kraamaat@gmail.com
+ +92 333-430-6384


چار دن کھلا، تِن دن لاک ڈاؤن


جمیل احمد پال May 10, 2020


چار دن کھلا، تِن دن لاک ڈاؤن

پنجاب سرکار نے مئی مہینے واسطے جزوی لاک ڈاؤن وچ عجیب انداز نال وِشالکاری کیتی اے۔ نویں قانون مطابق ہفتے دے پہلے چار دن لاک ڈاؤن وچ نرمی جد کہ انتم تن دن پابندی ہویا کرے گی۔ پنجاب اندر ایہ نواں قانون اوس سمے آیا اے جدوں سندھ دے وزیر اعلا نے اِکو دن اندر 1080 نویں روگی آون پاروں تشویش دا اظہار کردے ہویاں آکھیاکہ سانوں ہور احتیاط کرن دی لوڑ اے۔ بلوچستان وچ وی عید تیکر سمارٹ لاک ڈاؤن دی لگوتی دا نوٹی فکیشن جاری کیتا گیا اے۔

پنجاب سرکار دے نویں نوٹی فکیشن مطابق ہفتے دے پہلے چار دن سویرے 8 وجے توں شام 5 وجے تیکر کاروبار کیتا جا سکے گا جد کہ ہفتے دے آخری تن دن چھٹی ہویا کرے گی۔وڈے شاپنگ مالز‘ تعلیمی ادارے‘ ریسٹورنٹ‘ ہوٹل‘ شادی ہال‘ سنیما تے لوکائی اکٹھ بند رہن گے جد کہ اُسارکاری نال تعلق رکھن والیاں دُکاناں کھول دِتیاں گئیاں نیں‘ حجام دکاناں تے جمنیزیم وی مشروط کھولن دی اجازت مِل گئی اے تے چھیتی ای ایس او پیز مِتھن دے بعد ٹرانسپورٹ وی کھول دتی جاوے گی۔

حیرانی والی گل اے کہ جدوں کرونا دے روزوار روگی درجناں وچ ہوندے سن‘ اودوں تیکر دیس اندر لاک ڈاؤن دی بھرویں پابندی کروائی جاندی رہی۔ جیوں ای روگیاں دی روزوار گنتی سینکڑے وچ داخل ہوئی‘ ساڈے حکمراناں نوں بھُکھی مردی لوکائی دی پریشانی ستاون لگ پئی تے جدوں روگی ہزاراں وچ داخل ہو گئے نیں تاں لاک ڈاؤن وچ نرمی کر دِتی گئی اے۔

لگدا تے نہیں پر ہو سکدا اے‘ حکومت نے کرونا وایرس نال وی کوئی ”ڈیل“ کر لئی ہووے کہ اوہ ہفتے دے پہلے چار دن لوکائی نوں تنگ نہیں کرے گا جد کہ باقی تن دن اوہدی مرضی دے ہوون گے تے لوکائی گھراں وچ رہوے گی۔ انج دے عقل مندانا فیصلے اج کل پنجاب سرکار کولوں اکثر ہو رہے نیں۔ کوئی وی وبا ہووے‘ دِناں دی محتاج نہیں ہوندی۔ ہفتے‘ ایتوار وانگوں اوہ سوموار تے منگلوار والے دِناں وچ وی اونی ای خطرناک ہوندی اے تے لوکاں نوں لگن دے امکان وی برابر دے ہوندے نیں۔ ایس عقل مندی دی کسے نوں وی سمجھ نہیں آ سکدی کہ جے ہفتے وچ چار دن لوکاں نوں کھل کھیڈن تے بیماری لواون دے پورے موقعے مہیا کر دِتے گئے نیں تاں باقی دو دن وی ایہ موقعے دین وچ کیہ ہرج سی۔ سگوں چھے دن پورے کر دین نال ایس گل دا امکان وی سی کہ بازاراں وچ رش کجھ گھٹ جاندا۔ ہُن چھے یاں ست دناں دا رش جدوں چار دناں اُتے ونڈیجیا جاوے گا تاں یقینن ودھ جاوے گا تے اوسے تناسب نال خطرا وی ودھ جاوے گا۔

پر درجن روگیاں اُتے لاک ڈاؤن کرن تے ہزار روگیاں اُتے لاک ڈاؤن کھولن والیاں کولوں ایہوجہے فیصلے دی ای آس رکھی جا سکدی اے۔

(شکریے نال روزوار لوکائی)