عمران خان، کھنڈ کمیشن نوں جواب دین دا پابند نہیں،حکومتی وسائل گھٹ نیں کرونا نال لڑیا نہیں جا سکدا:اسد عمر دا ٹائیگر فورس نال خطاب۔۔٭رویل نیوز٭

لاہور (نیوزرویل ڈیسک) وفاقی وزیر منصوبا بندی اسد عمر نے کہیا اے کہ وزیراعظم عمران خان کھنڈ کمیشن نُوں جوابدہ نہیں نیں‘ کل دے حالات ویکھ کے انج لگا جویں لاک ڈاؤن وچ نرمی دا نہیں سگوں کرونا وایرس دے ختم ہون دا اعلان کر دِتا گیا ہووے۔ ایہناں خیالاں دا اظہار اوہناں نے ٹائیگر فورس دے رضا کااں نال خطاب تے کھنڈ تحقیقاتی کمیشن دے ساہمنے پیش ہون دے بعد میڈیا نال گلبات کردیاں ہویاں کیتا۔ ٹائیگر فورس نال خطاب کردیاں ہویاں اوہناں دا کہنا سی کہ حکومتی وسایل اینے نہیں کہ کلے کرونا وباء نال لڑ سکیے‘ لوکائی نُوں مشکل ویلے وچ ذمے داری دا مظاہرا کرناچاہیدا اے۔ اوہناں نے کہیا کہ کل جہڑے حالات سن انج لگا جویں لاک ڈاؤن وچ نرمی نہیں سگوں کرونا ختم ہون دا اعلان کیتا ہووے۔ اوہناں دا کہنا سی کہ ڈاکٹر صاحبان نے جہڑیاں احتیاطی تدبیراں دَسیاں نیں اوہناں اُتے عمل کیتا جاوے۔ اسد عمر نے کہیا کہ جے بے احتیاطی کیتی گئی تے مجبورن دُبارا بندشاں ودھائیاں جان گیاں۔ وفاقی وزیر نے کہیا کہ امید اے کہ شہری کرونا دی صورتحال نُوں سمجھن گے۔ اوہناں دا کہنا سی کہ عید دی تیاری ضرور کرو پر حفاظت وی کرو۔ وفاقی وزیر نے ٹائیگر فورس دے رضا کاراں نُوں خراج تحسین وی پیش کیتا تے کہیا کہ سارا پاکستان ایس ویلے متحد اے۔ ایس توں وکھ کھنڈ کمیشن ساہمنے پیش ہون دے بعد میڈیا نال گلبات کردیاں ہویاں اوہناں دا کہنا سی کہ میں آپ کہیا سی کہ میں کھنڈ کمیشن ساہمنے پیش ہونا چاہندا آں‘ میں ای سی سی دا چیئرمین سی‘ ایسے حیثیت نال جواب دین آیا آں۔ اسد عمر دا کہنا سی کہ وزیراعظم عمران خان کھنڈ کمیشن نوں جوابدہ نہیں نیں۔ وفاقی وزیر نے کہیا کہ کمیشن میرے توں سوالات پُچھے جہدے جوابات میں دِتے۔ اوہناں نے وزیراعظم عمران خان بارے ہور کہیا کہ اوہ قوم نُوں ناامید نہیں کرن گے۔ وفاقی زویر نے دَسیا کہ کمیشن دی رپورٹ حالے نہیں آئی‘ سانوں انتظار کرنا پوے گا‘ کجھ دن وچ کمیشن دی رپورٹ آ جاوے گی۔ اسدعمر دا کہنا سی کہ میرے علم وچ کمیشن وچ وادھے بارے کوئی گل نہیں اے‘ کھنڈ کمیشن دی رپورٹ آن دے بعد ای حتمی فیصلا کراں گے۔