کرونا پاروں ہلاکتاں ودھ رہیاں نیں  پر  لوکاں توں اوہناں دا روزگار نہیں کھوہیا جا سکدا:اسد عمر دی میڈیا بریفنگ۔۔۔۔٭رویل نیوز٭

اسلام آباد (نمایندا رویل) وفاقی وزیر منصوبا بندی اسد عمر دا کہنا اے کہ ملک وچ کرونا دے کیسز تے مَوتاں ودھ رہیاں نیں پر لوکاں توں اوہناں دا روزگار نہیں کھوہ سکدے‘ بُہتے وڈے فیصلے ہو چکے نیں‘ ہُن عملدرآمد دا مرحلا اے۔اسلام آباد وچ میڈیا بریفنگ دے دوران اسد عمر نے کہیا کہ کمانڈ اینڈ اپریشن سینٹر مسلسل کم کر رہیا اے‘ ہر دن ٹیسٹنگ دی گنتی وچ وادھا ہو رہیا اے‘ پچھلے دن ساڈھے 13 ہزار کرونا ٹیسٹ کیتے گئے‘ پورے ملک وچ 70 لیبز کرونا ٹیسٹ کر رہیاں نیں‘ خُشی اے کہ قومی فیصلے مشاورت نال ہو رہے نیں‘ سارے ادارے رَل کے اِک نظام دے تحت کم کر رہے نیں‘ وڈے فیصلے ہو چکے نیں تے ہُن عملدرآمد دا مرحلا اے۔ اسد عمر نے کہیا کہ لاہور‘ کراچی تے پشاور وچ کیسز ودھ رہے نیں‘ ملک وچ کرونا دے کیسز تے مَوتاں ودھ رہیاں نیں پر لوکاں توں اوہناں دا روزگار نہیں کھوہیا جا سکدا‘ سانوں زندگی دا پہیا چلان دے نال وباء توں حفاظت وی کرنی اے‘ پورا ملک بند کرن دی بجائے متاثرا علاقیاں نُوں بند کیتا جاوے گا‘ سمارٹ لاک ڈاؤن دے نظام نے کم کرنا شروع کر دِتا اے‘ اسیں نشاندہی کرنی اے کہ کہڑے علاقے وچ کیسز بُہتے تے وایرس کھلر رہیا اے‘ پنجاب وچ 359 تھاواں جد کہ خیبر پختونخوا دے 177 علاقیاں وچ سمارٹ لاک ڈاؤن کیتا گیا اے۔ وفاقی وزیر دا کہنا سی کہ ہسپتالاں وچ بستریاں دی کمی نہیں اے‘ کرونا بارے صحت دے ڈیٹا لئی اِک پورٹل بن چُکیا اے‘ پنجاب سرکار نے کرونا بارے ایپ تیار کر لئی اے‘ ایپ نال شہری پتا کر سکن گے اوہناں نُوں کہڑے ہسپتال جانا اے