھر دی چھت تے آن بیٹھا۔دیگر ویلے ایہ میری روز دی کرنی ہا۔ ادھ وساکھ دی ڈھلی دُھپ گوانڈھیاں دے چبارے تے ترماندی پئی ہا۔چوکور چھت دے گھبے پاسے ویڑھے وچ لگے امرود دیاں ٹاہنیاں چھت تے کھلریاں ہان۔ویڑھے دی کیاری وچ ہی لگی انگور دی ول نے امرود دے ساوے پتراں نوں انج ولھیٹیا ہا جو ہن امرود دے چٹے پُھل انگور دے جائے لگدے ہان۔میں نِت آپدی سُنجی روح نوں ایہناں پتراں وچ لبھن دا جتن کردا ہا۔ میری ڈونگھی چُپ دیاں وکھیاں وچ کدے پتر کتکتاریاں کڈھدے تے وچوں وچوں کوئی چوبھ مار جاندے۔سُکیاں اکھیں دا لُون روح وچ لاہونا تاں نکیاں لا توں ہی سِکھیا ہا میں۔کدی گلھ تے لاس نہیں ہا پئی روح بھاویں ڈین دیاں ولُوہندراں نال اُتھلی ہوئی ہا۔ اج وی اُودرے دینہاں وچوں اک نوں ولاون کار لگیا ہا جو گھر دے دو بال چھت تے کھیڈن آگئے۔بھجاون نوں من کیتا تاں چیتا آیا جو بالاں نال کھیڈن یاں ویکھن خُشی دا راہ ہوندا۔

دوہاں نے میرا دھیان کیتے بناں کرکٹ کھیڈنی شروع کر دتی۔ میں گھوہ کیتا کہ اوہناں بلے گیند توں بناں ہی کھیڈ شروع کر دتی ہا۔میرے ہونٹاں تے ہاسے رنگی کوئی شئے آئی۔نکے نے وڈے تے دان کردیاں پُوہل(بیٹنگ) دے چھڈی۔ بولر نے وڈی بھاج مگروں ایکشن لیندے گینڈ سٹی تاں بیٹسمین واء وچ کوچی موچی دابلا گھما دتا۔ان ویکھی گیند مگر دوہاں کھڈکاریاں تے اک تماشائی نے اکھاں اسمان ول کیتیاں۔ دوہاں دے آہراں توں لگیا جو فیلڈر وی گیند دے تھلے تھلے بھج رہیا۔میں وی پکا ہو گیا ایس گل تے۔بولر نس ویکٹ تے ہویا جیہڑی وکھائی نہیں ہا دیندی۔رن آؤٹ لئی سارا جتن ہویاپر دو سکور پورے کر بلے آلا گریز وچ ہا۔بولر کہیا جو پہلا سکور پورا کرن ویلے بلے باز گریز وچ بلا لائے بناں ہی مُڑیا ہے سو اک سکور متھیجسی۔نکے رولا پایا پر وڈے دے پُوہل دیون دے احسان تے اوس دی وڈیائی موہرے ہار من اک سکور تے ہی چُپ کر گیا۔دوجی واری بولر بھجیا،ایکشن لیا تے ان ویکھی گیند نے ان ویکھی وکٹ اُڈا دتی۔ان ویکھے ایمپائر اگے زوردار اپیل ہوئی، انگل اُٹھی ویکھ بولر چھال ماردیاں بیٹسمین آن بنیا۔میں وی بناں سوچے، سمجھے تے ویکھے تاڑی مار چھڈی۔کھیڈ بڑی پھسی ہوئی لگی۔روٹی،پانی، دُکھ تے بُھکھ ہر شئے بُھلی ہا مینوں۔بس کھیڈ ویکھن جُڑیا ہا۔ وڈے دی واری ہا ہن۔نکے نے بھج گیند کرائی تاں بلا واء وچ گُھمیا تے نال ہی بیٹسمین دی واج آئی ”چھکا“۔ مُڑ کیہ سی ہر گیند میدانوں باہر۔ان ویکھے فیلڈر،ایمپائرتے تماشائی سارے بیٹسمین دی بیٹنگ دا سواد لئے رہے ہان۔بولر دے مُڑھکے چُھٹے ہان پر واری نہ آئی۔

فون دی گھنٹی وجی تاں میں تربھکیا۔ کسے کپڑیاں دے برانڈ دی سیل دا مسیج ہا۔ ایہناں نوں کرونا دے لاک ڈؤن وچ وی اَرام نہیں ہور نہیں تاں گھر ویلھے بیٹھے آن لائن ایہناں نوں تاں کجھ وٹاؤ۔ایسے مسیج میرا دھیان بالاں دی کھیڈ توں ہٹاہا۔من وچ سوچیا ’کڈے موجی نیں بِنا کسے شئے دے ہی سارا میچ کھیڈ گئے‘۔ فون ہتھیں آیا تاں اوہدے آہرے لگ گیا میں۔ فیس بُک کھولی تاں ’اردو پوائنٹ‘ دے پیج تے کرونا دی سازش بارے اک ویڈیو ہا۔ اکھے: کرونا یہودیاں دی سازش ہے۔ دجال نوں لیاون، تے پوری دنیا وچ اکو حکومت بناون دا آہرہے۔ وائیرس قابو کرن لئی اک ویکسین تیار ہوسیں جس دے راہیں مائیکرو چپ بندیاں اندر لگسی، جیس دا قابو G-5 گھمبیا راہیں کیتا جاسیں۔ جگ دے ہر بندے دا دماغ مگر بیٹھے کسے ان ویکھے دیوتے دے ہتھ ہوسیں‘۔

میں ٹھنڈا ساہ بھر موبائیل دی سکرین تے انگوٹھا پھیریا۔جگ دے کئی مُلکاں وچ کرونا دی تباہی وکھالی دتی۔ بند تے ویران بازاراں، گلیاں دے فوٹو۔ یورپ،ایشیا تے ہور کئی تھاواں دیاں فوٹواں۔ ٹُردیاں ٹُردیاں ’کرونا دا عذاب کشمیر دے کرفیو دا کارن‘ بارے سٹیٹس اکھوں لنگھیا۔ اک بیلی دا سٹیٹس آیا:’ٹرمپ دے مگر چین دا ہتھ ہے، اوہناں سرمایا لا، ایس نوں تاہیوں جتایا جے امریکہ دا بھٹا بہا آپ سُپر پارو بننا چاہندا ہے‘۔ اگانہ ہی تُرک ڈراما ’ارطغرل غازی‘ دی چڑھتل ویکھی۔ اک اینکر دی ویڈیو ہا:’پہلی وڈی جنگ مگروں عثمانیہ سلطنت نوں توڑ بانھ لگی ہا جہڑی ویہہ سو تیئی وچ مُک رہی، ارطغرل دے پتر عثمان شاہ توں عثمانیہ سلطنت دا مُڈھ بجھیا ہا۔ ایہ ڈراما اوس کڑی نال جُڑن دا آہر ہے‘ ۔اگلے سٹیٹس وچ ’دیسی نابراں تے ڈرامے وکھان دی گل ہا۔ کجھ ناں وی لکھے ہان۔ رائے احمد خاں کھرل، دُلا بھٹی، نظام لُوہار، جبرو نائی تے کئی ہور۔ کئی بیلی ’دیسی‘ گل نوں مندے نگے آئے پر ناں ٹیپو سُلطان تے محمد بن قاسم دا لکھیو نیں۔ راجا دھر دا ناں وی اکھوں لگھیا۔ فیس بُک توں تنگ آ میں گوگل نیوز کھولی تاں پہلی خبر اک سوانی وزیر نوں ہٹھا اوس دی تھاویں کوئی ہور وزیر بناون دی ہا۔

موجی بال حالے وی بناں کسے شئیے دے ہی کھیڈ کھیڈی جاندے ہا۔

٭٭٭٭٭