پنجاب تے سندھ دیاں حکومتاں نے لاک ڈاؤن  سخت کرن دی وارننگ،بازاراں وچ بال نہ آون،ماسک توں بغیر خریداراں اُتے پابندی لائی جاوے۔۔٭رویل نیوز٭

لاہور/کراچی (نیوز ڈیسک) حکومت ولوں لاک ڈاؤن وچ نرمی دا لوکائی نے ناجایز فایدا چُکنا شروع کر دِتا اے جہدے نال کرونا وایرس دی وباء ہور کھلرن دے خطرات ودھن لگے نیں۔ صورتحال دے پیش نظر پنجاب تے سندھ دیاں حکومتاں نے لاک ڈاؤن فیر توں سخت کرن دی وارننگ دے دِتی اے۔ وزیر اعلا سندھ سید مراد علی شاہ نے حساس صورتحال دے پیش نظر جاری بیان وچ کہیا اے کہ اج کرونا نال صوبے وچ ریکارڈ 18 ہلاکتاں ہوئیاں‘ حالات بہتر نہ ہوئے تے دُبارا پابندیاں لا دواں گے۔ اوہناں دا کہنا سی کہ کرونا وباء وچ مبتلا کئی روگیاں دی حالت ماڑی اے‘ جہناں وِچوں 27 وینٹی لیٹرز اُتے نیں‘ ایہدے علاوا کراچی وچ 412 نویں کیسز رپورٹ ہو چکے نیں۔ اوہناں نے لاک ڈاؤن دے حوالے توں خبردار کردیاں ہویاں کہیا کہ ایس او پیز اُتے کسے نے عمل نہیں کیتا۔ دوجے پاسے پنجاب دے وزیر صنعت میاں اسلم اقبال نے وی لاک ڈاؤن وچ نرمی دے بعد عوامی ردِ عمل اُتے گوڑھے افسوس دا اظہا ر کردیاں ہویاں کہیا کہ اوہناں نُوں تاجراں نے مشکل وچ پا دِتا اے‘ ایہناں نے بہت زیادتی کیتی‘ دُبارا لاک ڈاؤن ول جا رہے آں۔ میاں اسلم اقبال دا کہنا سی کہ کجھ رُپئیاں دی خاطر سبھ دیاں زندگیاں داء اُتے لا دِتیاں گئیاں نیں۔ میں تاجراں دی و کالت کر کے تھک گیا آں‘ پر ایہناں لوکاں نے حد کر دِتی‘ ذمے دار لوکاں دا ایہ رویا سمجھ توں باہر اے۔ صوبائی وزیر دا کہنا سی کہ میں تاجراں دا وکیل بن کے ساریاں دُکاناں کھلوا دِتیاں پر ہُن ایہناں دیاں سب یونینز غایب ہو گئیاں نیں۔ اچھرا تے شاہ عالم مارکیٹ دے مناظر ویکھو‘ حد ہو گئی اے۔ اوہناں نے اپیل کیتی کہ بازاراں وچ بچیاں نُوں نہ آن دوو جد کہ دُکاناں تے مارکیٹاں وچ محافظاں نُوں کھڑا کیتا جاوے‘ سارے دُکاندار سینیٹائز ر دا بندو بست کرن۔ دُکاندار تے سٹاف دے ماسک نہ لان اُتے اوہناں دا چالان ہووے گا۔ میاں اسلم اقبال دی تاجراں نال گلبات وچ کہنا سی کہ میں لاک ڈاؤن دُبارا لگدا ویکھ رہیا آں تُسیں مارکیٹاں دی ٹائمنگ ودھان دی گل کر رہے او۔ پہلے تاجر برادری موجودا ٹائمنگ وچ ایس او پیز اُتے عملدرآمد کر کے وکھائے۔