مٹی دا پُتلا

مٹی دا پتلا

کدی کدی انسان بہت کجھ کرن دی لگن وچ اپنے آپ توں وی اگے گزر جاندااے پر اوہ اپنے پریوار نوں کدی وی پچھے نہیں چھوڑدا انسان اک مٹی دا بت اے ایس بت نوں اسے مٹی دا گھن لگ جاندااے جہڑا کہ ایہنوں اندرو اندری کھادی جاندااے ایہ مضمون خاص طور تے عمران ہاشمی(فلم سٹار) دے پتر ایان ہاشمی لئی اے.ایس توں بعد دِشا سیٹھی تے اوہناں بیمار لوکاں لئی اے جہڑے جیون تے قضا دے وچالے جیون جی رہے نیں ہن اسیں اصل گل ولے آندے ہاں کجھ دن پہلاں میں اردو پنجابی دیاں کتاباں تے ایوارڈ دین دا اعلان کیتا سی ایس اعلان نے بڑی دور تیکر سفر کیتا اے.اتے مینوں بہت سارے ادبی دوستاں نے اپنیاں لکھتاں گھلیاں نیں جہدے وچ سبھ توں سچجی،ستھری تے جگر نوں زخمان والی لکھت عمران ہاشمی جی ہوراں دی سی. انج تے اوس لکھت دا اردو وچ ترجما سید محمد عمر شاہ ہوراں نے کیتا اے.

عمر جی ہوراں نے اوہ اعلان سن کے مینوں اپنا ترجما ڈاک راہیں گھلیا اے میں ایتھے عمر جی ہوراں دا شکر گزار ہاں کہ اوہناں نے ایہدی وڈی کتاب دا ترجما کیتا تے مینوں وی ایہ کتاب پڑھن دا موقع دتا ہن تسیں سوچ رہے ہوو گئے کہ کتاب اردو دی اے تے حیدر جی ہوراں نے مضمون پنجابی وچ الیکیا ہویا اے.ویسے تہاڈا سوچنا تے میرے توں سوال کرنا حق بندا اے پر کیہ کراں میں اپنی ساکھ،اپنی رہتل،اپنی بولی نہیں چھڈ سکدا.میرا اندرلا انسان مینوں خورے کیوں ایس گل تے بار بار مجبور کر رہیا سی کہ میں ایہدا مضمون پنجابی وچ الیکاں کتاب تے گل کردیا ہویاں ایس کتاب دے مترجم سید محمد عمر شاہ ہوریں نیں تے ایس دا سر ورق تیار کرن والے وی سید محمد عمر شاہ جی نیں. ایس کتاب دی کمپوزنگ اتہاس پرنٹر ولوں کیتی گئی اے ایس کتاب دا فلیپ جہناں متراں نے الیکیا اے اوہناں دے ناں درج ذیل نیں شکیل نورانی جی (بالی وڈ فلم پروڈیوسر،ڈائریکٹر، فلم رائٹر ممبئی مہاراشٹر بھارت) روہن کپور جی (ممبئی مہاراشٹر بھارت) انجو بالا جی (سینئر صحافی پیرس) ایس کتاب دا پیش لفظ جس متر نیں الیکیا اے اوہناں دا ناں اکشے کمار (فلم ایکٹر ممبئی مہاراشٹر بھارت) اے ایس دا چڑھاوا عمران ہاشمی جی ہوراں اپنی پتر سپر ہیرو ایان جی ہوراں دے ناویں کیتا اے تے سید محمد عمر شاہ جی ہوراں نیں ایس دا دوجا چڑھاوا دشا سیٹھی جی ہوراں دے ناویں کیتا اے ایس وچ موجود کہانیاں دی گنتری 14 اے.عمران جی ہوراں نیں آپ بیتی تے ایان اتے بیتی دا ذکر ایہناں کہانیاں وچ کیتا اے.

میں ایہناں کہانیاں نوں پڑھ کے اکو ای سبق حاصل کیتا اے کہ ساڈے اندر بہت ساری بیماریاں نیں جہڑیاں گھن دے وانگوں سانوں اندرو اندری کھا رہیاں نیں.پر اسیں ایہناں بیماریاں دا علاج نہیں کروا رہے آں.سانوں ایہناں بیماریاں نال لڑنا پینا اے ایہناں دا بروقت علاج کروانا پینا اے کوئی وی بیماری ایڈی وڈی بیماری نہیں ہوندی ہر بیماری دا علاج اللّٰہ پاک نے دسیا اے انسان نوں ایہناں بیماریاں دا علم ہو جاوے تے اوہ ایہناں دا علاج کروان وچ دیری نہ لاوے.کیوں جے جیون بہت وڈی نعمت اے مرنا تے ہر بشر نے اے پر بیماریاں دے نال مرنا کوئی انسان نہیں چاہندا ایان اک کینسر دا مریض سی پر اوہدے باپو عمران جی ہوراں نیں اوس بیماری دا کھوج کڈھیا تے اوہدا علاج کروایاایس ویلے ایان کینسر جہی موزی مرض توں چھٹکارا پا گیا اے دشا سیٹھی جی تھیلیسیمیا ورگی بیماری نال لڑ رہیاں نیں پر جیون دی اِچھا اوہناں نوں ایس بیماری دا مقابلا کرن دی ہمت دے رہی اے ایس طرحاں ہور وی ببتھیر ے لوک ساڈے آل دوال موجود نیں جہڑے کہ ایہناں بیماریاں نال لڑی جا رہے نیں تے ایہناں دا مقابلا کیتی جا رہے نیں. ساڈے لئی رب العالمین نے بڑیاں بڑیاں نعمتاں دا پربند کیتا اے اسیں اپنے سچے تے سُچے رب اکبر دا شکر ادا کردے ہاں کہ اوس نے سانوں اپنیاں نعمتاں توں نوازیا اے صحت مندی سب توں وڈی نعمت اے. سانوں ایس نعمت دی رکھوالی کرنی چاہی دی اے. آخر تے ایہناں کہواں گا کہ تسیں وی ایس کتاب دا مطالعا کرو تے اپنے اندر لکیاں مرضاں دی تشخیص کرو تے اوہناں دا علاج کرواؤ کسے غریب، نادار، مریض دی مدد ضرور کرو کیوں کہ صدقا ہر بلا ، مصیبت، مشکل،مرض نوں ٹال دیندا اے ۔