دیس جنگ  پر وزیر اعظم اُلجھن دی حالت وچ اے  ٭ وفاقی حکومت نے سندھ نال جو وعدے کیتے اوہ پورے نہیں ہوئے: بلاول بھٹو زرداری ۔۔۔۔٭رویل نیوز٭

اسلام آباد (نمایندا رویل) پاکستان پیپلز پارٹی دے چیئرمین بلاول بھٹو زرداری نے گلا کیتا اے کہ وفاقی حکومت نے سندھ نال جہڑے وعدے کیتے‘ پورے نہیں ہوئے جد کہ خیبر پختونخوا نُوں وی سپورٹ نہیں ملی۔ بلاول بھٹو دا قومی اسمبلی نال خطاب وچ کہنا سی کہ اسیں مثبت تنقید کردے آں پر سندھ وچ تحریک انصاف دے نمایندے غیر ذمے دارانا بیانات نال لوکائی نُوں کنفیوژ کر رہے نیں۔ وفاق ولوں ساڈی ہر کوشش نُوں انڈر مائن کیتا جاوے گا تے ساڈیاں کوششاں ناکام ہون گیاں۔ اوہناں نے مطالبا کیتا کہ سانوں سیاسی پوائنٹ سکورننگ نہیں سگوں وفاق دا ساتھ چاہیدا اے۔ ایہ عالمی کرائسز اے۔ مندے آں 18 ویں ترامیم دے بعد صوبیاں نُوں بُہتے وسایل ملے پر ساڈا اِک سال دا ہیلتھ بجٹ ایس وباء لئی کافی نہیں ہووے گا۔ کرائسز دے دوران وفاقی حکومت گالھ کڈھن تے کردار کشی دی بجائے مدد کرے۔ بلاول بھٹو نے کہیا کہ ٹیسٹنگ کِتاں تے حفاظتی سامان دی بلا تعطل سپلائی نُوں یقینی بنانا پوے گا۔ وفاق نُوں نیشنل ایمرجنسی وچ شانا بشانا کھلونا سی پر جو ہونا چاہیدا سی‘ اُنج نہیں ہویا۔ اج وی وفاق توں درخاست ای کر سکدے آں۔ اوہناں دا کہنا سی کہ اِک دوجے خلاف بیانات دین دی بجائے جے کرونا دے خلاف توجا نال کم کردے تے حالات مختلف ہوندے۔ 90 فیصد بیانات مراد علی شاہ دے خلاف ہوندے نیں۔ اوہناں نے الزام لایا کہ پاکستان جنگ دی حالت وچ اے پر وزیراعظم غایب تے کنفیوژ نیں‘ افسوس وزیراعظم اپنی ذمے داری پوری نہیں کر رہے۔اوہناں نے کہیا کہ وزیراعظم دے معاون خصوصی برائے صحت ایوان وچ گل نہیں کر سکدے‘ عمران خان نُوں ایوان وچ آ کے پوری قوم نُوں اصل صورتحال توں اگاہی دینی چاہیدی سی۔ پی پی پی چیئرمین نے ہور کہیا کہ وزیراعظم اِک پاسے تے ایہ چاہندے نیں کہ غریب‘ مزدور سنے ہر شعبے دا بندا کم کرے تاں جے معیشت دا پہیا چلے‘ جدوں تُسیں د وجیاں توں توقع رکھدے او تے اوہ تہانوں آپ وی کرنا پیندا اے۔اوہناں نے کہیا کہ کرونا خلاف جنگ وچ فرنٹ لائن سولجرز ڈاکٹرز تے طبی عملا اے‘ جہنوں خراج تحسین پیش کردے آں‘ ہُن تک 700 توں ودھ میڈیکل سٹاف مہلک وایرس نال متاثر تے 11 شہید ہو چکے نیں۔ پی پی چیئرمین نے ایہو ی کہیا کہ سپیکر اسد قیصر نُوں مس کر رہے آں تے اوہناں دی صحت یابی لئی دُعا گو آں۔