کرونا وایرس نال پوری دُنیا وچ  متاثرین  تے ہلاکتاں  دی تعداد وچ گھاٹا نہیں ہو رہیا ،تفصیل  جانن لئی۔۔٭رویل نیوز٭

واشنگٹن (نیوز ڈیسک) کرونا وایرس دی وجھا توں پوری دنیا وچ ہُن تک 42 لکھ 56 ہزار 729 توں ودھ بندے متاثر جد کہ 2 لکھ86 ہزار توں ودھ بندے ہلاک ہو چکے نیں جد کہ پاکستان وچ 32 ہزار توں ودھ بندے متاثر نیں جد کہ 724 بندے ہلاک ہو چکے نیں جد کہ امریکا وچ َمَوتاں دی گنتی 80 ہزار توں ٹپ گئی اے‘ یورپ تے ایشیا دے کئی ملک ودھدے کیسز دے باوجود لاک ڈاؤن وچ نرمی لیا رہے نیں‘ واشنگٹن وچ وائٹ ہاؤس دے اہلکاراں نُوں کہیا گیا اے کہ اوہ صدر دے دفتر وچ ماسک پان یاں فیر اوتھوں دور رہن جد کہ انڈیا وچ اِک دن وچ متاثرین دی ریکارڈ گنتی ساہمنے آئی اے۔ پاکستان وچ متاثرین دی گنتی 32674 توں ودھ اے جد کہ 724 بندے ایس روگ نال چلانا کر گئے نیں۔ پاکستان وچ سبھ توں ودھ 257 مَوتاں خیبر پختونخوا وچ ہوئیاں نیں‘ پاکستان دی وفاقی وزارت صحت دے مطابق ایس ویلے ملک دے ہسپتالاں و چ علاج ہیٹھ روگیاں وِچوں صرف 92 روگی وینٹیلیٹرز اُتے نیں جد کہ 196 روگی ایہو جہے نیں جہناں دی حالت ماڑی اے پر اوہ وینٹیلیٹر اُتے نہیں نیں۔ قطر ائر ویز دے سی ای او اکبر البقر نے کہیا اے کہ عالمی سفر دی ڈیمانڈ دا 2023/24 توں پہلے معمول اُتے آنا حیران کن ہووے گا۔ دوجے پاسے اِک ویڈیو کانفرنس نال خطاب کردیاں ہویاں عالمی ادارا صحت دے ڈاکٹر ٹیڈروس دا کہنا اے کہ کرونا نُوں جڑ توں ختم نہ کیتا تے وایرس دُبار ا کھلرن دا دھرُکو اے۔ اوہناں دا کہنا سی کہ مرحلا وار نرمی امید دی کرن تے خُش آیند اے پر ایس مرحلے وچ سارے ملکاں نُوں محتاط رہنا پوے گا‘ پابندیاں چُکنا پیچیدا تے مشکل مرحلا اے۔ اوہناں دا کہنا سی کہ کرونا وایرس دی ٹورکاری نوں سست کرن تے انسانی جاناں دے تحفظ وچ کامیابی مل رہی اے جو چنگی خبر اے۔