کرونا روگی اپنے ای گھر وچ گھر بندی اخیتار کرن دی اجازت دے دِتی گئی،عالمی ادارا صحت ولوں دِتے گئے اُصول پورے کیتے جاون گے:سردار عثمان بزدار۔۔۔۔٭رویل نیوز٭

لاہور (نمایندا رویل) وزیر اعلاپنجاب سردار عثمان بزدار نے گھر بندی دی اجازت دے دِتی۔ محکما پرائمری اینڈ سیکنڈری ہیلتھ کیئر نے کرونا ایکسپرٹ ایڈوائرزی گرُپ تے ٹیکنیکل ورکنگ گرُپ دیاں سفارشاں اُتے باضابطا نوٹیفکیشن جاری کر دِتا اے۔ وزیر اعلا عثمان بزدار نے ہوم آئسولیشن دی اجازت دیندیاں ہویاں دَسیا کہ ہوم آئسولیشن لئی عالمی ادارا صحت دے ایس او پیز نُوں ساہمنے رکھیا گیا اے‘ صرف معمولی علامتاں والے روگیاں نُوں ای ہوم آئسولیشن وچ رکھیا جا سکے گا۔ روگی نُوں متعلقا ڈسٹرکٹ ہیلتھ اتھارٹیی دی نگرانی وچ ضروری سہولتاں نال مزین عمارت وچ رکھیا جاوے گا۔ ہوٹلز‘ سکول بلڈنگز‘ مسیتاں‘ ہوسٹلز‘ کمیونٹی سنٹر تے ضروری سہولتاں نال مزین عمارت وچ روگی نُوں رکھیا جاوے گا جہڑی عمارت وچ روگی نُوں ہوم آئسولیشن وچ رکھیا جاوے گا اوس بلڈنگ نُوں روزانا ڈس انفیکشن کیتا جاوے گا۔ ہوم آئسولیشن والی بلڈنگ وچ سالڈ ویسٹ نُوں گائیڈ لائن دے مطابق تلف کیتا جاوے گا۔ کسے ایہو جہی عمارت وچ ہوم آئسولیشن نہیں کیتی جا سکے گی جتھے کولنگ تے ہیٹنگ سسٹم نال وایرس کھلرن دا دھرُکو ہووے۔ آئسولیشن دے روگی نُوں صرف ڈسپوزیبل بھانڈیاں وچ کھانا مہیا کیتا جاوے گا۔ ہوم آئسولیشن دا فیصلا ڈپٹی کمشنر دی نامزد کردا ہوم آئسولیشن کمیٹی کرے گی۔ ہوم آئسولیشن کمیٹی وچ اسسٹنٹ کمشنر یاں ا وہناں دا نمایندا ڈی ڈی او ہیلتھ چیف افسر شامل ہون گے۔ پاپولیشن ویلفیر‘ لائیو سٹاک‘ ایکسائز اینڈ ٹیکسیشن دے اہلکار ہوم آئسولیشن دی مانیٹرنگ تے رپورٹنگ کرن گے۔ ہر اربن یونین کونسل وچ 3کمیٹیاں قایم کیتیاں جان گیاں‘ ہر کمیٹی وچ اِک ڈاکٹر شامل ہووے گا۔ ہر پینڈو یونین کونسل وچ کمیٹی بنائی جاوے گی‘ کمیٹی وچ ڈاکٹر دا ہونا ضروری اے۔ کمیٹی خاندان دے بندیاں دی گنتی دے مطابق اِک توں ودھ روگیاں نُوں رکھن دی گنجایش دا وی جایزا لوے گی۔ ہوم آئسولیشن دی اجازت توں پہلے متعلقا خاندان نُوں طریقے کار تے ایس او پیز بارے اگاہ کیتا جاوے گا۔ ہوم آئسولیشن وچ موجود روگی اپنی کنڈیشن دے بارے وچ روزانا اطلاع کرن دا پابند ہووے گا۔ ہوم آئسولیشن دے ہر روگی اُتے محکما پرائمری اینڈ سیکنڈری ہیلتھ دیاں ہدایتاں اُتے عملدرآمد ضروری ہووے گا۔ ہوم آئسولیشن وچ روگی لئی ٹیسٹنگ پروٹوکول دی پابندی وی لازمی ہووے گی۔ ہوم آئسولیشن دا دورانیا 10 دن ہووے گا تے ایہنوں ختم کرن لئی روگی دے 2 نیگٹو کرونا ٹیسٹ ضروری ہون گے۔ ہوم آئسولیشن ختم ہون اُتے دوجا کرونا ٹیسٹ پازیٹو آن اُتے ہور 5 دن دے بعد نواں ٹیسٹ کروایا جاوے گا۔ کرونا ٹیسٹ دی سہولت میسر نہ ہون اُتے روگی نُوں علامتاں ختم ہون دے باوجود ہور 2 ہفتے وکھرا رہنا پوے گا۔ وزیر اعلا نے محکما پرائمری اینڈ سیکنڈری ہیلتھ کیئر نُوں ہوم آئسولیشن دے ایس او پیز اُتے عملدرآمد یقینی بنان لئی ضروری اقدامات دی ہدایت کیتی اے۔ ایس توں وکھ وزی راعلا نے ہور کہیا کہ لاک ڈاؤن وچ نرمی دے حوالے توں ایس او پیز اُتے عملدرآمد نہ کرن والے کاروباری ادارے تے انڈسٹریل یونٹس دے خلاف قانونی کارروائی ہووے گی۔