کرونا دا کھلار روکن لئی لوکائی احتیاط دا دامن نہ چھڈے:   سردار عثمان بزدار۔۔۔٭رویل نیوز٭

لاہور (نمائندا رویل) وزیر اعلا پنجاب سردار عثمان بزدار نے کہیا اے کہ کرونا وباء دا کھلار روکن لئی لوکائی نُوں احتیاط دا دامن نہیں چھڈنا چاہیدا۔ گھر وچ رہن‘ محفوظ رہن اُتے عمل کر کے شہری آپ تے دوجیاں نوں کرونا توں بچان۔ کرونا دا کھلار روکن لئی سماجی فاصلے برقرار رکھنا تے ایس او پیز اُتے عملدرآمد بے حد ضروری اے۔ وزیر اعلا عثمان بزدار نے کہیا کہ شہریاں توں اِک واری فیر اپیل کردا آں کہ اوہ بغیر ضرورت گھراں توں نہ نکلن کیوں جے لوکائی دے تعاون نال ای کرونا اُتے قابو پایا جا سکدا اے۔ کرونا توں بچن دا کلا حل گھراں وچ رہنا اے۔ اوہناں نے کہیا کہ میلجول جنا گھٹ ہووے گا‘ اونا ای بیماری دا کھلار گھٹ ہووے گا‘ کرونا توں بچاء لئی شہریاں نُوں احتیاطی تدبیراں اختیار کرنیاں پین گیاں۔