ڈیجیٹیلائزیشن، پنجابی تے پنجابیکا

الیاس عباسی May 08, 2020

الیاس عباسی

ڈیجیٹل انقلاب پاروں اجوکی دنیابدل گئی اے ایہوکارن اے کہ دُنیا دیاں وڈیاں کمپنیاں اپنی انتظامیاتے ورکراں نوں ایس تبدیلی توں فائداچُکن لئی تربیت تے سِکھان داعمل کرواندی نظرآوندی اے دنیادی وڈی معیشت والے ملکاں نے منصوبابندی شروع کردتی ہوئی اے ساڈے گوانڈھی ملک بھارت دے وزیراعظم نریندرامودی ہوراں تاں مستقبل دی سانجھ دانعراوی لائی بیٹھے نیں ایس ڈیجیٹل انقلاب نے آن آلے کل بارے وچاربدل دتے نیں کوئی کل یعنی فیوچرنوں بنان دا جتن کررہیااے تے کوئی سانجھے داری راہیں اگے ودھن دی دوڑوچ شامل اے ایسے لئی ایس مصنوعی زہانت ، جہنوں انگریزی وچ آرٹیفیشیل انٹیلیجنس آکھیاجانداےاوہداشورہرپاسے سُنائی دے رہیااے مغرب آلیاں ایس تے کم تیزکیتاہویااے تے مشرق دے وسنیک جاپان، چین ، کوریا تے ہندوستان وی ایس کھیتر وچ اگے ودھ رہے نیں ہُن دنیاپرانے ڈھنگ نال نہیں چلائی جاسکدی ساڈارہن سہن داطریقا، کھاناپینا بلکے ہرشے بدل گئی اے ایس تبدیلی نیں تے انسان دی سوچ وی بدل چھڈی اے اج داانسان اپنے ماضی توں سبق سِکھدیاں مستقبل تے قبضے بارے سوچ رہیاتے اوہدے لئی کوششاں تیزکردتیاگئیانیں اج داڈاکٹر، سائنسدان، کاریگر، سرمایادار ، کہانیکار، لیکھک تک دیاں سوچاں بدل گئیاں نیں تے ایہداوکھالا صحافت وی پئی کردی اے ڈیجیٹل لوڑاں نے ایس انڈسٹری نال جُڑے کئی ٹبراں دی روٹی ختم کیتی اے تے اوتھے ای، اوہناں لوکاں لئی موقع وی کڈھے نیں جہڑے کسے طرحاں ایس کھیتر وچ اپنا ناں نہیں بناسکدے سن اج آن لائن اخبارتے ای ریڈنگ نے پلپ انڈسٹری نوں ہِلاکے رکھ دتا تے ساڈے ورگے ملکاں دے لکھاریاں لئی موقعے وی نکلے نیں اوہ اپنی تخلیق تے صلاحیت پاروں دنیا وچ اپنے کم راہیں ناں کماسکدے نیں ہن دنیا کمپیوٹرتوں اگے جارہی اے ماڈرن ازم توں نکل کے پوسٹ ماڈرن ازم وچ پوہنچ گئی اے تے ایس تبدیلی دی اُکھاڑپچھاڑ چےاوہوقوماں اگے ودھدیاں نیں جہڑیاں ترقی پسند ہوندیاں نیں جہڑیاں زمانے نوں سمجھدیاں صحیح فیصلے کرن دیاں جرُت رکھ دیاں نیں ایس دھرتی توں نکل کے مریخ تے جان دی ریس تے اپنے لوکاں لئی کجھ کرن داجزبا اج دی لوڑاے جہڑی ساڈے ملک دے آگواکول نہیں ۔ سوشل میڈیانے پرنٹ ہورتے ہور الیکٹرانک میڈیانوں پِچھے چھڈدتااے ایسے لئی ترقی یافتاملکاں دیاں کئی وڈیاں کمپنیاں نے ایس کھیتر وچ ماہراں دی ٹیم رکھی ہوندی اے جہڑی اوہناں لئی کم کردی اے کیوں جے ایہ اک ایساٹول اے جہدے راہیں تسی اپنے صارف دے زہن نوں کنٹرول کرلیندے او۔ Buying Behaviour نوں سمجھنا تے اوہنوں اپنے ول موڑن لئی ایہ ودھیافورم اے جتھے پوری دنیااک کلک تے ہوندی اے سائنسی اندازنال ساڈیاں سدھراں ، پسندناں پسند نوں بنایاجاندااے کئی تھنک ٹینک ایسے فورم راہیں اپنے نظریات لوکائی تک اپڑاندے نیں عرب وچ انقلاب لیاون وچ ایسے سوشل میڈیادا بھرواں کرداررہیا عرب آمراں خلاف ایسے میڈیانوں خوب ورتیا گیا جہدے وچ مغرب طاقتاں وی اپناحصاپایا۔ اج فیسبک تے پنجابی دے مشہورشاعرتوقیرچغتائی ہوراں اک لنک اپنے چاہون آلیاں نال ونڈیا تے سدادتاکہ پنجابی شاعری نوں پسند کرن آلے آن لائن رلت کرکے پنجابی مشاعراسُن سکدے نیں ایہ آن لائن مشاعرا پنجابیکاولوں کیتاگیا جتھے انٹرنیٹ راہیں ، ایس لاک ڈان دے سمے لوکاں نوں پنجابی دے شاعراں نوں سُنن داموقع ملیا ایس فورم نوں استعمال کرن تے پنجابیکا تے ایس مشاعرے وچ رلت کرن آلے شاعراں دی حوصلاافزائی کیتی جانی چاہیدی اے کیوں جے اجوکی دنیاچوتھے وڈے صنعتی انقلاب پاروں بدل چکی اے تے ہن ملٹی ٹاسکنگ دے ایس دور وچ شاعری سُن دیاں ہورکم وی کیتے جاسکدے نیں یوٹیوب چلان آلے دانکاجہیاآئیڈیا اک حقیقت بن چکیااے تے ایسے یوٹیوب راہیں پڑھیاراپنی تعلیم تے جانکاری وچ وادھاکردے نیں پنجابی زبان دنیا دی وڈیاں زباناں وچوں اک اے تے ہن سانوں وی چاہیدااے کہ اسیں نویں ویلے دیاں لوڑاں تے علم نوں پنجابی وچ ودھائیے قدرت داقانون بدلیانہیں جاسکدا ہوند اوسے دی رہندی اے جہڑاطاقت رکھ دااے تے طاقت آن آلے ویلے نوں سمجھنا تے اپنے آپ نوں ایس قابل بنانااے کہ اسیں کل وی رہییے تے دنیادی بھلیائی وچ اپنا حصاپاوندے رہیے ہن اسیں گلوبل ویلیج توں نکل کے پوسٹ ماڈرن ازم وچ آگئے آں تے پنجابیاں لئی ضروری اے کہ آرٹیفیشیل انٹیلیجنس تے انٹرنیٹ توں فائداچُک دیاں ، پنجابی داناں ، پنجابی داکلام ، پنجابی شاعراں دی سوہنی سوچ نوں پوری دنیاتیک اپڑائیے

پنجابیکا دے فیس بک پیج مطابق ایہ اک ادبی تنظیم اے تے ایس دے پہلے آن لائن مشاعرے وچ ہورکئی مشہورناواں چوں نصیراحمد، صفیہ حیات، بیناگوئندی، مصطفٰی انور، عدنان آصف بھُٹہ، بدرسیماب، صغیرتبسم تے نیرصدیقی ہوراں کیتی تے آن لائن مجمانی اعظم ملک تے صدارت رائے محمدخان ناصرہوراں کیتی

شاید ساڈے پنجابیاں لئی ایہ اک نواں تجرباہووے گا تے آون آلے سمے اجہے سیشن بارے تحقیقی مقالے تے فیچر وی پڑھے جان گئے جہدافائداپنجاب تے پنجابیت نوں ہووے گا تے جہدوں وی ایس کھیتر وچ کوئی کم یاں تحقیق ہووے گی تے پنجابیکادی ایس کاوش نوں ہمیشاں سلاہیاجاہووے گا کوئی وی کم پہلی واری شروع کرنا سوکھانہیں ہونداکیوں کہ مائنڈسیٹ نوں چیلنج کرنا تے تبدیلی ول موڑن لئی پہلے فطری عمل نوں انگریزی گورو ،،ڈینائیل فیز،، آکھدے نیں آس کیتی جاندی اے اجہے آن لائن میلے سجدے رہنے چاہیدے نیں تے ایہدے وچ بدیسی کہانیکاراں ، شاعراں ، کالم نگاراں تے ایسے کھیتر وچ کم کرن آلیاں نوں وی رلت لئی سدادِتاجاناچاہیدااے تاں جے سبھ بغیر کسے ونڈ، جھگڑے دے صرف اک مقصدپنجابی لئی کم کرن تے لوکائی لئی چانن داکارن بنے۔

٭٭٭٭٭