سندھ سرکار ولوں لاک ڈاؤن وچ نرمی دے حوالے نال وڈے فیصلے تفصیل ویکھو۔۔۔۔٭رویل نیوز٭

کراچی (نمائندا رویل) سندھ سرکار نے تاجراں نُوں دن وچ 11 گھنٹے دُکاناں کھولن دی اجازت دے دِتی۔ وسیلیاں مطابق وزیر اعلا سندھ مراد علی شاہ نے تاجر تنظیماں دے نمایندیاں دا اجلاس سدیا‘ تاجراں تے سندھ حکومت دے وچکار اہم بیٹھک سندھ اسمبلی وچ ہوئی۔ ترجمان دے مطابق تاجراں نال ملاقات دے دوران وزیر اعلا سندھ نے کہیا کہ لوکائی دی صحت ساڈی پہلی ترجیح اے‘ کیسز انتہا اُتیجا رہے نیں‘ ساڈے لاک ڈاؤن نال فایدا ہویا اے‘ اسیں وفاقی حکومت نال گل کردے رہے‘ میں پبلک ٹرانسپورٹ تے ائر پورٹ کھولن اُتے اعتراض کیتا سی‘ وفاقی حکومت رات نُوں کاروبار کھولنا چاہندی سی جہدے اُتے اسیں اعتراض کیتا‘ وفاقی حکومت نے ساڈی گل منی۔ وزیر اعلا سندھ دا کہنا سی کہ کاروبار بند رکھن بارے فیصلا چاراں صوبیاں تے وفاق دا متفقا سی‘ ایہ مشکل فیصلے کردیاں ہویاں ساڈا وی دُل دُکھیا‘ ہُن واپس کاروبار کھولن دا فیصلا وی انتہائی مشکل اے‘ میں وفاقی حکومت نال وی گل کیتی اے‘ کاروباری لوک شدید مشکل وچ نیں‘ اسیں کوشش کر رہے آں کہ چھوٹے تاجراں نُوں قرضے دلوائیے۔ وزیر اعلا سندھ دا کہنا سی کہ لوکائی دی صحت ساڈی پہلی ترجیح اے‘ کرونا ویارس دے کیسز اپنے عروج اُتے نیں‘ سانوں لاک ڈاؤن نال فاید اہویا۔ اوہناں نے کہیا کہ دُکاناں صبح 6 توں 5 وجے تک کھولیاں جان گیاں‘ شاپنگ سینٹرز تے مالز بند رہن گے۔ سید مراد علی شاہ نے کہیا کہ مذہبی تے سماجی اجتماع‘ کھیڈاں دے مقابلیاں اُتے پابندی بدستور جاری رہوے گی‘ پارکس‘ شادی ہالز تے تعلیمی ادارے بند رہن گے۔ ایہدے نال ای سندھ سرکار نے لاک ڈاؤن وچ 31 مئی تک وادھا وی کر دِتا اے جہدا باضابطا نوٹیفکیشن وی جاری کر دِتا گیا اے۔ نوٹیفکیشن دے مطابق جمعے‘ ہفتے تے ایتوار نُوں سخت لاک ڈاؤن ہوو گا‘ شام 5 توں صبح 8 تک لوکائی دے گھراں توں نکلن اُتے پابندی ہووے گی‘ شاپنگ مالز‘ تعلیمی ادارے‘ شادی ہالز‘ جلسے جلوس‘ مذہبی اجتماعات اُتے پابندی ہووے گی‘ تعمیرات دے شعبے نال وابستا کاروبار وی ایس او پیز دے تحت کھولیا جاوے گا۔