پہلی جون توں تعلیمی ادارے کھولن بارے کوئی فیصلا نہیں ہو سکیا: وفاقی وزیر تعلیم۔۔۔٭رویل نیوز٭

اسلام آباد (نمائندا رویل) کرونا وایرس دے کھلار دے دھڑکو دے پیش نظر صوبیاں وچ پہلی جون توں تعلیمی ادارے کھولن اُتے اتفاق نہیں ہو سکیا اے۔ پنجاب‘ بلوچستان نے پہلی جون توں تعلیمی ادارے کھولن دی مخالفت جد کہ خیبر پختونخوا نے حمایت کیتی۔ وفاقی وزیر تعلیم شفقت محمود دی صدارت ہیٹھ کانفرنس وچ پنجاب‘ بلوچستان تے سندھ نے کہیا کہ کرونا ویارس دے کھلار دا دھرُکو اے‘ پہلی جون دے بعد وی سارے تعلیمی ادارے بند رکھے جان گے۔ پر خیبر پختونخوا دے وزیر تعلیم نے اختلاف کردیاں ہویاں کہیا کہ بچیاں دی تعلیم دا حرج ہو رہیا اے۔ پہلی جون توں تعلیمی ادارے کھلنے چاہیدے نیں۔ صوبیاں وچ سکولز کھولن اُتے اتفاق نہ ہویا جہدے بعد فیصلا کیتا گیا کہ معاملا قومی رابطا کمیٹی دے جمعرات نُوں ہون والے اجلاس وچ غور ہیٹھ لیاندا جاوے گا۔ بین الصوبائی وزرائے تعلیم کانفرنس وچ صوبائی وزیراں نے ویڈیو لنک راہیں رلت کیتی۔ وسیلیاں مطابق اجلاس وچ پنجاب دے تعلیمی اداریاں دیاں چھٹیاں جون دے آخر تک ودھان جد کہ امتحانات منعقد کرن دے حوالے توں وی تجویز دِتی گئی۔ اجلاس نُوں تجویز دِتی گئی کہ جون وچ لاک ڈاؤن ختم کیتا جاندا اے تے 9 ویں تے انٹر دے امتحانات کروائے جا سکدے نیں جد کہ جولائی تک لاک ڈاؤن رہیا تے 3 جماعتاں دے امتحانات منعقد کرنا مشکل ہووے گا۔