جیدی ۔۔۔۔۔

جیدی

۔۔۔۔

توقیر چغتائی

میں 1976وچ کراچی آیا تاں ایہ اک وڈے صنعتی تے کاروباری علاقے دے نال سماجی، ثقافتی تے ساہتک شہر وی سی، جو ہن نہیں رہیا۔ پنجابی، سندھی، بلوچی ،اُردوتے دوجیاں زباناں دے مشاعرے تاں ہوندے ای رہندے سن پر ایہدے نال ایتھے دے سینمیاں دی گنتری وی دوجے شہراں نالوں ودھیک سی ۔ میں اردو وچ لکھنا شروع کیتا تے نال ای پنجابی ول وی آگیا جو اک لمی داستان ہے پر 80 دے دہاکے وچ جدوں شہر دے منے پرمنے شاعراں نال ملنا جلنا ہویا تاں مشاعریاں وچ وی جان لگ پیا ۔ 1987 وچ لانڈھی دے علاقے وچ اک تنظیم ولوں مشاعراہویا جہدے وچ شعر پڑھن آلے سارے ای انقلابی رنگ دی شاعری پڑھن آلے شاعر سن پر اک اجہیاا شاعر وی سی جہڑا مخولیا شاعری لئی مشہور سی ۔ اطہر شاہ خان ناں دے ایس شاعر نوں اودوں اک بہترین ڈراما، کہانی، تے فلم رائٹر توں زیادہ اک مخولیا اداکار تے طور تے جانیا جاندا سی تے اک لکھاری توں ودھ اوہنوں نرا "مسخرا"سمجھیاجاندا سی، پر ایہناں ساریاں گلاں دے اُلٹ عام زندگی وچ اوہ بہت ای ترقی پسند سوچ رکھن آلا انتہائی سنجیدا انسان تے لکھاری سی جہڑا اپنے ناں توں زیادہ اپنے اک کردار "جیدی " توں زیادہ پچھانیا جاندا سی ۔ اوہ میرے نال ای بیٹھیا ہویا سی کیوں جو مشاعرہ شروع ہون وچ ہالی کچھ دیر سی ۔ ڈرامیاں وچ اوہدی اداکاری تے پنجابی دی بڑی کامیاب فلم "منجھی کتھے ڈاہواں " دے مکالمے لکھن دی وجہ نال میں اوہنوں پنجابی ای سمجھدا ساں ایس لئی میں پنجابی وچ ای اوہنوں پچھیا کہ تساں " منجی کتھے ڈاہواں "جہی مشہور پنجابی فلم وچ کم وی کیتا تے اُس فلم دا اسکرپٹ وی لکھیا پر اوہدے مگروں کوئی پنجابی فلم کیوں نہ لکھی ؟ تاں اوہنے مینوں دسیا کہ میرے ماں پیو پنجاب دے نہیں سگوں رام پور بھارت دے رہن آلے سن پر ست سال دی عمر وچ پہلاں پیو تے فیر ماں دا انتقال ہو گیا ۔ میرا بچپن تے جوانی لاہور تے پشاور وچ گزری ایس کر کے پنجابی وی چنگی طرحاں بول لیندا ں ۔ لاہور دے اک ہومیو پیتھ کالج توں ڈاکٹر دی ڈگری وی لتی تے نال ای صحافت وچ وی ماسٹر دی ڈگری لِتی تے " امروز" لاہور تو ںاڈ اک فلمی اخبار وچ لکھدا وی رہیا ، پر بلکل شروع وچ ای اردو دیاں اک دو سپر ہٹ فلماں مگروں ، ریڈیو ، ٹی وی تے اردو فلماں وچ لکھن دی وجھا نال میں پنجابی فلماں لئی نہیں لکھ سکیا ۔

اطہر شاہ خان نال میری ایہ بہت ای چھوٹی جہی ملنی سی، پر میں اُس توں ایس لئی وی متاثر ہویا کہ ٹی وی تے لوکاں نوں جہڑا جیدی ناں دا "مسخرا" نظر اوندا سی اوہ عام زندگی وچ کتنا سنجیداتے وکھری طبیعت دا مالک اے ۔ دوجی وار 1990 وچ اوہ مینوں پی ٹی وی کراچی تے ملے اودوں میں اک ڈراماسیریل "سچی کہانیاں" وچ کم کر رہیا سی ۔ اک قسط دی ریکارڈنگ لئی گیا تاں اوہناں نال فیر ملاقات ہو گئی ۔ میں اوہناں نوں دسیا کہ میری ملاقات تہاڈے نال اک مشاعرے وچ ہوئی سی پر اوہناں نوں یاد نہیں آ رہیا سی ۔ فیر وی اوہ مینوں بڑی محبت نال ملے تے اک ہور پروڈیوسر نال رل کے اساں کینٹین وچ چا ہ پیتی تے اوہناں کولوں مزاحیا قطعے وی سنے۔

اطہر شاہ خان نے شروع وچ ای پاکستان دیاں دو تن وڈیاں فلماں دی کہانی تے ڈائیلاگ لکھ کے تے فیر کئی ودھیا ڈرامیاں وچ اداکاری راہیں لوکاں دی محبت کٹھی پر اوہناں وچ کدے وی غرور نہیں ویکھیا گیا ۔

مینوں اطہر شاہ خان "جیدی " ایس لئی وی پسند اے کہ اوہنے " با ادب با ملاحظہ ہوشیار" جہیا ڈراما لکھ کے ساڈے معاشرے وچ نا انصافی، بے رحمی ،جھوٹھ تے ظلم نوں نہ صرف ننگا کیتا سگوں ایس ڈرامے راہیں ساڈی سیاست دے محلاں وچ ہون آلیاں سازشاں نوںوی لوکاں دے ساہمنے لیاندا۔ اطہر شاہ خان نوں لاہور تے لاہوریاں نال بہت پیار سی ۔ اوہدیاں بہت ساریاں یاداں ایس شہر توں اڈ اپنے قریبی متراں علی اعجاز، قوی تے ہور بہت سارے فنکاراں نال وی جڑیاں ہویاں سن ۔