kraamaat@gmail.com
+ +92 333-430-6384


سلو نوں کرونا ہو گیا


اصغر علی بلوچ May 09, 2020


سلو نوں کرونا ہو گیا

۔۔۔۔۔۔۔۔۔۔۔۔۔

اصغر علی بلوچ

ساری دنیا وچ کرونا دی وبا کھلری ہوئی سی ۔ کیہ وڈے تے کیہ نِکے سارے ملک اس ڈائن دے ہتھوں تنگ سن ۔ ہسپتال مریضاں نال بھرے ہوئے سی تے گستاناں وچ میتاں دفنان دی تھاہراں نہيں سی ۔ لاک ڈاؤن تے کرفیو پاروں لوک گھراں وچ قید سن کیوں جے اس وائرس توں بچن دا صرف ایہو حل سی پئی لوک اپنے ورگے لوکاں توں وِتھ رکھن ہور تے ہور اکے گھر دے جی وی اک دوجے توں دور رہن تے مجبور سن ۔ سیانے کہندے سن پئی ایہ وبا انساناں نوں جنوراں توں چمبڑی سی کیوں جے انساناں حلال حرام دی تمیز کرنی چھڈ دتی سی ۔ ایہ وبا سبھ توں پہلے چڑھدے ول دا اک شہر بنیا جتھوں دے لوک چام چٹھی ' سپ تے ٹھونہے شوق نال کھاندے سن ہور تے ہور اوہ کتے بلے تے کھوتے وی کھان توں پرہیز نہیں سن کردے ۔ ایہ اک اجہی بیماری سی جس دا کوئی علاج نہیں سی ۔ عام نزلے زکام ورگی ایہ بیماری اچانچک بخار چڑھن تے کھنگھن پاروں ساہ دی تنگی دا کارن بن جاندی تے نمونیے دی شکل وٹا کے انساناں دے پھیپھڑے تباہ کر چھڈدی تے ساہ نہ آؤن وجوں انسان تڑپ تڑپ کے مر جاندے ۔ ایہ بیماری کیہ سی کوئی آفت سی جہینے ہر پاسے ات مچائی ہوئی سی ۔ وڈیری عمر دے بابے ایہدی اکو جھاٹ وچ ای مک مر جاندے ۔ اس وبا دے اپاء دا کسے نوں وی پتا نہیں سی ۔ اینے تیک پئی وڈے نکے وید حکیم توں کے لے انگریجی ڈاکٹر وی اس دے علاج توں انجان سن ۔ انسان قدرت اگے اینا بے بس ہووے گا کدیں سوچیا وی نہیں سی ۔ وڈے وڈے امیر ملک وی اس وبا دے ہتھوں کنڈ پرنے ڈگ پئے سن ۔ ہینے تے غریب ملک تے پہلے ای مرے مکے پئے سن ۔ ساڈے ملک وچ ایہ وبا سبھ توں پچھے آئی پر ایہدا زور اینا اچانچک تے ڈاہڈا سی پئی ساڈی حکومت دے پیر اکھڑن لگ پئے ۔ دھمی شام ایہدے اپاء لئی سرکاری سطح دے اکٹھ ہون لگ پئے تے اپنی کمزور معشیت دا رونا لے کے ساڈے آگو دنیا ساہمنے جھولی کھلارن تے امداد منگن لگ پئے ۔ اک پاسے ڈاکٹری تے طبی سامان دی گھاٹ سی تے دوجے بنے لوکی لاک ڈاؤن وجہوں کم کار بند ہون پاروں بھکھے مر رہے سن ۔ حکومتی مشینری اپنی طاقت موجب لوکاں وچ راشن تے نقد پیسے ونڈ رہی سی پر اوہدے وچ وی کئی وچارے دھمی شام دے دھکے کھا کے خالی ہتھ پرتن تے مجبور سن ۔ جتھے جتھے راشن ونڈیا جا رہیا سی اوتھے اوتھے لوکاں دا میلا لگیا ہوندا سی ۔ ماسی سلو وی راشن لین والیاں وچ شامل سی ۔ اوہ ادھکڑ عمر دی سوانی سی جہدا نک نقشا دراوڑاں ورگا سی ' کالا رنگ تے چچیاں اکھیں اوہنوں ہور وی کوجھا بنا دتا سی ۔ سنیا اے اوہدی شادی وی ہوئی سی پر وسا تے نبھا نہ ہویا تے جھب ای اپنے پیکے واپس پرت آئی ۔ پیکیاں وچ وی اک بھرا توں علاوہ کون رہ گیا سی ۔ اوہدے بھرا نوں ڈڈیاں کناں تے ونگے ہتھ پیراں دی وجھا توں پنڈ واسی ڈڈی آکھدے سن ۔ اوہدی وی شادی ہوئی پر ہیٹھ اتے تن دِھیاں جمن مگروں اوہدی گھر آلی مر گئی تے ہن سلو نوں اوہدے بال بچیاں دا فکر کرنا پوندا ۔ اوہ وچاری پنڈ دے گھر گھر جا کے لوکاں دے کپڑے لیڑے تے بھانڈے ٹنڈے مانجھدی تے وچے وچ اپنیاں بکریاں کان گھاہ کھوتر کے گزارا کردی ۔ کرونے دی وجوں پنڈ دے لوکی وی محتاط ہو گئے سن تے سلو نوں کم کار لئی گھٹ ودھ ای گھر وڑن دیندے پئی کدھرے اس دے نال وائرس اوہناں دی دہلیز ٹپ کے اندر نہ آ جاوے ۔ اوہ وچاری حکومتی امداد لئی بتہیرا نسی پر اوہدے کول نہ تے موبائل فون سی تے نہ ای آن لائن امداد لین لئی کوئی ہور ذریعا سی ۔ اخیر اوہنے اپنے پنڈ دے دُکاندار نوں منت ترلا کر کے پنجاہ روپیاں بدلے اوہدے موبائل فون توں حکومتی امداد لئی اپلائی کرایا تے اُڈیک لا کے بیٹھ گئی پئی اوہنوں وی حکومت ولوں باراں ہزار روپیے ملسن تے اوہ گھر دا راشن لے کے گزارا کر لیسی ۔ کجھ دناں بعد پنڈ دی مسیت وچ اعلان ہویا پئی تحصیلوں جا کے امداد دے مستحق حکومت ولوں باراں ہزار لئے سکدے نیں ۔ سلو نوں تے پر لگ گئے اوہ بھاویں رات دی بھکھی سی پر سوقتے ای شہر نوں ٹر پئی ۔ اک وڈے سارے میدان وچ تنبو لگیا ہویا سی تے گیٹ تے پُلس دا پہرا سی ۔ زنانیاں دا اینا رش سی پئی اک دوجی دی ارک نال ارک تے وکھی نال وکھی وجدی سی ۔ نہ کوئی سماجی دوری دا خیال کر رہی سی تے نہ ای مونہ تے ماسک لان دا سلسلا سی ۔ بس انھے واہ اوہ سبھ زنانیاں اک دوجی نوں دھکے دے کے تے پیر مدھ کے اگے نکلن دا چارا کر رہیاں سن ۔ جدوں پیسے ونڈن دی واری آئی تے پلس آلیاں زنانیاں نوں قطاراں بنان دا حکم دتا پر اوتھے کون مندا سندا سی ۔ اخیر پُلس نوں سختی کرنی پئی تے اپنے روایتی طریقے ورتنے پئے مڑ کیہ سی ہر پاسے بھاجڑ پئے گئی تے زنانیاں دا چیک چہاڑا مچ گیا ۔ سلو وچاری اَٹھ پہر دی بھکھی سی تے دھپ تے کھلو کھلو کے بے ہوش ہون لگ پئی ۔ عملے تے پلس دے بندے اپنی جان پچھان آلی زنانیاں نوں حیلے بہانے نال لائناں توں کڈھ کے اگے لئے جاندے تے پیسے ونڈن آلی کھڑکی دے نیڑے کر دیندے ۔ کئی بیمار تے لاغر بڈھیاں اپنی واری نوں اڈیکدیاں اڈیکدیاں زمین تے ڈگ پیندیاں تے فیر ہمت کر کے اٹھ کھلوندیاں ۔ اخیر کدھرے شام دے نیڑے سلو دی واری آئی ۔ اوہنے اپنا شناختی کارڈ کڈھیا تے کاؤنٹر تے بیٹھے ملازم نوں پھڑا دتا اوہ گوہ نال کارڈ نوں ویکھدا رہیا تے ساہمنے پئے رجسٹر تے سلو دا انگوٹھا لگوا لیا پر پیسے گِنکے اپنی جیب وچ رکھ لئے تے اوہنوں آکھیا :

" تیرا شناختی کارڈ ایکسپائر ہو گیا اے بی بی توں نواں شناختی کارڈ بنوا کے لیائیں تے پیسے لئے جاویں ۔ "

سلو وچاری کھلی کھلوتی زمین تے ڈھیہ پئی ۔ نال دیاں اوہنوں چک کے اِک پاسے کیتا ۔ کسے ترس کھاندیاں اوہنوں پانی پوایا تے ہتھ پیر ملے ۔ اوہنوں کجھ ہوش پھریا تے اوہ اٹھ پئی ۔ ہن اوہنوں پنڈ پرتن دی پریشانی سی ۔ نہ کرایا بھاڑا تے نہ ای اس ویلے کوئی ہور بوہا جتھے رات گزار لیندی ۔ اخیر اوہ پیدل ای پنڈ ولے ٹر پئی ۔ سارے دِینہ دی گرمی تے ہسڑ دے بعد شامیں رول بوءلیں اچانچک بدل تے ہنیر چڑھیا تے اوہ وچاری مینہ وچ بھجدی بجھاندی ' ڈگدی ڈھاہندی رات نوں گھر مڑی ۔ اوہدا پنڈا کوسا کوسا سی تے انگ انگ پیڑ کر رہیا سی ۔ سارا دِینہ بھکھی تَسی رہ کے تے کھلو کھلو کے نالے شہر توں پنڈ تیک پیدل آ جا کے اوہ اجہی بیمار ہوئی پئی ساری رات کُرلاندی رہی ۔

دھمی اٹھیجی تے اوہنوں کھنگھ تے نزلے زکام دی شکایت وی ہو گئی ۔ اوہنے فیر وی ہمت کیتی تے پنڈ وچ کم کار لبھن نکل پئی ۔ اوہ کھنکھدی تے نچھدی جس گھر وی وڑدی اوہنوں بوہے توں ای واپس پرتا دتا جاندا پئی ایہ بیماری کتھوں آ گئی اے ۔ شام تیک سارے پنڈ وچ ایہ گل عام ہو چکی سی پئی سلو نوں کرونا ہو گیا اے ۔ کیہ دُکان تے کیہ تندور ہر تھاں تے پنڈ دیاں زنانیاں اِک دوجی دے کن وچ آکھ رہیاں سن :

" نی بھیڑی سُنیا ای سلو نوں کرونا ہو گیا اے ۔ "

٭٭٭٭٭