دیس توں باہروں آون والیاں لئی کرونا ٹیسٹ وچ اَسانی پیدا کرن دا جتن،نویں پالیسی بن گئی۔۔۔۔٭رویل نیوز٭

اسلام آباد (نمایندا رویل) پاکستان سرکار نے بیرون ملک وچ پھسے ہوئے پاکستانیاں نُوں واپس لیان لئی وڈا تے اہم فیصلا کردیاں ہویاں قرنطینا سہولتاں دے حوالے توں پالیسی وچ ہور لچک پیدا کر دِتی اے‘ بیرون ملکاں توں آن والے پاکستانیاں نُوں کرونا ٹیسٹ لئی 48 گھنٹے دا انتظار نہیں کرنا پوے گا‘ نویں پالیسی فوری طور اُتے نافذ العمل اے‘ ایس پالیسی دے تحت ہفتے وچ 10 توں 11 ہزار پاکستانیاں نُوں وطن واپس لیاندا جا سکے گا‘ وزیراعظم عمران خان دیاں واضح ہدایتاں نیں کہ چھیتی توں چھیتی تے ودھ توں ودھ پاکستانیاں نُوں وطن واپس لیاندا جاوے‘ چالو ہفتے امریکا‘ برطانیا‘ کینیڈا‘ افریقا تے خلیجی ملکاں توں ہور پاکستانیاں نُوں واپس لیاندا جاوے گا‘ سیالکوٹ ائر پورٹ تے کوئٹہ ائر پورٹ نُوں وی ایس ضمن وچ استعمال کیتا جاوے گا۔ پیر نُوں وزیراعظم دے معاون خصوصی برائے قومی سلامتی امور ڈاکٹر معید یوسف نے میڈیا نُوں بریفنگ دیندیاں ہویاں دَسیا کہ ایس پوری پالیسی دا محور اِک بندا اے جہدی زندگی وچ آن والیاں اوکڑاں نُوں سوکھا بنانا وزیراعظم دا بنیادی نکتا اے‘ اج دی بریفنگ وچ اوہ سارے ابہام دور ہو گئے جہڑے کہ کئی لوکاں دے ذہناں وچ موجود سن‘ ایس نویں حکمت عملی دے تحت ہُن بُہتی گنتی وچ پاکستانی واپس آ سکن گے۔ اوہناں نے کہیا کہ تارکین وطن لئی خشخبری اے کہ اوہناں نُوں واپس لیان لئی پالیسی وچ ہور لچک لیاندی گئی اے‘ نویں پالیسی دے مطابق بیرون ملک توں آن والے پاکستانیاں لئی کرونا ٹیسٹ لئی 48 گھنٹے دی پابندی ختم‘ ٹیسٹ رپورٹ منفی آن دے نال نال ایہو جہے مثبت کیسز جہناں وچ علامتاں ظاہر نہیں ہو رہیاں اوہناں نُوں صوبائی حکومتاں صحت ماہرین دی ایڈوائس اُتے سیلف کوارنٹین لئی گھراں وچ گھل سکن گیاں‘ 11 مئی توں جہڑا وی بیرون ملک توں پاکستان آئے گا اوہ فوری طور اُتے حکومتی قرنطینا یاں اپنے ذاتی خرچ اُتے ہوٹل وچ پہنچے گا جتھے ترجیحی بنیاداں اُتے اوہدا ٹیسٹ کیتا جاوے گا‘ ٹیسٹ دا رزلٹ وی چھیتی یقینی بنایا جاوے گا۔ ڈاکٹر معید یوسف نے کہیا کہ باہر پھسے ہوئے پاکستانی ساڈی پالیسی دا محور تے مرکز اے‘ نویں پالیسی دے تحت وباء دے عدم کھلار نُوں یقینی بناندیاں ہویاں مکمل حفاظت نال پاکستانیاں نُوں گھر پہنچاواں گے‘ ہُن تک 20 ہزار پاکستانیاں نُوں واپس لیا چکے آں‘ 1 لکھ 10 ہزار پاکستانی آن دے خاہشمند نیں‘ واپس آن والے پاکستانیاں دی گنتی و چ وادھا ہو رہیا اے۔ اوہناں نے کہیا کہ اج توں 21 مئی تک 22 ملکاں توں 10 ہزار 710 پاکستانیاں نُوں واپس لیاواں گے‘ 90 فیصد پاکستانی خلیجی ملکاں وچ موجود نیں‘ جے ہدایتاں اُتے عمل نہیں کرن گے تے ایہدا نقصان اوہناں دے خاندان تے پاکستانی لوکائی نُوں ہووے گا‘ جے وباء دا کھالر ودھیا تے ایہدے اُتے نظرثانی کرنی پوے گی۔