وفاقی حکومت تے مسلم لیگ ق وچ فاصلے ودھن لگے،ق لیگ نے اتحادیاں توں جواب منگ لیا۔۔۔۔۔٭رویل نیوز٭

اسلام آباد (نمائندا رویل)نیب وچ چودھری برادران دے خلاف دُبارا تحقیقات کھلن دیاں اطلاعواں اُتے وفاقی حکومت تے مسلم لیگ ق وچ فاصلے ودھن لگے۔ 19 سال پرانیاں فالاں کھُلن دے معاملے اُتے مسلم لیگ (ق) اِک واری فیر پی ٹی آئی قیادت نال ناراض ہو گئی‘ ق لیگ نے تحفظات اُتے اتحادی قیادت توں جواب منگ لیا۔ مسلم لیگ (ق) دے آگوواں نے تشویش دا اظہار کردیاں ہویاں کہیا کہ منصوبا بندی دے تحت نشانا بنایا جا رہیا اے‘ اتحادیاں نُوں دباء وچ لیان دی کوشش کیتی جا رہی اے۔ ایس توں بعد مسلم لیگ ق نے ہر بدلدی صورتحال اُتے پارٹی دے اندر مشاورت دا فیصلا کتیا اے تے پارٹی قیادت نے قانونی تے عدالتی فورم اُتے ریلیف حاصل کرن دے سارے آپشنز استعمال کرن اُتے اتفاق کیتا۔ مسلم لیگ (ق) دے آگوواں نے مؤقف اختیار کیتا کہ اثاثا جات کیس 20 سال پرانا اے‘ سبھ توں پہلے انکوایری دا مشرف دور وچ ساہمنے کیتا‘ 17 سال انکوایری چلن دے بعد کیس 2017 وچ بند کیتا گیا‘ ملازمتاں دین دا کیس 34 سال پرانا اے‘ ایس کیس نُوں وی نیب دا پراسیکوشن ونگ بند کرن دی سفارش کر چکیا اے‘ قرضیاں دی معافی دا کیس وی بے بنیاد‘ تفتیشی بند کرن دی سفارش کر چکے نیں‘ ایہناں حقایق دے تناظر وچ نیب دا کیسز چلائے رکھنا سرا سر بدنیتی اے‘ نیب دا ادارا اپنی ساکھ مکمل طور اُتے کھو چُکیا اے۔ مسلم لیگ ق دے آگو کامل علی آغا دا کہنا سی کہ اسیں انصاف لئی عدالت نال رجوع کیتا اے‘ حکومت تے نیب سنے ساریاں نُوں عدالتی کیس وچ اپنی پوزیشن واضح کرنی اے‘ اتحادی معاملات دا انحصار حکومتی رویے اُتے اے۔