سندھ کارڈ کھیڈن بارے بیان واپس لیا جاوے٭ ایہ ویلا سیاست دا نہیں‘ ساڈے ہیلتھ ورکرز شہید ہو رہے نیں:بلاول بھٹو زرداری۔۔٭رویل نیوز٭

اسلام آباد (نمائندا رویل) پاکستان پیپلز پارٹی دے چیئرمین بلاول بھٹو نے کہیا اے کہ وزیر خارجا اپنا سندھ کارڈ بارے بیان واپس لین‘ یاں استعفا دین‘ ایس قسم دی بیان بازی ناقابل برداشت تے وفاق لئی نقصان دہ اے‘ وفاقی وزیر صاحب! سانوں پتا اے تُسیں اپنا لوہا کویں منوایا‘ تہانوں کسے نے وزیراعظم بنن دا خاب وکھایا‘ ہُن ایہ وزیر پی ٹی آئی وچ وی اوہی کھیڈ رہیا اے۔ اوہناں نے پریس کانفرنس کردیاں ہویاں کہیا کہ دوجا سال اے کہ حکومت ٹڈی دل نُوں ختم کرن وچ ناکام اے۔ ٹڈی دل صرف کسان لئی نہیں سگوں پاکستان دی فوڈ سیکیورٹی لئی خطرا اے۔ یو این دی رپورٹ وچ کہیا گیا کہ پاکستان دی فوڈ سیکیورٹی نُوں بُہتا خطرا اے۔ اوہناں نے کہیا کہ اسیں مطالبا کردے آں کہ وفاقی حکومت نُوں ہیلتھ ورکرز دے ریلیف لئی اقدامات چُکنے چاہیدے نیں۔ سندھ حکومت ہیلتھ ورکرز نُوں رسک الاؤنس دیوے گی۔ دنیا وچ نرساں اپنی جان خطرے وچ پا کے انسانیت دی خدمت کر رہیاں اے۔ وباء نال نبڑن لئی سندھ حکومت کنڑیکٹ اُتے بھرتیاں کر رہی اے‘ بعد وچ ایہناں نوں کنفرم وی کراں گے۔ وزیراعظم نُو ں پارلیمنٹ وچ آنا چاہیدا سی‘ اوہناں دی ذمے داری اے‘ اوہ وزیر صحت وی نیں‘ اوہناں نُوں ہاؤس وچ آ کے صورتحال توں اگاہ کرنا چاہیدا اے۔ وفاقی وزیر کہندا اے کہ اسنوں سندھ توں بُو آ رہی اے‘ کس قسم دی بیان بازی اے؟ جدوں اسیں بلوچستان دے نال زیادتی تے انسانی حقاں دی گل کردے آں تے کیہ اسیں بلوچستان کار ڈ کھیڈدے آں‘ جدوں جنوبی پنجاب دی پسماندگی‘ خیبر پختونخوا تے گلگت بلتستان دی گل کردے آں تے کیہ اسیں کوئی کارڈ کھیڈ رہے آں؟ وزیر خارجا اپنا بیان واپس لین‘ جے بیان واپس نہ لیا تے استعفا دین‘ ایس قسم دی بیان بازی برداشت نہیں کراں گے‘ ایہدے نال فاق نُوں نقصان پہنچ سکدا اے‘ میں تہاڈے ول ہتھ ودھان دی گل کر رہیا آں‘ پر تُسیں مونہ اُتے چپیڑ مار رہے او؟ کیہ مطلب اے تُسیں اپنا سندھ وچ سیاسی لوہامنوایا‘ منواؤ گے؟ اہ ویلا سیاسی لوہا منوان دا اے؟ اسیں ایس ویلے پنجاب وچ سیاسی لوہا منوان یاں الیکشن جتن دا نہیں سوچ رہے آں۔ اسیں صرف پاکستان دی لوکائی دی زندگی دے بارے وچ سوچ رہے آں۔ وفاقی وزیر صاحب! سانوں پتا اے تُسیں اپنا لوہا کویں منوایا‘ سانوں مجبور نہ کرو ساریاں گلاں قوم دے ساہمنے لے کے آئیے‘ مینوں پتا اے جدوں ایہ وزیر ساڈا وزیر سی‘ کہنے اپروچ کیتا تے کہنے وزیراعظم بنن دا خاب وکھایا‘ ہُن ایہ وزیر پی ٹی آئی وی اوہی کھیڈ رہیا اے‘ پی ی آئی یاں عمران خان دا نہیں سگوں اپنا لوہا کھیڈن دا کھیڈ رہیا اے۔ ایہ ویلا سیاست دا نہیں‘ ساڈے ہیلتھ ورکرز شہید ہو رہے نیں‘ 11 ہیلتھ ورکرز شہید ہو چکے نیں‘ 700 پاکستانی چلانا کر چکے نیں۔ اسیں ذمے داری تے غیر سیاسی طریقے نال مفاہمت نال اپنی لوکائی دی جان بچانی اے‘ میں شروع دن توں ای مفاہمت دی گل کیتی اے۔